1 సురుమా దేవ్‍ జమీన్నా, ఆకాష్‍యేనా బణాయో. 2 జమీన్‍ రూప్‍ కొయినితిమ్‍ ఖాలితరా థూ, ఘణు అంధారు పాణిఫర్‍ ఫైలాయిన్‍ థూ; దేవ్ను ఆత్మ పాణిఫర్‍ తర్పడ్తు థూ. 3 తెదె దేవ్‍ "ఉజాళు హుకరి బోలమా" ఉజాళు హుయు. 4 యో ఉజాళు అచ్చుకరి దేవ్‍ దేఖ్యొ; దేవ్ ఉజాళునాబి ఆంధారునా అలాదు కర్యొ. 5 దేవ్‍ ఉజాళునా వ్హాను కరి, అంధారునా రాత్‍ కరి నామ్‍ మేంద్యొ. హాఃజెబి వ్హాను హువమా ఏక్‍ ధన్‍ హుయు. 6 అజు దేవ్‍ పాణినా ఇచ్మా ఏక్‍ కుల్లా హుయిన్ యో పాణి యో పాణిను అలాదు హూ బోల్యొ. 7 దేవ్‍ ఆ కుల్లుహుయుతె జొగొన కరిన్, ఇనా ఉప్పర్ పాణినా, హేట్ ఛాతె పాణి అలాదు కర్యో. యో ఇమ్మస్ హుయు 8 దేవ్‍ యో కుల్లా జొగొన ఆకాష్‍ కరి నామ్‍ మ్హేంద్యొ. రాత్బి వ్హాను హుమా బెమ్మను ధన్‍ హుయు. 9 దేవ్‍ "ఆకాష్‍నా హేట్‍ ఛాతె పాణినా ఏక్స్ జోగొ మలీన్‍ ఛాతే హుఃకాయుతే జమీన్‍ దెఖ్కావ్ను" కరి బోలమా ఇమ్మస్‍ హుయు. 10 దేవ్‍ హుఃకాయుతే జొగొనా "జమీన్‍" కరి నామ్‍ మ్హేంద్యొ, పాణినా యో "ధర్యావ్‍" కరి నామ్‍ మ్హేంద్యొ, యో అష్యల్‍ కరి దేవ్‍ ర్హయిగొ. 11 దేవ్‍ గాహ్కన బింజోల దేయ్తె ఝాడనా జమీన్‍ ఫర్‍ ఇనుయినూ జాత్ను ప్రకారమ్‍ ఇవ్నమా బింజోలహుయుతె ఫల్‍ దేయ్తె ఫల్ను ఝాడవ్నా జమీన్‍మా పుట్సేకరి బోలమా‍ ఇంనితరా హుయు. 12 జమీన్ గాహ్క్నా, ఇనుయినూ జాత్‍ ప్రకార్‍ బింజోలా దేయ్తె ఝాడా, ఇనుయో జాత్‍ ప్రకార్‍ ఇవ్నమా బింజోల ఛాతే ఫల్ను ఝాడా పుట్టమా యో అష్యల్‍కరి దేవ్‍ దేఖ్యొ. 13 రాత్బి వ్హానె హువమా తీన్మను ధన్‍హుయు. 14 దేవ్‍ "వ్హానెనా రాత్‍నా అలాదుహోనుతిమ్‍ ఆకాష్‍ను దివ్వొ హువదా కరి బోలమా, యో వహఃత్‍ను, ధన్‍, వరహ్ః, హాఃనద్నితర ర్హాషె, 15 జమీన్నా ఉజాళు దేవనటేకె యో ఆకాష్‍మా దివ్వొతరా ర్హాను కరి బోల్యొ" ఇమ్మస్‍ హుయు. 16 దేవ్‍ యో బే మోటు దివ్వొనా, కతో వ్హానెన యేలనటేకె సూర్యుడ్నా రాత్న యేలనటేకె చంద్రమా అజు సిఖ్కుర్‍నాబి కర్యొ. 17 యో జమీన్ ఉజాళు దెవ్వానటేకె ఆకాష్‍ఫర్ దివ్వొనా కర్యొ. 18 వ్హానెన రాత్న యేలనటేకె ఉజాళునా అంధారనా అలాదు కరనటేకె దేవ్‍ ఆకాష్‍ను కుల్లా దివ్వొనా రాక్యొ. యో అచ్చుకరి ర్హహిగొ. 19 హాఃమ్జెబి, వ్హాను హువమా ఛార్మను ధన్‍ హుయు. 20 దేవ్‍ జాన్ ర్హయీన్‍ నాహాఃతె జీన్వార్ ఘణు ఉగ్జావను హువదా, జాన్వార్‍ జమీన్‍ఫర్‍ ఆకాష్‍ను కుల్లాను ఉప్పర్‍ ఉఢను హువదా కరి బోల్యొ. 21 దేవ్‍ పాణిమా ఇను ఇను జాత్ను ప్రకార్‍ పాణి జాహాఃత్ పేదాయిన్ మోట్టు మాస్లాన, జాన్‍ ఛాతే ఇవ్నా హాఃరనా, ఇను ఇనూ జాత్ను ప్రకార్‍ ఫాక్డి ఛాత్‍ హార్యేక్‍ జాన్వార్‍ బణాయో. యో ఇనా అచ్చుకరి ర్హహిగొ. 22 దేవ్‍, తుమె భడ్డిన్‍ ఘణు హుయిన్ ధర్యావ్‍ను పాణిమా భరాయిన్ ర్హావో, జిన్వార్‍ జమీన్‍ఫర్ ఫైలావ్ను కరి బోల్యొ, ఇవ్నా ఆషీర్వాద్‍ దిదొ. 23 హాఃజేబి వ్హానె హువమా పాచ్మను ధన్‍హుయు. 24 దేవ్‍ "ఇను ఇను జాత్ను ప్రకార్‍ జాన్ ఛాతె ఇనా, కతో ఇను ఇను జాత్‍ ప్రకార్‍ గయ్యేవ్నా, కీడునా, జాఢిను జాన్వార్‍ జమీన్‍ మాతు ఫైదహువదా కరి" బోల్యొ. ఇమ్మాస్‍ హుయు. 25 దేవ్‍ ఇను ఇను జాత్ను ప్రకార్‍ జాఢిను జాన్వార్‍ ఇను ఇను జాత్‍ను ప్రకార్‍ జిన్వార్‍, ఇను ఇను జాత్‍ను ప్రకార్‍ జమీన్‍ ఫర్‍ నాహఃతె హర్యేక్‍ కీడునా కర్యో. యో ఇనా అష్యల్‍తరా దేఖ్కాయు. 26 దేవ్‍ అమ్‍ బోల్యొ. అప్ను రూప్‍మా అప్ను పోలికమా అద్మినా కరియే. ధర్యావ్‍మా మాస్లాను ఆకాష్‍మా జిన్వార్న జమీన్‍ పర్‍ హర్యేక్‍ జిన్వార్‍ ఫర్ యేల్కరి బోల్యో. 27 దేవ్ను ఇను రూప్‍మా అద్మినా బణాయో; దేవ్ను రూప్‍మా ఇనా బణాయో; బాయికోని తర మర్దామనో తార ఇవ్న బణాయో. 28 దేవ్ ఇవ్నా ఆషీర్వదించో కింకతో తుమె భఢీన్‍ ఫైలాయిన్‍ జమీన్‍ భరాయిన్‍ ఇనా కోండిలెవొ. ధర్యావ్ను మాస్లాన ఆకాష్‍ను జిన్వార్‍నా జమిన్ పర్ నాహ్ఃతి హర్యేక్ జాన్వార్నా యేలొకరి దేవ్ ఇవ్నేతి బోల్యొ. 29 దేవ్‍ హాదేక్‍ జమీన్‍ఫర్‍ ఛాతె బింజోళ దేయ్తె హర్యేక్‍ ఝాడ, బింజోళ ఫల్ దేయ్తె హర్యేక్ ఝాడనా తుమ్నా దిదో. యో తుమ్నా ఖాణు హుసె. 30 జమీన్‍ ఫర్‍ ఛాతె జాన్వార్‍ హాఃరనబి ఆకాష్‍ఫర్‍ నాహ్ఃతే హాఃరు జాన్వార్ హాఃరన హార్యు ఝాడా ఖాణు హుసేకరి బోల్యొ. ఇమ్మస్ హుయు. 31 దేవ్‍ యో కర్యోతె హాఃరుబి కర్యొతెదె యో ఘణు అష్యల్ థూ. హాఃజేబి వ్హానెబి హువమా ఛొమ్మను ధన్‍ హుయు.