1 షీనారును రాజోహుయోతే అమ్రాపేల్‍, ఎల్లాసరును రాజోహుయోతే అర్యోకు, ఏలామును రాజోహుయోతే కదొర్లాయోమెరు, గోయీయుల్ రాజోహుయోతే తిదాల్‍ కరి ఇవ్ను ధన్మా 2 ఇవ్నే సొదొమా రాజోహుయోతే బెరాత్‍తి, గొమొర్రా రాజోయోతే బిర్షాతి, అద్మారాజోహుయోతే షినాబ్‍తి, సెబోయీయుల్‍ రాజోహుయోతే షెమేబెరుతి, సోయరనా బెలరాజోతి లడ్డాయ్‍ కర్యా. 3 అవ్నేహాఃర ఖారు ధర్యావ్‍హుయుతే సిద్దీంమా ఘాఠిమా మల్యా. 4 భార వరహ్ః కదోర్లాయోమెరునా హేట్ రాహిన్. తేరమాను వరహ్ః ఫాఛు ఫర్యా, 5 ఛౌదా వరహ్ః కదొర్లాయోమెరునా ఇనాకెడే ఛాతే రాజాబి ఆయిన్‍ అష్తారోత్‍ కర్నాయిమా రెఫాయీయుల్నా హాముమా జూజీయుల్నా షావే కిర్యతాయిలో బల్డోమా, 6 ఏమీయుల్న మార్యా. అజు హోరీయుల్నా జంగాల్ హాఃదేఛాతే ఏల్పారాను తోడి రేపటిన్ షేయీరును ఫ్హాడ్‍ జోగోమా ఇవ్నా మార్యా. 7 ఫరిన్‍ కాదేషను నామ్ ఛాతె ఏన్మిష్పతుకు ఆయిన్‍ అమాలేకీయుల్‍ దేహ్‍ఃహాఃరు హససోన్‍ తామారుమా ర్హాయతే ఇవ్నా అమోరీయుల్నాబి మార్యా. 8 తెదే సొదొమ రాజన గొమొర్రారాజోన అద్మా రాజోన సెబోయీమ్‍ రాజోన సొయరన కరి బెల రాజోన నికిలిన్‍ సిద్దీమ్‍ ఘాఠిమా ఇవ్నేతి, 9 కాతో ఏలామ్‍ను రాజోహుయోతే కదొర్లాయోమెర్‍, గోయీయుల్‍ను రాజోహుయోతే తిదాల్‍, షీనార్‍ను రాజోహుయోతే అమ్రాపేల్‍, ఎల్లాసర్‍ను రాజోహుయోతే అర్యోక్‍ కరి ఛార్‍జాణతి యో ఫాచ్‍జాణ రాజా లడ్డాయ్‍ కర్యా. 10 యో సీద్దీమ్‍ ఘాఠిమా ఘాను మాట్టిను ఢామర్ గుంటో థూ. సొదొమ గొమొర్రాల్‍ రాజా మీల్తాహుయిన్‍ ఇన్మా పడిగా. బచ్చుతె ఇవ్నే ఫ్హాడ్‍ఫర్‍ మిలయిల్దా. 11 తెదే ఇవ్నే సొదొమ గొమొర్రాల్‍ను ఆస్తి హాఃరు అజు ఇవ్ను ఖాణును రాఛ్చు హాఃరు లీన్‍గాయా. 12 అజు అబ్రామ్‍ భైను ఛీయ్యోహుయోతే లోతు సొదొమా కాపురమ్‍ థో అనటేకె యో ఇను ఆస్తినా లీన్‍గయా 13 చుఖాయోగాతే ఏక్జాణొ అయిన్‍ హెబ్రీయుడుహుయోతే అబ్రామ్‍నా యో వాత్‍ బోల్యో. తెదే యో ఎష్కోలు భైయే ఆనేరు భైయ్‍హుయోతే మమ్రే కరి అమోరీయునా ఏలోన్‍ బాగ్మా ర్హాయథా. అవ్నే అబ్రామ్‍తి నిబంధనా కర్యాతెవాల. 14 అబ్రామ్‍ ఇను భైయ్‍హుయోతే ధర్హాయోగోతే హాఃజిన్‍ ఇను ఘేర్మా పేదాయిన్‍, ఇనాకన షిక్చాన లిదుతె తీన్‍హోః అఠార అద్మి కెడేలిన్‍ యో రాజోనా ఓడించా. 15 రాత్నుటేపార్‍ యో ఇను దాసుల్నా గళో కరిన్ యో రాజో ఫర్ లడ్డాయి కర్యా, ఇవ్నా మరిన్‍ దమస్కునా ఢవాత్‍ బణే హోబాతోడి రేప్టయా 16 ఆస్తి హఃరు ఫరిన్‍ లయిన్‍ ఇనా మయామత్ర హుయోతె లోతునా ఇనా ఆస్తీనా బాయ్కోన జనాభో ఫరిన్‍ లీన్‍ ఆయా.

17 యో కదొర్లాయోమెరున్‍ ఇనాకెడే ఛాతే రాజోనా ఓడించిన్‍ ఫరిన్‍ ఆయాతెదే సొదొమ రాజో ఇనా దేఖిలేవాన, రాజుఘాఠి కరి షావే ఘాఠి బణె జాయిన్‍ ఆయా. 18 అజు షాలేమ్‍ రాజోహుయుతే మెల్కిసెదెన రొట్టానా ద్రాక్చారసమ్‍నా లీన్‍ ఆయో. యో సర్వోన్నతుడుహుయోతే దేవ్ను యాజకుడ్‍. 19 తెదె యో అబ్రామ్‍నా ఆషీర్వదించిన్‍ ఆకాష్‍నా జామిన్‍నా సృష్టికర్తహుయోతే మహాన్‍హుయోతే దేవ్నువల అబ్రామ్‍ ఆషీర్వదించాద కరి, 20 తారు వైరినా తారు వాత్‍ అప్పగించిన్‍ మహాన్‍హుయెతే దేవ్‍ స్తుతింబడదా కరి బోల్యో. తెదే యో హాఃరమా ఇనా ధహ్‍ఃమాను భాగ్‍ దిదో. 21 సొదొమ రాజో అద్మియేనా మన దిదోతే ఆస్తినా తుస్‍ లీలకరి అబ్రామ్‍తి బోల్యో. 22 అబ్రామ్‍ మేస్‍ అబ్రామ్‍నా ఫైసావాలమ్‍తార కర్యో థూ బోలకొయిన్తిం ఏక్‍ నూల్‍ పొగుహుయుతే బోలవాలహుయిన్‍ తారుమా కెవుబి లీలిస్ కొయినికరి 23 ఆకాష్‍నా జామిన్నా సృష్టికర్తహుయోతే మహాన్‍హుయోతే దేవ్‍హుయోతే యెహోవాన హాఃమే మారు వాత్‍పడిన్‍ సాపత్ కరుకురుస్. 24 హుయుతో ఆ కవ్వరావాల ఖాద్యాదే తప్ప, మారకెడే ఆయాతే ఆనేర్‍, ఎష్కోల్‍, మమ్రే కరి ఇవ్నా కేవు భాగ్‍ ఆవ్నుకరి యో భాగ్‍ కెవల్ ఇవ్నా లీన్ జవోకరి సొదొమ రాజోతి బోల్యో.