Gênesis 30

యాకోబ్ లాబాన్నా మొకల్కరి పుచ్చావను

1 రాహేలు యాకోబ్తి ఇనా లఢ్కా నాహువమా దేఖిన్‍ ఇను భేన్ ఫర్‍ కుల్లు పఢీన్‍. యో యాకోబ్తి "మన బేజిణి కర్‍. నార్హాయితో మే మర్జైస్‍" కరి బోలి. 2 యాకోబ్‍ ‍రాహేల్‍ ఫర్‍ ఖీజ్‍ ఖాద్యొ. యో "తున బేజిణి దెవ్వాకొయినితిమ్‍ ఛాతె దేవ్ను జొగొమా ఛౌవ్నా?" కరి బోల్యొ. 3 అనటేకె యో "మారు కామ్‍ కరవాలి బిల్హా ఛా కొయిన్నా, ఇనేతి రాత్‍ ర్హా. యో మారటేకె లఢ్కాన జణ్సే. అమ్‍ ఇంనితరా యో బరెమా మనబి లఢ్కా హుసే" కరి బోలిన్‍ 4 ఇని కామ్‍ కరవాలి బిల్హానా ఇన బావణ్‍ తరా దిదీ. యాకోబ్‍ ఇనేతి హుఃత్యో. 5 తెదె బిల్హా బేజిణి హుయిన్‍ యాకోబ్నా ఏక్‍ ఛియ్యాన జణి. 6 తెదె రాహేలు "దేవ్ మన న్యావ్‍ కర్యొ. యో మారు ప్రార్థనా హాఃమ్జిన్‍ మన ఛియ్యానా దిదొ" ర్హహిజైయిన్‍ ఇనా "దాను" కరి నామ్‍ మేంది. 7 రాహేల్‍ కామ్‍ కరవాలిహుయితె అజు బేజిణి హుయిన్‍ యాకోబ్నా బేమ్మాణు ఛియ్యో జణి. 8 తెదె రాహేల్‍ "దేవ్ను కృప విషయంమా మారి బేన్తి లడ్డాయి కరీన్‍ జీతి" కరి ర్హాహిజైయిన్‍ నప్తాతి కరి నామ్‍ మ్హేంది. 9 లేయా ఇనా లఢ్కనా జణను ఉబ్రగు దేఖిన్‍ ఇను కామ్‍ కరవాలి జిల్పానా లీలిన్‍ యాకోబ్నా ఇనా బావణ్‍ తరా దిదీ. 10 లేయా దాసిహుయితె జిల్పా యాకోబ్నా ఛియ్యో జణిమా. 11 తెదె లేయా "ఆ అదృష్టమ్‍ కాహేనా" ర్హహిజైయిన్‍ ఇనా గాదు కరి నామ్‍ మ్హేంది. 12 లేయాను కామ్‍ కరవాలి జిల్పా యాకోబ్నా బేమ్మాను ఛియ్యానా జణమా. 13 లేయా "మే ధన్యరాల్‍ వాలి. బాయికా మన ధన్యరాల్‍ వాలి కరి బోల్సె కాహేనా" కరి ఇనా ఆషేరు కరి నామ్‍ మ్హేంది. 14 ఘౌవ్ను వాడను ధన్మా రూబేను జైయిన్‍ ఖేతర్మా లఢ్కవ్‍నా ఫైదాతె ఫల్‍ ఝాడాను దేఖిన్‍ ఇనో ఆయా లేయానా లాయిన్‍ దిదో. తెదె రాహేలు "తారొ ఛియ్యా లాయోతే జాదును ఝాడ్‍ థోడు మన ధా" కరి లేయాతి బోలి. 15 ఇన యో "మారో భావ్రినా లీలిది కోయిన్నా, యో బైయిస్‍ కోయిన్నా? హాంకె మారొ ఛియ్యో లాయోతె ఝాడ్యూబి లీలేస్నా" కరి బోలి. అనటేకె రాహేల్‍ "ఇంహుయతో తారొ ఛియ్యో లాయోతె ఝాడ్‍తో తారొ బావ్రి ఆ రాత్‍ తారేతి ర్హాసే" కరి బోలి. 16 యో హాఃమ్జే యాకోబ్‍ ఖేతర్‍ మతూ ఆయోతెదె లేయా ఇనా హాఃమ్మే జైయిన్‍ "థూ మారకన ఆవ్ను. మారొ ఛియ్యో లాయోతె జాదు మంత్రను ఝాడ్‍తి తునా లీదొ" కరి బోలి. అనటేకె యో రాత్‍ ఇనేతి ర్హయో. 17 దేవ్‍ లేయా ప్రార్ధనా హాఃమ్జో, యో బేజిణి హుయిన్‍ యాకోబ్‍ ఫాచ్మను ఛియ్యో జణీ. 18 లేయా " మే మారి బావ్రినా మారి కామ్‍ కరవాలి దెవ్వమా బారెమా దేవ్ మన ప్రతిఫల్‍ దిదో" ర్హహిజైయిన్‍ ఇనా "ఇష్షాఖారు" కరి నామ్‍ మ్హేంద్యొ. 19 లేయా బుజు బేజిణి హుయిన్‍ యాకోబ్‍నా ఛోమ్మాను ఛియ్యోనా జణీ. 20 తెదె లేయా "దేవ్‍ మన అష్యల్‍ బహుమాన్‍ దిదొ. మారు బావ్రినా ఛో ఛియ్యా జణీ. అనటేకె యో అజు మారేతి కాపురమ్‍ కర్సే" ర్హహిజైయిన్‍ ఇనా "జెబూలూన్‍" కరి నామ్‍ మ్హేంది. 21 ఇనబాద్మా యో ఏక్‍ ఛోరినా జణి ఇనా దీనా కరి నామ్ మ్హేంది. 22 దేవ్‍ రాహేలు హాఃయాల్ కరిన్‍, యో ప్రార్ధనా హాఃజిన్‍ యో పేట్‍నా కాడ్యో. 23 తేదె యో బేజిణి హుయిన్‍ ఛియ్యానా జణీ "దేవ్‍ మారు ఇంజామ్నా కాడ్యొ" ర్హయిగి. 24 అజు యో "యెహోవా మన అజు ఏక్ ఛియ్యో దిసేకరి" ర్హయిజైయిన్‍ ఇనా "యోసేపు" కరి నామ్‍ మేంది.

యాకోబ్ లాబాన్న మన బోలిమొక్లదా కరి బోలను

25 రాహేల్‍ యేసేపునా జణితే బాద్మా యాకోబ్‍ లాబాన్నా "మన బోలిమొక్లిదా. మారు జోగో, మారు దేహ్‍ః పరీన్‍ జైయిస్. 26 మారి బావణేనా, మారు లఢ్కావ్నా మన దెవ్వాడ్‍; తెదె మే ఛలోజావ్స్, ఇవ్నటేకె తున సేవ కర్యో. మే సేవ కింకర్యోకి తున మాలం కోయిన్నా" కరి పుఛ్చాయో. 27 అనటేకె లాబాన్‍ ఇనేతి "తారు గోర్‍ మారఫర్‍ ర్హాయుతో మారు వాత్‍ హాఃమ్జ్. తూన బట్టి యెహోవా మన ఆషీర్వాదించోకరి మే పస్తీ దేఖిన్ మాలంకర్యొ కరి బోల్యొ. 28 తారు జీతమ్‍ ఆత్రుకరి మారేతి బోల్, ఆ తునా దీస్‍" కరి బోల్యొ. 29 అనటేకె యాకోబ్‍ ఇనా దేఖిన్‍ "మే తునా కిమ్‍ సేవ కర్యోకి, తారు మందనా మారకన కిమ్‍ థూకి యో తున మాలంమస్‍; 30 మే ఆవ్వకొయింతె అగాఢి తున థూతె తోడుస్‍, హుయుతో యో ఘణూ భడ్డాయిన్‍. మే ఫంజో మేంద్యోతె జొగొ యెహోవా మన ఆషీర్వాదించుకరాస్‍. హుయుతో మే మారు హాఃదును ఘేర్ను వాలనటేకె కెదేబి కమాయ్‍ లీస్‍?" బోల్యో. 31 తెదె లాబాన్‍ "మే తూన సాత్‍ దేను?" కరి పుచ్చా వ మా. అనటేకె యాకోబ్‍ "థూ మన సాత్బి నొకొ ధా, థూ మారటేకె మే బోల్యొతిమ్‍ కర్యొతో, మే ఫరీన్‍ తారు మందనా ఛరాయిస్ ఇన అష్యల్తి దేఖిస్‍. 32 ఆజ్‍ మే తారు మంద హాఃరమా ఛరాయ్‍లీన్‍ దేఖిన్‍ పోడోహుయుతే మచ్చహుయుతే ఛాతే హార్యేక్‍ మేంఢా మేంఢాను లడ్కానా కాలో హార్యేక్‍నా, బోక్డిమా మచ్చహుయుతే, పోడోహుయుతే ఛాతేఇనా ఆలాదు కరిస్‍ యో జాత్ను మన జీతమ్‍ హుసే. 33 అన అగాఢి మన ఆవ్వనుతే జీతమ్‍ బారెమా థూ దేఖ్కన ఆయోతెదె మారు న్యాయంను ఛాలస్‍ మన సాబుత్‍ హుసే; బోక్డిమా మచ్చల్‍ కొయింతే, మేంఢాను లఢ్కా కాళు కొయిన్తే మారకన ర్హయుతో మే ఛోర్ కర్యోకరి బోలజాయ్‍" కరి బోల్యొ. 34 అనటేకె లాబాన్‍ "అష్యల్‍, తారు వాత్ను ప్రకార్‍ హువ్వాదా" బోల్యొ. 35 యో ధన్‍ లాబాన్‍ చారల్‍, మచ్చల్‍ ఛాతె మ్హేంఢయేనా, మచ్చల్నా ఛాతే టైండా బోక్డియేనా థోడు దోలు ఛాత్‍ హార్యేక్నా మ్హేంఢను చేల్కు ఖాలోనా హాఃరనా ఆలాదు కరీన్‍ ఇనా ఛియ్యా దిదో. 36 ఇనా యాకోబ్‍నా ఇఛ్మా తీన్‍ రోజ్ ప్రయాణమ్‍ హాఃరు దూర్‍కరీన్‍. లాబాన్నా హుయుతే మిగిలుతే మందనా యాకోబ్‍ ఛార్‍రావ్తో థో. 37 యాకోబ్ గంగ రావి, బాదమ్, సాల ఝాడ లీలా యో చువ్వల్మా దోలుచారల్ దేఖ‍వ్వాతిమ్‍ ఎజ్గాఎజ్గా ఇనా ఛోల్టో ఛోల్యో. 38 మందల్‍ పాణి పీయ్యాన ఆయోతెదె యో చూలు బదనటేకె యో యో ఛోల్యొతే చువ్వల్న మందల్‍ పీయ్యాన ఆవ్వతే నాలీమా, పాణి గుంఠొమా, ఇనమా అగాఢి మ్హేంద్యొ. 39 తెదె యో గళ్లొ యో చువ్వలను అగాఢి బయిస్‍ పొడహుయూతె, మచ్చల్‍ ఛాతె లఢ్కాన జణీ. 40 యాకోబ్‍ యో మ్హేంఢా చెల్కా అలాదు కరీన్, చారల్‍ ఛాతె ఇన బణే, లాబాన్‍ మందమా కాళొ ఛాతె ఇన బ్హణే మందల్ను మోఢు ఫరాయిన్ ఇను గళ్లొను లాబాను గళ్లొమా రావకొయిని తిమ్‍ ఇన అలాదు రాఖ్యొ. 41 మందమా తాహఃత్ చూలు బంద్యూతెదే యో యో చువ్వల్ అగాఢి చూలు బాంద్యుతె తిమ్ యాకోబ్ గళ్లొనా హాఃమె నాలిమా యో చువ్వల్న మ్హేంద్యొ. 42 గళ్లొ కంజోర్ హుయుతెదె మేంద్యు కొయిని. ఇమ్నితరా కంజోర్ హుయుతె లాబాన్నా థాహాఃత్ ఛాతె యాకోబ్న ఆయు. 43 యో అమ్నితర యో అద్మి ఘాణు భడీన్ హుయిన్ ఘణూ గళ్లో, కామ్కరవాళు, ఊట్యే, ఘదేడా వాళొ హుయో.