Gênesis 20

అబ్రాహామ్, అబీమెలెక్

1 అబ్రాహామ్‍ ఎజ్గాతు నికిల్‍ దక్చణదేహ్‍ఃనా బణే గయో. ఇమ్‍ కాదేషునా, షూరుకూ ఇచ్మా ఛాతే జొగోమా ర్హాయోతో. తోడుధన్‍ గెరారుమా థో. 2 ఎజ్గా అబ్రాహామ్‍ ఇను బావణ్‍ సారాను గూర్చి "యో మారి బేన్‍" కరి బోల్యో. అనటేకె గెరారు రాజోహుయుతే అబీమెలెల్నా సారా టేకె ఇను అద్మియే బోలిమొక్లో. ఇవ్నే సారానా అబీమెలెల్‍ ఘెర్మా మేంద్యా. 3 పన్కి దేవ్‍ రాతే హుఃణేమా అబీమెలెల్‍ ఖాందే దేఖాయిన్‍ ఇనేతి "దేఖ్‍, తూ మర్జావతిమ్‍ మాస్‍ సానకాతో తూ తారు ఘెర్మా రాకిరాక్యోతే బాయికో ఎక్‍ అద్మినా బావణ్" కరి బోల్యొ. 4 హుయుతో అబీమెలెల్నా ఇనా కన గాయాకొయిని. అనటేకె యో "ప్రభూ అజత్ని నీతినా మరాఖి దీస్నా? 5 ‘యో మారి బేన్‍’ కరి మారేతి యో బోల్యొ యోబి ‘యో మారో భై’ బోలి. మే మార హాతేతి కేవు హాఃరబ్‍ కర్యోకొయిని. హాఃచ్ఛితిస్‍ యో కమ్‍ కర్యో" కరి బోల్యో. 6 అనటేకె దేవ్‍ ఇనా హుఃణెమా దెఖ్కాయిన్‍ "హో, థూ అష్యాల్ను దిల్తి ఇనా కర్యోకరి మన మాలం. థూ మన విరోధమ్‍తి పాప్‍ కర్యోకోయిని తూన ఉబ్రా రాక్యొ. అనటేకె మే తునా ఇనా చీమ్మనటేకె అనుమతిమ్‍చో కోయిని. 7 అనటేకె యో అద్మి బావణ్ ఫరిన్‍ ఇనా దినాదా. సానకాతో యో ప్రవక్త. థూ జీవతిమ్‍ యో తారటేకె ప్రార్థనకర్చె. ఎక్తార థూ ఇనా ఫరిన్‍ ఇనా నాదిదోతో థూ, తారు అద్మియే తప్పక మరిజాసే. ఆ వాత్‍ థూ అష్యాల్‍ మాలంకర్లా" కరి బోల్యొ. 8 వ్హాణే హువకోయిన్తే అగాడిస్‍ అబీమెలెల్నా ఉట్టిన్‍ ఇను సేవకుహాఃరనా బులయిమాంగ్యో. ఇవ్నా ఆ వాత్ హాఃరు మాలంకర్యో. ఇవ్నే హాఃర యో హాఃజీన్‍ ఘాణు ఢర్యా. 9 అబీమెలెల్నా అబ్రాహామ్‍నా బులాయిన్ మంగాయిన్‍. ఇనేతి అమ్‍ బోల్యో "తూ హామ్నా కర్యోతే సాత్‍? మార ఫర్‍ మారు రాజ్యమ్‍ పార్‍ కెత్రు మోటు దోషమ్‍ అవ్వానుతరా కర్యొ. మే తునా కర్యోతే హాఃరబ్‍ సాత్‍? మార ఫర్‍ కర్యోకోయిన్తే కామ్‍ కర్యో" బోల్యో. 10 అబీమెలెల్నా అబ్రాహామ్‍నా దేఖిన్‍ "థూ అమ్‍ కరనా కారణం సాత్‍?" కరి పుఛ్చాయో. 11 అబ్రాహామ్‍ "అజ్గా దేవ్ను ఢార్‍ అష్యాల్‍ కోయిని అనటేకె మారి బావణ్‍నటేకె మన మరదిసేకరి ఢార్తి మే అంకర్యో. 12 ఆ కాహేతిమ్‍ యో మన బేన్‍ కరి వాత్‍బి హాఃచ్చిస్‍. యో మార భా ఛోరి. ఆయాని ఛోరి కాహే. ఇం మన బావణ్‍ హుయి. 13 దేవ్‍, మే మార భా ఘేర్నా మేందిన్‍ కెత్రుకి జోగోమా జావనా బులయితేదే మే ఇనేతి ‘అప్నే జాసుతే హార్యేక్‍ జోగొమా మన గూర్చి యో మార భై కరి బోల్. మార టేకె తూ కరిస్తే అష్యల్ కామ్‍ ఆస్‍’ కరి బోల్యొ" బోల్యొ. 14 అబీమెలెల్నా మేంఢనా ధండాన దాసుల్నా దాసీల్నా బులయిన్‍ అబ్రాహామ్నా దిదో. బాద్మా ఇని బావణ్‍ సారాను ఇనా దిదో. 15 బాద్మా అబీమెలెల్నా "దేహ్‌ః, మారు దేహ్‍ః హాఃరు తార హఃమే ఛా. తూన కెజ్గా నఛ్చుతో అజ్గ ర్హావజైయి" కరి అబ్రాహామ్‍తి బోల్యో. 16 బాద్మా యో సారాతి "దేఖ్‍, తారో భైయ్నా మే హాజర్‍ రూపు బిల్లా దిదో. థూ అష్యాల్‍ కరి తారేతి ఛాతె హాఃరుజాణు హాఃమే ఆ పైసా సాబుత్‍తార ర్హాసే. హాఃరు హాఃమే తునా న్యాయం హుయు" బోల్యొ. 17 తెదే అబ్రాహామ్‍ దేవ్నా ప్రార్థింమా. దేవ్‍ అబీమెలెల్నా, ఇని బావణ్‍నా ఇనా కామ్కరవాలి అష్యాల్‍ కర్యో. ఇవ్నా లడ్కా జాణ్యు. 18 సానకాతో దేవ్‍ అబ్రాహామ్‍ బావణ్ హుయుతే సారానా బట్టి అబీమెలెల్నా ఘెర్మా బాయికా హాఃరినా పూర్తి గర్భధర్నా బంద్కర్యో.