1 దేవ్‍హుయోతె యెహోవా కర్యొతె జాన్వార్‍మా హాఃరు హాఃప్‍ జిత్తులమారి థూ. యో యోబాయికోతి ఆ హాఃఛ్చినా? ఆ బాగ్‍ మనూ ఝాడు ఇను పండహుయుతో తుమే నాఖానుకరి దేవ్‍ బోల్యొనా? కరి పుఛ్చాయో. 2 అనటేకె బాయికో, ఆ బాగ్మనూ ఝాడను పండవ్నా హామే ఖావజాయ్నా; 3 పన్కీ బాగ్మాను ఇచ్మా ఛాతె ఝాడను పండునా దేవ్‍ తుమే మరకొయినితిమ్‍ ఇనా నాఖాను కరి, ఇనా నా ఛీమ్నుకరిబి బోల్యుకరి హాఃప్‍తీ బోల్యు. 4 అనటేకె హాఃప్‍ తుమే మర్సూష్‍ మర్జాసు కొయిని; 5 కింకతో తుమే ఇనా ఖాద్యతే ధన్‍ తుమారు డోళా ఖొలాయిన్‍, తుమే అష్యల్‍, ఖర్రాబ్‍నా మాలం కరవాలహుయిన్‍ దేవ్నుతరస్‍ ర్హాసుకరి దేవ్నా మాలం హుసెకరి బాయికోతి బోలమా 6 బాయికో యో ఝాడు* ఖాణునా అష్యల్‍కరిబీ, డోళమా కుప్సూరాత్‍ తరాబీ, అక్కల్‍ దేయ్తె కుప్సురాత్ తరా ర్హావమా దేఖ్యా తేదె యో ఇనా పంఢా థోడు లీన్‍ ఖైయిన్‍ ఇనకేడె ఛాతే ఇను బావ్రినా దిదీ, యోబి ఖాద్యో; 7 తెదే ఇవ్ను బేజన డోల ఖోలాయు, ఇవ్నా ఇవ్నే లుంగ్డా కొయినికరి మాలంకరిన్‍ అంజూరను పాలనా సివిలిన్‍ ఇవ్నే లుంగ్డాతరా కర్లిదు. 8 థాండ్నుటేపార్ ఆదామ్‍బి ఇని బాయికో బాగ్మా పారుకురాతే దేవ్‍హుయోతె యెహోవా ఆవ్వాజ్‍నా హాఃజిన్‍, దేవ్‍హుయుతె యెహోవా హాఃమే అవ్వకొయినితిం తోట్నుఝాడ్ను ఇఛ్మా లపిగా. 9 దేవ్‍హుయోతె యెహోవా ఆదామ్‍నా బోలయిన్‍ తూ కెజ్గా ఛా బోల్యో. 10 అనటేకె యో మే తోట్మా తారు ఆవాజ్‍ హాఃజోతెదే లుంగ్డాకోయిన్తిం ఛావ్ అనటేకె ఢారిన్‍ లపిగో. 11 అనటేకె యో "థూ ఉగాఢొ ఛాకరి తున బోల్యుతె కోన్‍ ? తూ నా ఖానుతె ఇనా మే తున అజ్ఞాపించోతే ఝాడను పండనా ఖాద్యొనా?" కరి పుచ్చాయో. 12 అనటేకె ఆదామ్‍ మారకెడె ర్హావనటేకె థూ మన దిదోతే బాయికోస్‍ యో ఝాడను పండా థోడు మన దేవ్వమ మే ఖాద్యొకరి బోల్యో. 13 తేదె దేవ్‍హుయోతే యెహోవా బాయికోతి తూ కరితె సాత్‍కరి పుచ్చావమా బాయికో హాఃప్‍ మన దొఖాదేవామ మే ఖాది.

14 అనటేకె దేవ్‍హుయోతె యెహోవా హాఃప్‍తి తూ ఇనా కర్యోతె పషువుల్ హాఃరమా జామీను జాన్వార్‍ హాఃరమా తూ షపించాబడివాలిహుయిన్‍ తారు పేట్‍తి గాహ్ఃతు తూ జీవిస్తె ధన్తోడి మటి ఖాయిస్‍. 15 అజు తునాబి బాయికోబి తారు హాఃదనా యో హాఃదనా లడ్డాయి కరిస్‍. యో తునా ముడ్‍క్య ఫర్‍ మార్‍సే; తూ ఇనా ఎడి ఫర్‍ మారిస్‍ బోల్యొ. 16 యో బాయికోతి తారు మీన్హాత్ తూ బేజిణిను దారద్న మే తునా ఘాను భడ్డాయిస్‍; దారద్‍తి లడ్కాన జాణిస్‍; తారు బావ్రినుటేకె తునా ఆహ్ః కలగ్సే; యో తునా రాజ్కసేకరి బొల్యో. 17 యో ఆదామ్‍తి థూ తారి బావణ్‍ను వాత్‍ హాఃజిన్‍ నాఖానుకరి మే తునా అజ్ఞాపించోతె ఝాడ్ను పండనా ఖాద్యో అనటేకె తారు నిమిత్తమ్‍ జమీన్‍ షపింపబడ్యురుస్‍; మిన్హాత్తి థూ జీవిస్తే ధన్‍ హాఃరు ఇను హాఃణు ఖాయిస్‍; 18 యో కాఠను డాగ్యే గుచ్చోను డాగ్ తునా పుట్సే; ఖేతార్‍మా పీకాయుతె ఇన ఖాయిస్‍; 19 థూ జమీన్‍నా పరిన్‍ జావతోడి తారు పస్నో చువ్వాడిన్‍ ధాన్‍ ఖాయిస్‍; కింకతో జమీన్‍ మాతు థూ హుయో; థూ మట్టిస్‍ అనటేకె పారిన్ మట్టిహుయిజాస్‍ కరి బొల్యో. 20 ఆదామ్‍ ఇని బావణ్‍నా హవ్వ కరి నామ్‍ మేంద్యో. కింకతో యో జాన్‍ ఛాతే హార్యేక్‍జాణబి ఆయా. 21 దేవ్‍హుయోతే యెహోవా అదామ్‍నా ఇని బావణ్‍నా జాన్వార్ను ఛామ్డాను లుంగ్డా కరయిన్‍ ఇవ్నా పేరయో.

22 తేదె దేవ్‍ హుయోతే యెహోవా హాదేక్‍ అష్యాల్‍ హఃరబ్‍ మాలంకరతిం, ఆదామ్‍ అప్నమా ఎక్ను ఘోనితార హుయో. అనటేకె యో ఎక్తార హత్‍ పహాఃకరిన్‍ జీవడాతె ఝాడ్ను పండబి లీలిన్‍ హమేసా జీవ్సుకరి 23 దేవ్‍హుయోతే యెహోవా యో కేవు జమీన్‍ మాతు హుయోకి ఇను ఖేతార్ వాడికరనటేకె ఏదెను తోట్మామాతు ఇనా బోలిమొకిలిదో. 24 తేదె యో ఆదామ్‍నా బోలిమొకిలిన్ ఏదెను తోట్నా ఓంద్యేను బణే కెరూబుల్నా , జీవ ఝాడ్‍ను జావను వాట్‍మా కావలి ర్హావనటేకె ఇమ్‍ అమ్‍ ఆగ్ థాల్‍వార్నా ఉబ్బారి రాఖ్యో.