Gênesis 13

అబ్రామ్ అజు లోతు అలగ్ హువ్వను

1 అబ్రామ్‍ ఇనా హుయుతే హాఃరు ఇని బావణ్‍ ఇనా కెడేఛాతే లోతున కెడేలిన్‍ ఐగుప్తుమాతు నెగెబునా గాయో. 2 అబ్రామ్‍ రూపు, ఘేణు, దంఢాహుయిన్ ఘాణు దవాలత్‍ వాలో హుయో. 3 యో ప్రయాణమ్‍ కర్తో మరణ్‍పక్తి మాతు బేతేల్‍తోడి, కాతో బేతేల్‍బి హాయికి ఇచ్మాఇను అగాడి ఢేర ఛాతె జోగొన గాయో. 4 యో అగాడి బలిపీఠమ్నా బంద్యెతే జోగో గాయో. ఎజ్గా అబ్రామ్‍ యెహోవా నామ్‍ ఫర్‍ ప్రార్ధన కర్యో. 5 అబ్రామ్‍నా కెడే ఆయుతే లోతునా మేంఢా, పషువుల్, డేరాబి థో. 6 ఇవ్నే మలిన్‍ ర్హావనటేకె యో జోగో పుర్యోకొయిని; సానకాతో ఇవ్ను ఆస్తి ఇవ్నే మాలిన్ ర్హావనహువకోయిన్తే ఏత్రే ఘాణు థూ. 7 తెదే అబ్రామ్‍ ధండా చారవాలో లోతు ధండా చారవాలో ఇచ్మా లడ్డాయే హుయుఆ. యో ధన్మా కనానీయుల్‍, పెరిజ్జీయుల్‍ యో జోగోమా ఇవ్నే ర్హాయతా. 8 అనటేకె అబ్రామ్‍ "అప్నే మాయమాత్రా అనటేకె మన తూన, మారు ధండా చారవాళు తారు ధండా చారవాళు లడ్డాయే నార్హాను. 9 ఆ జోగొహాఃరు తారు హాఃమే ఛానే, మన మేందిన్ అలాదుహుయిన్‍ ర్హా. తూ ఢావాత్‍ బణే గాయోతో మే హాఃవాత్‍ బణే, తూ హాఃవాత్‍ బణే గాయోతో మే ఢావాత్‍ బణే జైయిస్‍కరి" లోతుతి బోలమా. 10 లోతు యొర్దాన్‍ జోగో హాఃరు దేఖ్యో. యెహోవా సొదొమ గొమొర్రా కరి నంగార్‍ నాషనమ్‍ హువకొయిన్తే అగాడి సొయరుతోడి అవ్వాతోడి హాఃరుబి యెహోవా బాగ్‍తరా ఐగుప్తు దేహ్‍ఃతార పాణి చాల్తూ దేహ్‍ఃతర ర్హాయు. 11 అనటేకె లోతు ఇనా యొర్దాన్‍ జోగో హాఃరు చుణిలిన్ ఓంద్యే బణే నికిలిగో. అం ఇవ్నే ఏక్నాఏక్‍ అలాదు హుయిగా. 12 అబ్రామ్‍ కనానుమా ర్హాహిన్‍. లోతు యో బల్డోఛాతే నంగార్మా జోగో ర్హాయిన్‍ సొదొమ హాఃదే ఇను ఢేరో న్హాక్యో. 13 సొదొమ అద్మియే హాఃరబ్ వాలో, యెహోవా డోళమా ఘాను పాప్‍వాల హుయిన్‍ థా.

అబ్రామ్ హెబ్రోనున జావ్వను

14 లోతు అబ్రామ్‍నా మేందిన్‍ గాయోతెదే బాద్మా యెహోవా హాదేక్ థూ ఛాతే జోగోకంతు ఛార్ బజు దేఖ్‍. 15 సానకాతో తూ దేఖ్కురతే ఆ దేహ్‍ఃహారుబి తూనబి తారు ఖాందన్‍ హామేసా తరా దిస్‍. 16 అజు తారు హాఃదన్‍ జమీన్‍ఫర్‍ ర్హాహితే రేతిను కాక్రియేనితరా భడ్డాయిస్‍; కింకాతో ఏక్జాణు జమీన్‍ఫర్‍ ర్హాహితే రేతిను కాక్రియేనా ఘణితో తారు హాఃదన్నాబి ఘణజైయ్. 17 తూ ఉట్టిన్‍ ఆ జోగోమా హాఃరు ఫరిన్ దేఖ్; యో తూన దేవ్వాయురుస్‍ కరి అబ్రామ్‍తి బోల్యో. 18 తెదే అబ్రామ్‍ ఇను ఢేరో కాడిన్‍ హెబ్రోనుమా మమ్రే హాఃదే ఛాతే సింధూరతోట్‍ ఉత్రిన్‍ ఏజ్గా యెహోవాన బలిపీఠమ్‍ బంద్యో.