1 బే వరహ్ఃనా బాద్మా ఫరోనా ఏక్ హోఃణె ఆయు. ఇనమా యో నైలు నదీ హాఃమే ఉబ్రీన్‍ ర్హావమా. 2 అష్యల్తి ఛాతే హాఃత్ గాయ్యే నైలు నదిమతూ ఉప్పర్ ఆయిన్ ఆర్యూ గాహ్ః చరుకురాస్. 3 ఇనా బాద్మా అష్యల్ కొయిన్తె, హుఃకాయుగుతె హాఃత్ గాయ్యే నైలు నదిమాతు ఉప్పర్ ఆవ్తూహుయీన్‍ యో గాయ్ హాఃడక్ నదీనా కనరినా ఉబ్రు. 4 తెదె కంజోర్ హుయుతే హుఃకాయుగుతే గాయ్ అష్యాల్తి ఛాతే గాయ్నా మారిన్ ఖాయ్గు. ఇనేతే ఫరో నిందర్మారు ఉట్యో. 5 యో హుఃయిజైయిన్ బేమ్మాను హోఃణే లీదో. ఇన్మా అష్యాల్ను హాఃత్ కంకి ఛాతే మోల్కో ఉపార్ అయు. 6 అజు ఓంద్యేను వ్యారోన వల హుఃకాయుగుతే హాఃత్ కంజోర్ హుయుతె కంకి ఇన్మా యో పుట్యు. 7 తేదె భరాయుగుతే యో హాఃత్ కంకి యో కంజోర్ కంకి గాలీల్దు. ఎత్రమాస్ ఫరో ఉట్టిన్ ఆ హుఃణే కరి మాలంకరిలీదో. 8 వ్హానేహాఃత్రే ఇను దిల్మా బెజార్ హుయు అనటేకె యో ఐగుప్తు జాదుగర్ వాలన ఎజ్గాను పండితుల్నా హాఃరనా బులయిన్ ఇను హోఃణేనా బారెమ బోల్యొ పన్కి ఫరోనా ఇను అర్ధమ్ బోలవాలో కోన్బి కోయిని. 9 తెదె గిన్ని దేవ్వాలో నాయకుడ్ "ఆజ్ను ధన్ మారు గాలత్ హాఃయల్ ఆయు. 10 ఫరో ఇను సేవకుల్ ఫర్ ఖీజ్ ఖైయిన్ మన రోట్టా కరతే నాయకుడ్నా రాజొ కామ్ కరవాళు అధిపతి ఘేర్మా కావలిమా రాక్యో. 11 ఎక్కస్ రాత్ మేబి యో హోఃణె లీదా. ఏక్నయేక్ జణా అలాదు అలాదు అర్థామ్తి హోఃణె లీదా. 12 ఎజ్గా రాజొనా కావ్లివాళు సేనాధిపతినా సేవకుడ్నితరా ఛాతె ఏక్ హెబ్రీ కవ్వారు ఛొగ్రు హామారె కేడె ఛా. ఇనేతి హామారు హోఃణమా హామె బోల్యతే యో ఇను అర్థంన హమ్నా బోల్యొ. 13 యో హామ్నా సాత్ బోల్సకి ఇను ప్రకారస్ హుయు. మారు ఉద్యోగమ్ మన అజు దేవ్వడ్యొ అలాదనా ఉరి నాఖయో" కరి ఫరోతి బోల్యొ. 14 ఫరో యోసేపునా బులయిన్. ఠాణమాతు ఇనా జాల్ది బులవ్. యో కేహ్ః కత్రాయిన్ లుంగ్డా బద్లాయిన్ ఫరో కందే ఆయో. 15 ఫరో యోసేపుతి "మే ఏక్ హోఃణే లీదో. ఇను అర్ధ బోలవాలో కొన్బి కోయిని. థూ హోఃణేనా ఇను అర్ధమ్నా బోలవాలోకరి తారు గురించి హాఃమ్జో" కరి బొల్యొ. 16 యోసేపు "యో మారు వల హుసే కోయిని, దేవాస్ ఫరోన నాచ్చుతే జాబ్ దిసే" కరి ఫరోతి బొల్యొ. 17 అనటేకె ఫరో "మారు హోఃణేమా మేస్ నధిను కానరినా ఉబ్రిరోస్. 18 ఆష్యాల్ హుయుతే హాఃత్ గాయ్ తాలవ్ మాతు ఉపార్ ఆయిన్ గాహ్ః చారుకురస్. 19 కంజోర్తి ఘాణు అష్యాల్ హుఃకయుగుతే అజు హాఃత్ గాయ్ ఇను బాద్మా ఉపార్ ఆయిన్. అనా ఎత్రే వికారహుయుతే ఐగుప్తు దేహ్ఃమా కెజ్గా మన దేఖాయు కోయిని. 20 హుఃకయుగుతె వికారమ్తి ఛాతే గాయ్ అష్యల్ ఛాతే హాఃత్ గాయ్నా ఖైయిల్దు. 21 యో ఇన పేట్మా గాయు పన్కి యో పేట్మా జావతిమ్మాస్ కోయిని, అగాడి కిమ్ థూకి యో దేఖన వికారంతి ఛా. ఎత్రమాస్ మే నిందర్ మాతు ఉట్యో. 22 మారు హొఃణేమా మే దేక్యోతె, అష్యల్ ఛాతే హాఃత్ అష్యల్ కాడ్యే ఎక్ కంకియే పుట్యు. 23 ఓంద్యేను వ్యారోతి ఖారబ్ హుయిన్, హుఃకయుతే హాఃత్ కాడ్యే ఇన బద్మా పుట్యు. 24 ఆ కంజోర్ గాయ్యే హుయుతె యో అచ్చు గాయ్యే గలీల్దు. ఆ హొఃణేనా పండితుల్నా మాలంకరాయో పన్కి ఇను అర్థంన బోలవాలొ కోన్బి కొయిని" కరి ఇనేతి బోల్యొ. 25 అనటేకె యోసేపు "ఫరో హుయుతె హొఃణే ఎక్కస్. దేవ్ యో కర్సెతే ఫరోన మాలంకర్యాయో. యో హాఃత్ అష్యల్ గాయ్, హాఃత్ వరహ్ః. 26 యో హాఃత్ అష్యల్ కంకుల్ హాఃత్ వరహ్ః. 27 హొఃణే ఏకాస్. ఇనా బద్మా హుఃకయుగుతె వికారంతి ఉపార్ అయుతే హాఃత్ గాయ్యే హాఃత్ వరహ్ః. ఓంద్యే వ్యారోతి హాఃరబ్ హుయుతే హాఃత్ కంకి, హాఃత్ వరహ్ః ఖాల్. 28 మే ఫరోతి బోల్యొతె వాత్ అస్. దేవ్ యో కర్సేతె ఫరోన దేఖాడ్యో. 29 హాదేక్ ఐగుప్తు దేహ్ః హాఃరు జాహఃత్‍ పికావను హాఃత్ వరహ్ః ఆంకోరాస్. 30 ఇనా బాద్మా హాఃత్ వరహ్ః ఖాల్ అవ్సే. తెదె యో పికాయుతె ఖెతార్ హాఃరు ఐగుప్తు దేహ్ః బులిజాసే. యో ఖాల్ దేహ్ఃన నాష్ కర్సే. 31 ఇన బాద్మా ఆవజాసేతె ఖాల్‍తి దేహ్ఃమా యో ఫికాయుతె యాద్ కోయిన్తిమ్ జాసే. యో ఖాల్ ఘాణు భోజొ హుసే. 32 ఆ కామ్ దేవాస్ కర్యో. అనా దేవ్వాస్ ఘాణు జాల్ది కర్సే. అనటేకె యో హొఃణే ఫరోనా బే చోట్ అయు. 33 అనటేకె ఫరో జ్ఞాన్ ఛాతె అద్మినా దుండిన్ ఐగుప్తు దేహ్ఃమా ఫర్ ఇనా ఉబ్బారికాడ్ను. 34 ఫరో ఇమ్కరిన్ ఆ దేహ్ఃఫర్ అధిపతుల్న ఉబ్బారికాడీన్‍, అష్యల్తి ఖేతార్ వాడిహువతే హాఃత్ వరహ్ఃమా ఐగుప్తు దేహ్ఃహాఃరు ఫాచ్ భాగ్ లీలివో. 35 ఇవ్నె ఆవ్సేతె అ అష్యాల్ వరహ్ఃమా మాల్సేతె ఖాణుహాఃరు కుప్పోర్ను. యో ఖేతార్ వాడిహాఃరు ఫరో కన రాసే, నంగర్మా జత్తన్ కర్ను. 36 ఖాల్ బారెమా ఆ దేహ్ః నాష్‍ కోయినితిమ్‍ యో ఖాణు ఐగుప్తు దేహ్ఃమా ఆవ్సేతె హాఃత్ వరహ్ః బెంద్రాకీన్‍ హుయిన్ ర్హాను" కరి ఫరోతి బోల్యొ.

37 ఆ వాత్నా ఫరోనా ఇను అధికారిల్ హాఃరుజాణు నాచ్ఛు. 38 ఫరో ఇను అధికారిల్ "అంనితర దేవ్ను ఆత్మ ర్హావలో అప్నా మల్సేనా?" కరి బోల్యొ. 39 ఫరో, యోసేపుతి "దేవ్ ఆ అక్కు తున మాలంకరాయో అనటేకె తారింతరా అక్కల్ జ్ఞాన్‍ ఛాతే కోన్బి కొయిని. 40 థూ మారు కోఠ్డొమా అధికార్‍ వాలంతరా ర్హాను, మారు అద్మియే హాఃరు విధేయతవాళు హుయీన్‍ ఛాల్సే; సింహాసనమ్ విషయమ్మా కేవలమ్‍ మే తార ఉప్పర్ వాలోహుయిన్ ర్హాయిస్" కరి బోల్యొ. 41 బుజు ఫరో "దేఖ్, ఐగుప్తు దేహ్ః అక్కుపర్ మే తున ఉబ్బారి రాక్యోస్" కరి యోసేపుతి బోల్యొ. 42 బుజు ఫరో ఇను వాత్మా ఛాతె ఇను రాజ్ను ఛాపో అంగూఠి కాడిన్ యోసేప్నా హాత్మ ఘాల్యొ, అష్యల్ను లుంగ్డా ఇనా పెరాయిన్, ఇను గుద్దిమా ఘేణను హాఃమ్కల్ నాఖీన్‍. 43 ఇను బేమ్మాను రథంమా ఇనా చడ్డాయో. థోడుజణు ఇను హాఃమే ఛాల్తాహుయిన్ "హఃలామ్ కర్యొ" కరి చిక్కరు. ఐగుప్తు దేహ్ః హాఃరఫర్‍ ఫరో ఇనా ఉబ్బారికాడ్యొ. 44 ఫరో యోసేపుతీ "మేస్‍ ఫరో; హుయుతోబి తార చుట్టి కోయిన్తిమ్‍ ఐగుప్తు దేహ్ః హాఃరు కోన్బి ఇను వాత్నావో గోడనావో నా పాడ్ను" బోల్యొ. 45 ఫరో, యోసేపున "జఫనత్ పనేహు" కరి నామ్ మ్హేంద్యో. ఇనా ఓనుకరి యాజకుడ్ హుయుతే పోతీఫెర ఛోరిహుయితె ఆసెనతునా దీన్‍ య్హా కర్యొ. 46 యోసేపు నిక్లీన్‍ ఐగుప్తు రాజో హుయితే ఫరోనా హాఃమె ఉబ్రుతెదె ఢోడీహ్ః వరహ్ఃవాలో. తెదె యోసేపు ఫరో హాఃమెతూ జైయిన్ ఐగుప్తు దేహ్ః హాఃరు పర్యో. 47 జాహఃత్తీ ఫికాయుతె హాఃత్ వరహ్ఃమా జమీన్ ఘణు అష్యల్తి ఫికాయు. 48 ఐగుప్తు దేహ్ఃమా ఛాతె హాఃత్ వరహ్ః ఖాణుహాఃరు యో జమాకరీన్, నంగర్మా ఇనా రాఖ్యో. కెవూ నంగర్మా ఆజు బాజు ఛాతె ఖేతర్ వాడి ఫికాయుతె యో నంగర్మాస్‍ జమ కర్యో. 49 యోసేపు ధర్యావ్ను రేతితర ఖాణునా రాక్యో. యో కోలతనబి ఘాణు రాక్యో. యో మోజనాబి ఘణూ హుయుగు అనటేకె ఇనా మోజనా బంద్‍ కర్దిదో. 50 ఖాల్ వహాఃత్ ఆవను అగాఢి యోసేప్న బేజణ ఛియ్యా ఫైదాహుయా. ఓను హాఃయేర్ యాజకుడ్ హుయోతె పోతీఫెర ఛోరి ఆసెనతు ఇవ్నా ఆయా. 51 తేదె యోసేపు "దేవ్ మారు మిన్హాత్ హాఃరు మారు భా ను ఘేర్మా ఇవ్నా హాఃరనా మే బులిజావ్వతిమ్ కర్యో" కరి ఇను మోట్టో ఛియ్యాన "మనష్షే*" కరి నామ్ మ్హేంద్యొ. 52 "మే బాధ అనుభవించేతె దేహ్ఃమా దేవ్ మన భడ్డాయో" కరి బేమ్మాను ఛియ్యోన "ఎఫ్రాయిమ్*" కరి నామ్ మ్హేంద్యా. 53 ఐగుప్తు దేహ్ఃమా అష్యల్ ఖేతార్ వాడి ఫికాయిన్ హాఃత్ వరహ్ః హుయుగు. 54 యోసేపు బోల్యొతిమ్ రీతిమా హాఃత్ వరహ్ః ఖాల్ సురుహుయు పన్కి ఐగుప్తు దేహ్ః హాఃరు ఖాణు ఛా. 55 ఐగుప్తు దేహ్ః హాఃరు ఖాల్ ఆయుతేదె యో దేహ్ఃను అద్మియేను ఖాణునటేకె ఫరోన బొల్లీదు. తేదె ఫరో "తుమె యోసేపు హాఃమే జైయిన్ యో తుమారేతి బోల్యొతిమ్ కరో" కరి ఐగుప్తీహాఃరవ్తీ బోల్యొ. 56 యో దేహ్‍ః హాఃరు ఖాల్ ఆయు. యోసేపు మోట్టు థూముల్ కాడిన్ ఐగుప్తీయుల్నా ఖాణు యేచొ. ఐగుప్తు దేహ్ఃమా యో ఖాల్ భారంతీ తూ. 57 బుజు యో ఖాల్ హరేక్‍ దేహ్ఃమా భోజొహుయిన్‍ ర్హావమా హారేక్‍ ములక్ హాఃరు యోసేపు కన ఖాణు లేవ్వన ఐగుప్తున ఆయు.