1 యాకోబ్‍ ఇను వాట్మా జాతు ర్హామా దేవ్‍ దూతల్‍ ఇనా హాఃమే అయా. 2 యాకోబ్‍ ఇవ్నే దేఖిన్‍ "ఆ దేవ్ను గళ్లొ" కరి బోలిన్‍ యో జోగోనా మహనయీమ్ కరి నామ్‍ మేంద్యో. 3 యాకోబ్‍ ఎదోము జోగోమా, కాతో షేయీరు దేహ్‍ఃమా ఛాతే ఇన భైయ్‍ ఏషావు కన ఇనా ఆగాడి ఖాబర్ దేవ్వాలన బోలిమొక్లిన్‍, 4 "తుమే మారో మాలిక్ హుయుతే ఏషావుతి, హాంకేతోడి మే లాబాన్‍ కన ర్హయో. 5 మన ధండాల్బి ఘదేడోను గళోన కామ్కరవాలి, కామ్కరవాల ఛా. తారు గోర్‍ మార ఫర్‍ ర్హానుకరి మారు మాలిక్నా మాలంకరవాన బొలిమొక్లో కరి తారో సేవకుహుయుతే యాకోబ్‍ బోల్యొ" కరి ఇవ్నా ఆజ్ఞదిదొ. 6 యో దూతల్‍ యాకోబ్‍ కన ఫరీన్‍ ఆయిన్‍ "హామే తారొ భైయ్‍ హుయోతే ఏషావు కన గయా; యో ఛార్‍ హోః జణు గళ్లొహుయీన్‍ హాఃమే ఆంకోరాస్‍" కరి బోల్యు. 7 తెదే యాకోబ్‍ ఘణు ఢరీన్‍, గబ్రాయిన్, 8 "ఏషావు ఏక్‍ గళ్లో ఫర్‍ ఆయిన్‍ ఇనా హాఃతమ్‍ కర్యుతో మిగ్లుతే గళ్లోన చుక్కాయిన్‍ జావజైయ్‍" ర్హహిజైయిన్‍, ఇనేతి ఛాతే ఆద్మియేను గాలోన ధంఢొనా ఊట్‍నా బే గళ్లో కర్యొ. 9 తేదె యాకోబ్‍ "మారో భా అబ్రాహామ్‍ దేవ్‍, మారో భా ఇస్సాక్‍ను దేవ్‍, ‘తారొ దేహ్‍ఃనా, తారు మాయమాత్రకన ఫరీన్‍ జా, తున మేల్‍ కరిస్‍’ కరి మారేతి బోల్యొతె యెహోవా, 10 తూ తారొ సేవకుడ్నా కర్యోతె సమస్తహుయూతె అష్యల్ హాఃరు నమ్మకమ్‍ హాఃరమా మే పాత్రుడ్‍ కాహే. షానకతో, ఆ మారో వాత్ను లక్డాతి యొర్దాను దాటిన్‍. హాంకే మే బే హళ్లొహుయా. 11 మారొ భైయ్‍ హుయోతె ఏషావును హాత్మతూ దయకరీన్‍ మన చుఖ్కావ్‍; ఇనె ఆయిన్‍ లఢ్కవ్తీ ఆయానా, మన మర్రాఖిదేసికీ కరి ఇనేతి ఢరుకురాస్‍. 12 తూ ‘మే తున కేడె ర్హహీన్‍ ఖఛ్చితనంతీ మేల్‍ కర్తో, విస్తార్‍ హుయువ బారెమా గణనా హువకొయిన్తే ధర్యావ్ను కాక్రీనితరా తారొ ఖాందాన్నా భఢ్డాయిస్‍’ కరి థూ బోల్యొ కొయిమ్నా" కరి బోల్యొ. 13 ఇనె ఎజ్గా యోరాత్‍ ర్హయిన్‍ యో కమాయోతే ఇన్మతూ ఇనొ భైయ్‍ ఏషావుటేకె ఏక్‍ కానుక తయార్‍ కర్యొ. 14 యో బే హొః బోక్డియే, ఈహ్‍ః బోక్డా, బే హొః మేంఢియే, ఈహ్‍ః మ్హేంఢా, 15 ఢోడిహ్‍ః టైండా ఊట్‍, ఇవ్ను లఢ్కనా చాలిహ్‍ః గయ్యేనా దహ్‍ః బస్సేల్డి, ఈహ్‍ః టైండా ఘదేడొనాబి, దహ్ః ఘదేడనూ చెల్కా లీలిన్‍ గళ్లో గాళ్లోనా అలాదు అలాదుతరా రాఖ్యొ. 16 ఇను దాసుల్నాహాతె ధరాయిదీన్‍ "తుమే గళ్లో గళ్లోనా ఇఛ్మా ఢవ్వాత్తీ రాఖీన్‍ మారేతి అగాఢి ఛాలొ" కరి ఇను దాసుల్తి బోల్యు. 17 బుజు ఇవ్నమా మొదుల్వాలతి "మారొ భైయ్‍ ఏషావు తున మలీన్‍ ఆయిన్‍, ‘థూ కినొ వాళొ? కెజ్గా జొంకరాస్‍? తారు హాఃమె ఛాతె కిను?’ కరి తున పుఛ్చాయుతొ 18 థూ, ‘ఆ తారొ సేవకుడ్‍ హుయుతె యాకోబ్ను, ఆ మారొ ప్రభువుహుయుతే ఏషావుటేకె బోలిమొక్లొతె కానుక; హాదేక్‍ ఇనె మారపీటే ఆంకొరాస్‍’ బోల్‍" కరి బోల్యొ. 19 ఇంనితరా "మే అగాఢి బోలిమొక్లొతే కణుకల్‍ బారెమా ఇనా సమాధాన్‍ కరను బాద్మా మే ఇనా దెఖ్కాయిస్‍. తెదె యో ఏక్చోట్‍ మారఫర్‍ గోర్‍ కరజాయ్‍. తుమె ఏషావునా 20 అనటేకె తుమే ఏషావు దేఖిన్‍, ‘హాదేక్‍ తారో సేవకుడ్‍ హుయోతే యాకోబ్‍ హామర పేటే ఆంకోరాస్‍’ కరి బోల్ను" కరి ఇవ్నా బోల్యో. బేమ్మాను గాలోన, తీన్మాను గాలోన, గాలోన కెడే జైయిన్ ఇవ్నా హఃరనా యో ఇంనితారస్ బోల్యొ. 21 యో యో కానుకనా ఇనా ఆగాడి బోలిమొక్లిన్‍ యో గాళ్లోమా యో రాతే ఉబ్రిగయో.

22 యో రాత్‍ యో ఉట్టిన్‍ ఇను బే బావణ్‍నా ఇను బే కామ్‍కరవాలినా ఇను గ్యార జాణ లడ్కాన లీలిన్‍ యబ్బోకు నధీ దాటిన్‍ గాయో. 23 యాకోబ్‍ ఇవ్నా యో నధీ దాటిన్‍ ఇనా ఛాతే హాఃరు ఇవ్నే బోలిమొక్లో. 24 యాకోబ్‍ ఏకాస్‍ మిగిలిగో. ఏక్‍ ఆద్మి వాణే హువ్వతోడి ఇనేతి లడుకురుస్ 25 యో నాజీతమా దేఖిన్‍ యో యాకోబ్‍ టాంగ్‍ను కీల్ ఉప్పర్ మార్యొ. తెదె ఇనేతి లడుకురుస్ వల యాకోబ్‍ టాంగ్‍ను కీల్ హాఃర్కిగు. 26 యో "వాణే ఉంకోరాస్‍, మన జావ్వాదా" బోల్యో తేదె, యాకోబ్ "థూ మన ఆషీర్వదించోతొస్ పన్కి తూన జావ్వాదిస్‍ కోయిని" బోల్యో. 27 యో "తారో నామ్‍ సాత్‍?" కరి పుఛ్చాయో. యో "యాకోబ్" కరి బోల్యో. 28 తేదె యో "థూ దేవ్తి, అద్మితి లడ్డాయి కరిన్‍ జీత్‍యో. అనటేకె అజు ఆగాఢి తారు నామ్‍ ఇష్రాయేల్‍*, యాకోబ్ కహే" కరి బోల్యో. 29 తేదె యాకోబ్‍ "తారు నామ్‍ బోల్‍" బోల్యో. ఇన యో "మారు నామ్‍ సాన పుఛ్చావ్‍కోరాస్‍?" కరి బోలిన్ ఎజ్గా ఇనా ఆషీర్వదించో. 30 యాకోబ్‍ "మే ఆమేహాఃమే దేవ్నా దేఖ్యో. హుయుతో మారు జాన్‍ ఛా" కరి యో జోగోనా "పెనూయేల్‍*" కరి నామ్‍ మేంద్యొ. 31 యో పెనుయేల్‍ మాతు నికిలిన్‍ గాయోతేదె తాడ్‍కో ఉట్టయో. యో టాంగ్‍ లంగోడ్తో ఛాల్యో. 32 హుయుతో యాకోబ్‍ టాంగ్‍ కీల్ ఫర్ లంగుడ్ నార్‍ ఫర్‍ కీల్నా పులతిం కర్యో అనటేకె హాంకె తోడిబి ఇష్రాయేలీయులె టాంగ్‍ కీల పర్ ఉపార్ ఛాతే లంగుడు నార్‍ హాఃయికోయిని.