హాగర్ ఇష్మాయేల్
1 అబ్రామ్‍నా బావణ్ సారయి వల లడ్కా పేదాయాకొయిని. యో కన ఐగుప్తు దేహ్ఃని ఏక్‍ కామ్‍కరవాలి థి. ఇను నామ్‍ హాగర్. 2 సారయి అబ్రామ్‍తి "హదేక్‍, యెహోవా మన లడ్కా కొయిన్తిం కర్యో. థూ మారు కామ్‍కరవాలి కన జా. ఎక్తార ఇను బణేతు మన లడ్కా పేదావజైయి" కరి బోలి. అబ్రామ్‍ సారయి వాత్ హాఃజో. 3 అబ్రామ్‍ తేదేస్‍ కనాను దేహ్‍ఃమా దహ్ః వరహ్ః ర్హాహిన్‍ బాద్మ అబ్రామ్‍ను బావణ్ సారయి ఐగుప్తువాలి హుయితే ఇను కామ్‍కరవాలి హాగరునా ఇను బావ్రితర ర్హావనటేకె దిది. 4 యో హాగరుతి సంబంధమ్‍ మేందిలీదో. ఇనువల యో బేజిని హుయి. యో బేజిని హుయికరి మాలంకరిలీన్‍ హాగరు ఇను మాలికిన్న కమ్‍కరి దేఖాను సురుకరి. 5 తెదే సారయి అబ్రామ్‍తి "మారు గాలయ్ తున లగ్సే. ఆ హాఃరు తారు వల హుయు. మారు కామ్‍కరవాలి మేస్‍ తారు వాత్‍మా మేందియి. యో బేజిని హుయి. యో మాలం హుయుతే తేప్తో యో ఇనా డోలతె తిస్ కాహేతిమ్ మన కమ్‍కరి దేఖాను సురుకరి. తున మన ఇచ్మా యెహోవా న్యాయం కర్సే" బోలి. 6 అనటేకె అబ్రామ్‍ "అమ్‍ దేక్, తారు కామ్‍కరవాలి తారు వాత్‍మా ఛా. యో విషయమ్‍మా తారు ఇష్టంతి కర్లా" బోల్యో. సారయి ఇను కామ్‍కరవాలిన మీన్హాత్ మేంది. అనేతి యో సారయి కంతు మిలయిల్ది. 7 షూరును జావను వాట్మా ఝాడిమా పాణి ఊట హాఃదే యెహోవా దూత ఇనా దేక్యో. 8 ఇనేతి "సారయి కామ్‍కరవాలి ఓ హాగరు, కెజ్గాతు అంకోరాస్‍? కేజ్గా జోంకరాస్‍?" కరి పుచ్చావమా. అనటేకె యో " మారు మాలికిన్ హుయుతే సారయి కంతు మిలయిలీంకురుస్‍" బోల్యి. 9 తేదె యెహోవా దూత, "తూ అజు తారు మాలికిన్ కన ఫరిన్‍ జా. ఇనా పూర్తితి ఇను వాత్ హాఃజీన్ రా" బోల్యో. 10 అజు యెహోవా దూత అజు అమ్‍ బోల్యో. "తారు సంతానంనా ఖచ్చితంతి ఘాణు కరిస్. యో గణన హువకోయిన్తిం కరిస్" కరి ఇనా బోల్యో. 11 బాద్మ యో దూత "అమ్‍ దేక్, యెహోవా తారు ప్రార్ధన హాఃజో. హాంకెతు బేజిని ఛా. తునా ఛియ్యో ఫైదాహుషె. ఇనా ఇష్మాయేల్16:11 ఇష్మాయేల్ కతో దేవ్ హాఃచే కరి అర్ధమ్ కరి నామ్‍ మేందిస్‍. 12 యో ఝాడిను గాదేడో తార స్వేచ్ఛా జాన్వార్‍తార ర్హాషె. యో హార్యేక్‍జాణ వైరితార ర్హాసే. హాఃరు జాణు ఇనా వైరితర ర్హాసే. యో ఇను భైయ్యేతి అలాదుహుయిన్‍ ర్హాసే" కరి ఇనేతి బోల్యో. 13 తెదే యో "మన దేక్యోతె యో మన హాఃచ్ఛిమా దేఖావాలో కాహేన" బోలి. అనటేకెస్‍ ఇనేతి వాత్ బోల్తె యెహోవాన "మన దేఖ్కురతే దేవ్ తుస్" కరి నామ్‍ మేంద్యో. 14 అన బట్టి యో పాణి ఊటనా "బెయేర్‍ లహాయిరోయి16:14 మన దేకుకురతే దేవ్ను బావ్డి" కరి నామ్‍ ఆయు. యో కాదేషునా బెరెదునా ఇచ్మా ఛా. 15 బద్మా హాగరు అబ్రామ్‍న ఛియ్యో జాణి. హాగరుతి పేదయుతే ఇను ఛియ్యోన అబ్రామ్‍ ఇష్మాయేల్ కరి నామ్‍ మేంద్యో. 16 అబ్రామ్‍ ఛీయ్యో ఇష్మాయేల్‍నా హాగరు జాణి తేదె అబ్రామ్‍ ఉంబర్‍ ఛారీహ్ః ఫర్ ఛో వరహ్ః.