Gênesis 25

అబ్రాహామ్న అలాదు ఖాందన్

1 అబ్రాహామ్‍ బుజుఏక్‍ బాయికోనా య్హా కర్లిదో. ఇను నామ్‍ కెతూరా. 2 ఇనేతి ఇనా జిమ్రాను, యొక్చాను, మెదాను, మిద్యాను, ఇష్బాకు, షూవహు కరి ఇవ్నే పైద్యా. 3 యొక్చాను ఛియ్యా షేబ, దెదానుల్నా ఫైద్యికాడ్యో. అష్షూరీయుల్‍, లెతూషీయుల్‍, లెయుమీయుల్‍ కరి జాత్‍నా ఆ దెదాను ఖాందన్‍వాల. 4 మిద్యాను ఛియ్యా కోన్‍తో ఏయిఫా, ఏఫెరు, హనోకు, అబీదా, ఎల్దాయా కరివాల. అవ్నే హాఃర కెతూరా సంతానమ్‍. 5 అబ్రాహామ్‍ ఇను ధవ్లత్‍ హాఃరు ఇస్సాక్‍నా దిదో. 6 అబ్రాహామ్‍ యో జీవిన్‍ ర్హామాస్‍ ఇను హాఃఖోను ఛియ్యానా కానుకల్‍ దిన్‍ ఇను ఛియ్యో ఇస్సాక్‍ కంతు ఇవ్నా ఓంద్యో జోగోమా బోలిమొక్లో.

అబ్రాహామ్ను మరణ్ అజు ఘెరెడు

7 అబ్రాహామ్‍ ఏక్‍ హోః ఫాచ్‍ ఉపార్‍ హాఃడ్తీన్‍ ఈహ్‍ః వరహ్ః జీయో. 8 అబ్రాహామ్‍ ఘాణు వరహ్ః జీవిన్‍ ఘాణు బుఢోహుయిన్‍ జీందాగి హాఃరు జీవిన్‍ ఇనా బాద్మా మరిన్‍ ఇను పితరుల్‍ కనా గాయో. 9 ఇనా ఛీయ్యా ఇస్సాక్‍, ఇష్మాయేల్‍ మలిన్‍ మమ్రే హాఃడక్‍ ఛా మక్పేలా గుఫమా ఇనా గాడ్యా. యో హిత్తీయుహుయోతే సోహరు ఛియ్యో ఎఫ్రోను హుయుతే ఖేత్రమా ఛా. 10 అబ్రాహామ్‍ హేతు వారసుల్‍ హాఃదే ఛాతే ఆ ఖేత్రార్‍మా అబ్రాహామ్‍నా ఇని బావణ్‍నా గాడ్యా. 11 అబ్రాహామ్‍ మరిగుతే బాద్మా దేవ్‍ ఇనా ఛియ్యో ఇస్సాక్నా ఆషీర్వదించో. యో వహాఃత్‍మా ఇస్సాక్‍ బేయేర్‍ లహాయిరోయి కన ర్హాయోతో.

ఇష్మాయేల్ ఖాందన్

12 ఐగుప్తితివాలి సారాను కామ్‍వాలి హుయితే హాగర్‍ అబ్రాహామ్‍నా ఫైద్యాయోతే ఇష్మాయేల్‍ ఖాందన్‍ ఆస్‍. 13 ఇష్మాయేల్‍ మోటో ఛియ్యో హుయోతే నేబాయోతూ, కేదారూ, అద్బయేల్‍, మిబ్షామూ, 14 మిష్మా, దూమాన, మష్షా 15 హదరూ, తేమా, యెతూరూ, నాపీషూ, కెదెమా. 16 ఇష్మాయేల్‍ ఛియ్యా అవ్నేస్‍. ఇవ్ను ఇవ్ను గామ్ను ప్రకార్‍, కోటల్‍ను ప్రకార్‍ ఖాందన్‍ ప్రకార్‍ ఇవ్ను నామ్‍ యో. అవ్నే ఇను ఇను ఖాందను ప్రకార్‍ భార జణ రాజా. 17 ఇష్మాయేల్‍ ఏక్‍ హోః హాఃత్‍ ఉపార్‍ ఢోడీహ్‍ః వరహ్ః జీయో. ఇను బాద్మా యో జాన్‍ మైదిదో. ఇను పితరుల్నా గాయో. 18 అవ్నే అష్షూరుకునా జాయితే వాట్మా హవీలా కంతు ఐగుప్తునా హాఃదే ఛాతే షూరు తోడి ఇవ్నే ర్హాత థా. అవ్నే ఏక్ ఫర్‍ ఏక్ జాణ వైరి హుయిన్‍ ర్హాయ థా.

ఏషావు, యాకోబ్ ఫైదవాను

19 అబ్రాహామ్‍ ఛియో ఇస్సాక్‍ గూర్చిను ఖాందన్ ఆస్‍. అబ్రాహామ్‍ ఇస్సాక్నో భా. 20 ఇస్సాక్‍ పద్దనరామ్‍మా ర్హాహిన్‍ సిరియా వాలో హుయుతే బెతూయేల్‍ ఛోరి సిరియావాలో హుయోతే లాబాన్‍ బేన్‍ హుయుతే రిబ్కానా య్హా కర్లిదో. తెదే ఇను ఉంబర్‍ ఛాలీహ్‍ః వరహ్ః. 21 ఇస్సాక్ను బావణ్‍నా లఢ్కా హుయా కోయిని. అనటేకె ఇస్సాక్‍ ఇను విషయమ్‍మా యెహోవానా బోల్యో. యెహోవా ఇను ప్రార్ధనా హఃమ్జో. యో ప్రార్ధనాన జబబ్‍ దిదో. ఇను బావణ్‍ బేణి హుయి. 22 ఇను పేట్మా బే జణ లడ్కా ఛా. ఇవ్నే బేజణ పేట్మా లఢ్డాయి కరుకురాస్‍. అనటేకె యో "మన సాన ఆమ్‍ హుంకోరాస్‍. ఆమ్‍ హుయుతో మే జీవాను సాన?" ర్హాహిజాయిన్‍ ఆ విషయమ్‍ హుయిన్‍ యెహోవాన బోలి. 23 తెదే యెహోవా ఇనేతి ఆమ్‍ బోల్యో. "బే జాత్‍ తారు పేట్మా ఛా. బే గోత్రాల్‍ తారు పేట్మా మాతు అలాదు ఆవ్సే. ఎక్‍ జాత్‍బి ఎక్‍ జాత్‍ తాహాఃత్‍ హుయిన్‍ ర్హాసే. మోటో న్హాననా దాసుడ్‍ హుసే." 24 ఇనా మైహీన భరీన్‍ జణను టేంఫర్‍ ఆయుతేదే ఇను పేట్మా జుడ్వా థా. 25 ఆగాడి వాలో లాల్‍ తార పేద్యో. లాల్‍ లుంగ్డాతార ఆంగ్తాన్‍ హాఃరు కేహ్‍ః ఛా. అనటేకె ఇను ఏషావు కరి నామ్‍ మేంద్యా. 26 బాద్మా ఇను న్హాను భైయ్‍ బదర్‍ ఆయో. యో ఏషావు ఎడిన వాత్‍తి దార్లిన్‍ ఆయో. ఇనా యాకోబ్‍ కరి నామ్‍ మేంద్యా. ఇవ్నే బేణన పేద్యా తెదే ఇస్సాక్‍నా తీన్‍ ఈహ్‍ః వరహ్ః.

ఏషావు ఇను అగాడి ఫైదహుయోతె హాక్కున గామయిలెవాను

27 యో లఢ్కా బేణ మోటాహుయు. ఇవ్నామా ఏషావు జీన్‍వార్నా హాల్డే కరమా నామ్ కమాయో. ఝాడిను వాళొతరా పర్థతొ పన్కి యాకోబ్‍ నెమ్మది వాలో డేరమాస్‍ ర్హాతొతో. 28 ఇస్సాక్ ఏషావునా ఫ్యార్‍కర్తో. షానకతో ఏషావు హాల్డేకరి లాయోతే బోట్టినా యో ఇష్టపడిన్‍ ఖాతొతో రాయోతో. రిబ్కానా హుయితో యాకోబ్‍ కతో ఇష్టమ్‍. 29 యాకోబ్‍ నోహాఃను కరుకురతే టేమ్‍ఫర్‍ ఏషావు ఘాణు తాకిజాయిన్‍ ఖేతార్ మాతు ఘేర్‍కన ఆయో. 30 ఏషావు యాకోబ్‍నా "లాల్‍తార ఛాతే యో నోహాఃనునా మన ఖావ్వాన ధా. మే ఘాణు థాకిగో" కరి పుఛ్చాయో. అనటేకె ఇనా ఏదోము కరి నామ్‍ ఆయు. 31 అనటేకె యాకోబ్‍ "ఆగాడి మోటోవాలో తార తారు ఫైదవాను హక్కునా మన దినాదా" బోల్యో. 32 తెదే ఏషావు "దేఖ్‍, మే బుక్‍తి మరిజోంకూరుస్‍. ఆ జన్మను హక్కు మన సాన?" బోల్యో. 33 యాకోబు "అగాఢి ఒట్టు నాక్" బోల్యొ. ఏషావు యాకోబ్ ఒట్టు కరిన్‍ ఇను జన్మను హక్కునా ఇనా ఇమ్నితార ఏచి నాదిదో. 34 యాకోబ్‍ ఇన కన ఛాతే రోట్టా, చిక్కుడు కాయల్ను నోహాఃను ఏషావునా దిదో. ఏషావు రోట్టా, నోహఃను ఖాయిన్‍, పీన్‍ ఎజ్గాతు ఇను వాట్నా ఛాలిగో. ఇంనితార ఏషావు ఇను పైహిలు ఫైదాహువను హక్కున దినాఖిదిదొ.