Gênesis 26

ఇస్సాక్ గెరారుమా ర్హావను

1 అబ్రాహామ్‍ ధన్మా ఆయుతే హాఃల్‍ కాహేతిమ్‍ యో దేహ్‍ఃమా బుజు ఏక్‍ హాఃల్‍ ఆయు. తెదే ఇస్సాక్ గెరారుమా ఛాతే ఫిలిష్తీయుల్నా రాజోన అబీమెలెక్నా కన గాయో. 2 ఎజ్గా యెహోవా ఇనా దేఖాయో. "థూ ఐగుప్తుమా నోకో జా. మే తారేతి బోల్యోతే దేహ్‍ఃమా ర్హా. 3 హాంకే థూ ఛాతే ఆ దేహ్‍ఃమా అలాదు దేహ్ఃవాలతర ర్హాయిజా. మే తారేతి ర్హాయిస్‍. తూన ఆషీర్వదించిస్‍. తారో భా హుయోతే అబ్రాహామ్‍తి కర్యోతే నిబంధన్నా కరిస్‍. 4 తారు ఖాందన్‍ వాలన ఆకాష్‍ను తారోతార భడ్డాయిస్‍. తారు ఖాందన్న అ జమీన్ హాఃరన దీస్. తారు ఖాందన్‍ వాళు బణేతి జమీన్‍ ఫర్‍ జాత్‍ హాఃరనా ఆషీర్వదించిస్‍. 5 సానకాతో తారో భా అబ్రాహామ్‍ మారు వాత్నా హాఃజిన్‍ మారు ఆజ్ఞల్నా, మారు నియామాల్మా ఛాల్యో" కరి ఇనా బోల్యో. 6 అనటేకె ఇస్సాక్‍ గెరారుమా ర్హాయో. 7 ఎజ్గాను ఆద్మియే ఇని బావణ్‍నా దేఖిన్‍ ఇను హాఃబర్‍ ఇస్సాక్‍నా పుఛ్చాయా. ఇనా యో "యో మారి బేన్‍" కరి బోల్యో. సానకాతో రిబ్కా రాంగేలి అనటేకె ఎజ్గాను అద్మియే ఇనా టేకె ఇనా మర్రాదిస్‍ కరి ర్హాయిగో. యో మారి బావణ్‍ కరి బోలనా ఢారిగో. 8 యో ఘాణు ధన్‍ ఎజ్గా ర్హాయియో. బద్మా ఎక్‍ ధన్ ఫిలిష్తీయుల్‍ రాజో అబీమెలెక్నా కిటికిమాతు దేఖ్‍తో ర్హావమా యో టేమ్‍పార్‍ ఇస్సాక్‍ ఇని బావణ్‍ రిబ్కాతి మాస్కేరి కరను ఇనా దేఖాయు.