Gênesis 27

ఇస్సాక్ యాకోబ్నా ఆషీర్వాదించొ

1 ఇస్సాక్‍ ఘణు బుఢొ హుయో. ఇను డోళ కాయ్బి దెఖ్కావకొయిని. యో పరిస్థితిమా యో ఇను మోటో ఛియ్యో ఏషావుతి " మారొ ఛియ్యా" కరి బోల్యొ. యో "బోల్ భా" బోల్. 2 తెదె ఇస్సాక్‍ "దేఖ్‍, మే బుడో. కెదె మరిజాయిస్కి మాలంకొయిని. 3 అనటేకె థూ తారు ఆయుధాల్హుయూతె, తారు బాణంనా తారు అంబుక్‍నా లీలిన్ ఝాడిమా జైయిన్‍ ఎజ్గా మారటేకె హాల్డెకరీన్‍ బోట్టి లీన్‍ ఆవ్‍. 4 ఇన మారటేకె అష్యాల్ కారిన్‍ లీన్‍ ఆవ్‍. మన నాఛ్చుతే నోహాఃను తయార్‍ కరి దర్లిన్‍ ఆయుతో మే మరకోయిన్తే అగాడి ఇనా ఖైయిన్‍ తున ఆషీర్వాదించిస్‍" బోల్యొ. 5 ఇస్సాక్‍ ఇను ఛియ్యో ఏషావుతి ఆమ్‍ బోలుకుర్తో రిబ్కా అవ్నా మాలంకొయినితిమ్‍ లపీన్‍ హాఃమ్జితి రొంకోర్తి. ఏషావు హల్డేను బోట్టి లీలావనాటేకె ఝాడినా గయో. 6 తెదె రిబ్కా ఇను ఛియ్యా యాకోబ్తి "జత్తన్తి హాఃమ్జ్. తారొ భా తారొ భైయ్‍తి వాత్‍ బోలను మే హాఃమ్జి. యో తారొ భైయ్‍తి 7 ‘మే మర్జావ కొయిన్తే అగాఢి ఖాణు కరీన్‍ యెహోవా హాఃమ్జొ తున ఆషీర్వాదించీస్‍. అనటేకె థూ హల్డేను బోట్టి లాయిన్‍ మారటేకె అష్యల్తి కరీన్‍ లీన్‍ ఆవ్‍’ కరి బోల్యొ. 8 ఛియ్యా, అనటేకె హాంకె మారు వాత్‍ హాఃమ్జ్. మే తునా‍ బోలుతే ఇనాకర్‍. 9 థూ గళోకన ఖందే జైయిన్‍ బే అష్యల్ను బోక్డిను చెల్కునా ధర్లీన్‍ ఆవ్‍. మే ఇనా తారొ భా ఇష్టమ్‍హుయూతె ఇంనితరా అష్యల్తి ఖాణు తయార్‍ కరూస్‍. 10 తారొ భా మర్జావ కొయిన్తే అగాఢి ఇనా ఖైయిన్‍ తున ఆషీర్వాదించతిమ్‍ ఇనా థూ ఇనాకన లీల్‍ జా" కరి బోలి. 11 ఇన యాకోబ్‍ ఇని ఆయాతి "మారో భాయ్‍ ఏషావు ఆంగ్తాన్‍ హఃరు కేహ్‍ః ఛా. మన కేహ్ః కోయిని. 12 ఏక్తార మారో భా మన చీమ్మిన్‍ దేఖ్యోతో. తెదే మే ఇనా డోలమా ఏక్‍ జోట్టేలతార ర్హాహిస్‍. తెదే యో మార ఫర్‍ ఆషీర్వాదమ్‍ బదుల్‍ షాపమ్‍ ఆవ్సే" కరి బోల్యో. 13 పన్కి ఇని ఆయా "ఛియ్యా, యో షాపమ్‍ మార ఫర్‍ ఆవ్సే హువదా! థూ మాత్రమ్‍ మారు వాత్‍ హాఃమ్జ్. జైయిన్‍ మే బోల్యుతిమ్‍ ఇన మార కన లీన్‍ ఆవ్" కరి బొలి. 14 అనటేకే యాకోబ్‍ బే బోక్డినా చెల్కునా ధర్లిన్‍ ఇన ఇని ఆయా లీలిన్‍ ఆయో. యో ఇనేతి ఇనా భాన నాఛ్చుతిమ్‍ అష్యాల్తి బణాయిన్ ఖాణు తయార్‍ కరి. 15 రిబ్కా ఘేర్మా ఇనో మోటో ఛీయో ఏషావును అష్యాల్‍ లుంగ్డా ఛా. 16 యో ఇనా యాకోబ్‍ పేరాయిన్‍. బోక్డిను చేల్కాను ఛామ్డునా ఇను గుది పర్‍ కౌవ్లు భాగ్‍ ఫర్‍ ఢాపి. 17 యో ఖాణు కరిన్, అష్యాల్ ఖాణునా రొట్టాన ఇను ఛియోహుయుతే యాకోబ్‍ను వాత్మా దిదీ. 18 యో ఇనో భా కన ఆయో, భా, కరి బోలయో. ఇస్సాక్‍ "ఛియ్యా సాత్‍? థూ కోన్‍?" కరి పుఛ్చాయో. 19 ఇన యాకోబ్‍ "మే ఏషావ్‍. తారో మోటో ఛియో. థూ మన బోల్యోతిమ్ కర్యో. ఉట్టిన్‍ మే హాల్డేకరిన్‍ లాయోతే ఇనా ఖాయిన్‍ మన ఆషీర్వదించ్‍" బోల్యో. 20 తెదె ఇస్సాక్‍ ఇనో ఛియోతే "మారో ఛియా యో ఆత్రే జాల్ది తూన కిమ్‍ మాల్యో?" బోల్యో. ఇన యాకోబ్‍ "తారో దేవ్‍ హుయుతే యెహోవా ఇన మార హాఃమే లాయో. అనటేకేస్‍ ఆత్రే జాల్ది మాల్యు" కరి బోల్యో. 21 తెదే ఇస్సాక్‍ "మారో ఛియ్యా, థూ ఏషావుకి కాహేకి చీమ్మిన్‍ దేకుస్‍. హాఃదే ఆవ్‍" కరి బోల్యో. 22 యాకోబ్‍ ఇనో భా హుయుతే ఇస్సాక్‍ కన ఆయో. యో యాకోబ్‍నా చీమ్మిన్‍ దేఖిన్‍ ఆంబోల్యో. "ఆవాజ్‍ యాకోబ్‍ను పన్కి హాత్‍ ఏషావును హాత్‍ ఆస్‍" బోల్యో. 23 యాకోబ్‍ వాత్‍ ఇనా భైయ్‍ హుయుతే ఏషావు వాత్‍ కేహ్‍ః ర్హామా ఇస్సాక్‍ యాకోబ్‍నా హాఃనద్‍ ధర్యోకోయిని. అనటేకే ఇస్సాక్‍ ఇనా ఆషీర్వదించో. 24 "థూ హాఃచ్చిమాస్‍ మారో ఛియో ఏషావునా?" కరి పుఛ్చాయో. యాకోబ్‍ "వో మేస్‍" బోల్యో. 25 తెదె ఇస్సాక్‍ "యో హాఃణు లీన్‍ ఆవ్‍. థూ హాల్డేకరిన్‍ లాయోతే ఇన మే ఖాయిన్‍ తునా ఆషీర్వదించిస్‍" కరి బొల్యో. యాకోబ్‍ హాఃణు లీన్‍ ఆయో. ఇనా యో హాఃద్యో. ద్రాక్చాను రాహ్‍ః లీన్‍ ఆయుతో పీదో. 26 తెదే ఇనో భా హుయుతే ఇస్సాక్‍ "మారో ఛియా, హాందే ఆయిన్‍ మన బుచ్చా మేంద్‍" కరి బోల్యో. 27 యాకోబ్‍ కన ఆయిన్‍ ఇనా బుచ్చా దిదో. తెదే ఇస్సాక్‍ ఇను లుంగ్డాను వాహ్ః దేకిన్‍ ఇనా ఆషీర్వదింస్తో ఆమ్ బోల్యో. "దేఖ్‍, మారో ఛియ్యా వాహ్ః యెహోవా ఆషీర్వదించోతే ఖేతార్ను వాహ్‍ఃతార ఛా. 28 ఆకాష్‍ మాతు వర్హాకుతే ఓహ్‍ః ఏక్‍ భాగ్నా, జమీన్‍ భరిన్ ఏక్‍ భాగ్‍నా, ఘాణు ఖేతార్ వాడి, ద్రాక్చాను రాహ్‍ః దేవ్‍ తూన దిస్‍ ఇమ్‍ దేవ్వాసే 29 అద్మియే తూన సేవల్‍ కర్సే హువదా, జాత్‍తే తార హాఃమే లోంగ్సే, తారు మాయమాత్రా హాఃరన థూ రాజో హుయిస్‍. తారి ఆయా ఛియ్యా తూనా లోంగ్సే, తునా షాపించ వాలనా షాపామ్‍ గురి హుస్, తూనా ఆషీర్వదించవాలనా ఇవ్నా ఆషీర్వదమ్‍ హుస్‍."

ఏషావు భాతి ఆషీర్విదించ్ కరి పొహ్ఃలావ్వను

30 అమ్‍ ఇస్సాక్‍ యాకోబ్నా ఆషీర్వదించోతె బద్మా యాకోబ్‍ ఇనా భా ఇస్సాక్‍ కన కంతు ఛాలిగు. జాల్ది ఇనో భైయ్‍ హల్డే మాతు పరిన్‍ ఆయో. 31 యో బి అష్యాల్ హాఃణు తయార్‍ కరిన్‍ ఇన భా కన లాయో. "భా, తారొ ఛియ్యో హాల్డే కరీన్‍ లాయోతె ఇన ఖైయిన్‍ మన ఆషీర్వాదించ్‍" కరి భాతి బోల్యొ. 32 ఇనొ భా హుయుతె ఇస్సాక్‍ "థూ కోన్‍?"కరి పుచ్చాయో. యో "మే తారొ ఛియ్యో. ఏషావు కరి తారొ మోటొ ఛియ్యోకరి" బోల్యొ. 33 ఇనేతి ఇస్సాక్‍ ఘాణు ఢారిగో. "ఇమ్‍ హుయోతో హాల్డే కరుతే బోట్టి మారకన లాయుతే కోన్‍? థూ ఆవ్వకోన్తే ఆగాడి ఇనా ఖాయిన్‍ ఇనా ఆషీర్వదించో. జారురి యో ఆషీష్‍ పొందిచే." 34 ఏషావు ఇను భా వాతే హాఃమ్జిన్‍ ఘాణు బాధతి మోటు హెచ్కే భరిన్ రోయో ఇనా భాతి "భా, మనబి ఆషీర్వదించ్‍" బోల్యో. 35 ఇస్సాక్ "తారో న్హాను భైయ్‍ దోఖా దిన్ తారింతర ఆయిన్‍ తారు ఆషీర్వద్‍నా లీన్‍ గాయో" కరి బోల్యో. 36 ఏషావు అంబోల్యో. "యాకోబ్‍ కరి నామ్‍ ఇనా అష్యాల్‍ పూరిగు. యో మన బే చోట్ట్ దోఖా దిదో. మారు పైలు ఫైదవాను హక్కు లీలిదో. హఃకే మన అవ్నుతే ఆషీర్వదమ్ లీన్‍ గాయో." ఇమ్‍ బోలిన్ ఏషావు ఇనా భానా "మారటేకె అజు కెవు ఆషీర్వదమ్‍ మిగులు కోయినికుని?" కరి పుచ్చాయో. 37 అనటేకె ఇస్సాకు"దేఖ్‍, ఇనా తూన మాలిన్‍ తార నియమించో. ఇను బంధువు హాఃరు ఇనా సేవకుల్‍ తార దిదో. ఖేతార్ వాడి నావు ద్రాక్చాను రాహ్‍ః ఇనా దిదో? యో కాహేతిమ్‍ తూనా అజు కేవు ఆషీర్వదమ్‍ మిగిలిన్‍ ఛా?" కరి బోల్యో. 38 ఏషావు ఇనో భాతి "భా, తారకన ఏక్‍ ఆషీర్వదమ్‍బి కోయిన్‍నా? భా, మనబి ఆషీర్వదించ్‍" కరి బోల్తో గట్టిన్‍ రోయో. 39 ఇనో భా ఇస్సాక్‍ ఇనా అమ్‍ జవాబ్‍ దిదో. "దేఖ్‍, తారు ర్హావను జమీన్‍ దూర్‍ ర్హాసే. ఉపార్తు ఆకాష్‍ను ఓహ్‍ః ఇనా పర్‍ పడ్సేకొయిని. 40 థూ తారు ఛారిఫర్‍ ఆధార్‍కరిన్ జీవిస్‍. తారో భైయ్‍నా దాసుడ్‍ హుయిస్‍. పన్కి థూ పార్యోతో ఇను బోజొ తారు గుది పార్తు తోణదిస్‍." 41 యాకోబ్‍ ఇనో భా దిదోతే ఆషీర్వదమ్‍ విషయమ్‍హుయిన్‍ ఏషావు ఇనా ద్వేషించో. ఏషావు ఇమ్‍ ర్హాయిగో. "మారో భా మరిజావ్వాను ధన్‍ కెత్రు దూర్‍ కోయిని. యో హుయుతో మారో న్హాన భైయ్‍ హుయుతె యాకోబ్నా మర్రాకిదిస్‍." 42 ఇనో మోటో ఛియో ఏషావు బోల్యుతే వాత్‍నా రిబ్కా హాఃమ్జీ. యో ఇను న్హానో ఛియ్యా యాకోబ్‍నా బోలయిన్‍. ఇనేతే "దేఖ్‍, తారో భైయ్‍ ఏషావు తూన మర్రాకును కరి ర్హాయిజోంకరాస్‍ ఇనా యోస్‍ పోహ్‍ఃలయిలెంకోరాస్‍. 43 అనటేకె ఛియా, మారు వాత్‍ హాఃజ్‍. హారాన్‍మా ఛాతే మారో భైయ్‍ లాబాను కన ఛాలిజా. 44 తారో మోటో భైయ్‍ను ఖీజ్‍ కమ్‍ హువ్వతోడి ఎజ్గా ఇనేతి ర్హా. 45 తారో మోటో భైయ్‍ను ఖీజ్‍ కమ్‍ హుయిన్, థూ ఇనా దేఖిన్‍ ఇనా యో బులిజావ్వతోడి ఎజ్గా ర్హా. తెదే మే ఎజ్గాతు తూన బోలయిస్‍. ఏక్స్ ధన్మా మే తూమే బేణనా దూర్ ఉవ్వాను సాన?" కరి బోలి

ఇస్సాక్ యాకోబ్న లాబాను కన బోలిమొక్లను

46 రిబ్కా ఇస్సాక్‍తి "ఏషావు య్హా కర్యోతే అలాదు జాత్ను బాయికో వల మారు జాన్‍ థాకిగు. ఆ దేహ్‍ఃను‌ ఛోగ్రియేన హేతు ఛోర్రియేమా ఆజ్తాను బుజు ఏక్‍ ఛోగ్రినా యాకోబ్‍బి య్హా కర్లిదోతో అజు మే జీవిన్‍ సాను ప్రయోజనమ్‍?" కరి బోలి.