Gênesis 31

యాకోబ్ లాబాను కంతు చాల్‍ జావను

1 లాబాన్‍ ఛియ్యా "యాకోబ్‍ అప్ను భానా ఛాతె హాఃరు లిలీన్, ఇనా వల ఆ ఆస్తి హాఃరు కమాయ్‍ లీదొ" కరి బోలను యాకోబ్‍ హాఃమ్జో. 2 యోస్‍ కాహే యో లాబాన్ మోడు దేఖ్యొతెదె యో ఇను విషయమ్‍మా అనా అగాఢితరా ఫ్యార్ కొయిని. 3 తెదె యెహోవా "తారు మోట్టవ్‍ను దేహ్‍ఃనా, తారొ మాయ మాత్రకన పరీన్ జా. మే తారకేడె ర్హయిస్‍" కరి యాకోబ్తి బోల్యొ. 4 యాకోబ్ ఖేతర్మా ఇను మందోకనా రాహేలునాబి లేయానా బులాయిన్‍ ఇవ్నేతి, 5 "అనేతి అగాఢి తారొ భా మే కాతొ ఇష్టమ్తి దేఖ్కుకర కొయిని కరి మన మాలం హుంకరాస్‍. హుయుతొ మారొ భాను దేవ్‍ మార కెడే ఛా. 6 మే తారొ భానా మారు తాహాఃత్ రావతోడి కామ్‍ హాఃరు కర్యో యో తుమ్నాబి మాలం. 7 తారొ భా మన దోఖ కరీన్‍ ధహ్ః చోట్‍ మారు జీతమ్‍ బద్లాయో. హుయుతోబి దేవ్‍ ఇనా మూలంతి మన నష్టమ్ ఆవ్వదిదొకొయిని. 8 యో ‘మచ్చల్‍ హుయుతె తారు జీతమ్‍ హుసే’ కరి బోల్యొతెదె గళ్లొహాఃరు మచ్చల్‍ ఛాతె లఢ్కా జణ్యు. ‘చారల్ ఛాతె తారు జీతమ్‍ హుసే’ కరి బోల్యొ తెదె యో చారల్నుహుయూతె చెల్కనా జణి. 9 అంనితార దేవ్‍ తారొ భాను మందనా కాఢీన్‍ మన దిదొ. 10 గళ్లొ బాయిస్‍ బాంధను వహాఃత్మా మే హోఃణెమా దేఖ్యొతెదె మ్హేంఢి జొడొ హుయిన్‍ మ్హేంఢా చారల్‍హుయుతోబి మచ్చల్‍హుయుతోబి వాళుహుయిన్‍ ఛా. 11 బుజు యో హోఃణెమా దేవ్ను దూత ‘యాకోబ్‍’ కరి మన బులావమా తెదె మే ‘బోల్ ప్రభూ’ కరి బోల్యొ. 12 తెదె యో ‘తారు ఢోల ఉప్పర్‍ పడీన్‍ దేఖ్‍. మ్హేంఢితి జోడు హుయితే మ్హేంఢా హాఃరు చారల్‍, పోడోల్, మచ్చల్‍ హుయిన్‍ ఛా. షానకతో లాబాన్‍ తున కరుకురాతె యోహాఃరునా మే దేక్యొ. 13 థూ అజ్గ స్తంభమ్‍ ఫర్‍ తేల్‍ నాఖ్యొకీ, కెజ్గా మన మొఖ్యొను కర్యోకి, యో బేతేల్ను దేవ్‍ మేస్‍. హంకె థూ ఉట్టీన్‍ ఆ దేహ్‍ఃమతూ థూ ఫైదాహుయోతె దేహ్‍ఃనా ఫరీన్‍ జా’ కరి మారేతి బోల్యొ" 14 అనటేకె రాహేల్బి, లేయాబి "బుజు మారొ భా ఘేర్మా హామ్నా భాగ్‍ వారసత్వమ్‍ ఛాన? యో తుమ్నా అలాదుతరా దేఖ్కు కరాస్‍ కొయిన్నా? 15 యో హామ్నా ఏచినాదిన్‍, హామ్నా ఆవ్నుతే పైసా హాఃరు హఃయిల్దో. 16 దేవ్‍ హామారొ భా కంతూ లీలిదోతె రఫ్యాహాఃరు హామారూబి లఢ్కావ్ను కహేనా? అనటేకె దేవ్‍ తారేతి సాత్‍ బోలస్కి యోస్‍ కర్‍" కరి ఇనా జవాబ్ దేవమా. 17 యాకోబ్‍ ఇనొ ఛియ్యావ్నా ఇనొ బావణేనా ఊట్‍ ఫర్‍ చఢాయిన్‍ 18 ఇనొ భా ఇస్సాక్‍ కనా జావ్వన ఇను దాంఢా గయ్యే హాఃరునా, పద్దనరాముమా ఇనె కమాయోతె ఆస్తి హాఃరు లీలిన్‍ కనాను దేహ్‍ఃనా నిక్లో. 19 లాబాన్‍ ఇను మ్హేండా బొచ్చు కత్రనటేకె జాతొ ర్హావమా రాహేల్‍ ఇను భా ఘెర్మా ఛాతే ఘెర్ను దేవ్నా ఛోరికరి. 20 యాకోబ్‍ ఇనె మిలాయ్‍ లెంకరాస్‍ కరి సిరియావాలో హుయుతె లాబాన్నా బోలకొయినితిమ్‍ జావ్వమా ఇనా మోసంకరవాలంతరా హుయు. 21 యో ఇనా హుయుతే హాఃరులీన్‍ ఛాలిగోకరి. ఇనె ఉట్టీన్‍ నది దాటిన్‍ గిలాదునా ఫాహ్డను అస్పీస్‍ జొగొ బ్హణే గయో.

లాబాన్ యాకోబ్న రేప్టను

22 యాకోబ్‍ మిలయిల్దోకరి తీన్‍ ధన్నా బద్మా లాబాన్‍ మాలం హుయు. 23 యో ఇను మాయ మాత్రనా కెడెలీన్‍, హాఃత్‍ ధన్‍ ప్రయాణమ్‍ కెత్రూ దూర్కి యాకోబ్‍నా రప్టీన్‍ జైయిన్‍, గిలాదు ఫాహ్డ్ ఫర్‍ ఇనా మల్యొ. 24 యోరాత్‍ హోఃణెమా దేవ్‍ లాబాన్‍ కనా ఆయిన్‍ "థూ యాకోబ్తి అష్యల్‍వో ఖరాబ్‍హొ బోల్‍ నొకొ జత్తన్‍ ర్హా" కరి ఇనేతి బోల్యొ. 25 ఆఖరిమా లాబాన్‍ యాకోబ్‍నా మల్యొ. యాకోబ్‍ ఇను డేరనా యో ఫాహ్డ్ ఫర్‍ నాఖిలిదో. లాబాన్బి ఇను మాయమాత్రతీ గిలాదు ఫాహ్డ్ ఫర్‍ ఢేరో నాఖిలిదొ. 26 తెదె లాబాన్‍ యాకోబ్తి "తూ సాత్ కర్యొ? మన దోఖ దీన్‍, జబర్ దస్తీ జాను ఇవ్నితార మారి ఛోరియేనా లీలిన్‍ జావ్వను షానా? 27 తూ మన బోలకొయినితిమ్ లపీన్‍ జావను మన దోఖ దేవ్వాను సాత్‍? ఇమాన్తి, సంబరంతి, గీద్‍తి, సితారాల్తి తూన బోలిమొక్లొవోత్‍. 28 మే మారు నాత్యా, ఛోరినా బుచ్చా దేవ్వాకోయిన్తిమ్‍ దిమాక్‍ కోయిన్తిమ్‍ కర్యో. 29 మే తుమ్నా హాఃరబ్‍ కరజాయ్‍. హుయితో రాతే తారో భానో దేవ్‍, ‘జత్తన్తి ర్హా థూ యాకోబ్తి అష్యల్‍తోబి ఖర్రాబ్‍తోబి బోల్ నొకొ’ కరి మారేతి బోల్యొ. 30 తారొ భా ఘేర్ ఫర్ దిగుల్‍ ర్హయీన్‍ జావాలొ హుయుతో జా, మారు దేవ్నా ఛోర్ను షాన కర్ను?" కరి బోల్యొ. 31 అనటేకె యాకోబ్ "థూ మార కంతూ తారి ఛోరినా లీన్‍ జేయిస్ కరి ఢరిగొ. 32 కినాకన తారొ దేవ్‍ దెఖ్కావ్సేకి ఇవ్నే జీవ్సె కొయిని. థూ అప్ను మాయమాత్ర కన దూండీన్‍ దేఖిన్‍ తారు మారకన కేవుబి ర్హయుతో ఇనా లీలా" కరి లాబాన్‍తి బోల్యొ. రాహేలు ఇనా ఛోర్‍ కరి యాకోబ్నా మాలంకొయిని. 33 లాబాన్‍ యాకోబ్‍ను డేరనమహీ లేయా డేరమా బేజణి కామ్‍కరవాలి డేరమా గయో పన్కి ఇనా సాత్బి మల్యుకొయిని. బాద్మా యో లేయా డేరమా కంతూ రాహేల్‍ డేరమా గయో. 34 రాహేల్‍ యోవిగ్రహాల్నా లీలిన్‍ ఊట్ను రాచుయేమా ఇన్మా మ్హెందీన్‍ ఇనఫర్‍ బేసిగి. హుయ్తొ లాబాన్‍ యో డేరా హాఃరు దూండీన్‍ దేఖిన్‍ యో మాల్యుకొయిని. 35 యో ఇనో భాతి "ఇవ్ను హాఃమే మే ఉట్టిన్‍ ఉబ్రికొయిని కరి తూమే ఖీజ్‍ నోకోఖా. మే మారు మైహిన్నా ధన్మా ఛావ్‍" కరి బోలి. యో హాఃరు దుండిన్‍ యో బోమ్మల్‍ మాల్యుకోయిని. 36 యాకోబ్‍ ఖీజ్‍తి లాబాన్‍తి బోల్తో "మే సాత్‍ దోఖా కర్యో? థూ ఆమ్‍ ఖీజ్‍హుయిన్‍ మన రేప్టాను మే కర్యో పాప్‍ సాత్? 37 థూ మారు హాఃమాను దేఖిన్‍బి తారు ఘేర్ను రాఛు సాత్బి మాల్యునా? మారు వాలకన , తారు వాలకన ఇనా లాయిన్‍ మేంద్‍. ఇవ్నే అప్నా బేజణ ఇఛ్మా న్యాయ్‍ కర్సే. 38 ఆ ఈహ్‍ః వరహ్ః మే తారకన థో. తారు మేంఢిబి బోక్డియే కెవుబి లఢ్కా దేఖావ్వాకోయిన్తమ్‍ గాయునా, తారు మందను మేంఢాబి కీనాబి మే హాఃద్యోకోయిని. 39 జీన్వార్‍ మర్రకిదితో ఇన తారకన లావ్వకోయిన్తిమ్‍ యో నష్టమ్‍ మేస్‍ మేందిలిదో. వాణేవో, రాత్‍వో, ఆలాదు ఆద్మి ఛోర్‍ కర్యుతే ఇన మోల్ను మారకన కంతు లీదో. 40 మే కిమ్‍ ఛావ్‍ దేఖ్‍, వాణే తాడ్కోనా రాత్‍ ఓహ్‍ఃనా కంజోర్ హుయ్గో. మారు ఢోలన నిందార్‍కరి కోయిన్తిమ్ హుయు. 41 తారి బేజాణి ఛోరినటేకె ఛౌవ్దా వరహ్ః తారు మందనాటేకె ఛో వరహ్ః హాఃరు ఈహ్ః వరహ్ః తూన సేవ కర్తో తారు ఘేర్మా ర్హాయో. హుయుతో థూ మారు జీతమ్‍ దహ్‍ఃతార బద్లాయో. 42 మారో భానో దేవ్‍, అబ్రాహామ్‍ దేవ్‍, ఇస్సాక్‍ ఢార్యోతే దేవ్‍ మార కెడే నార్హాయితో థూ మన ఖచ్చితంతి ఖాలి వాత్తి బోలిమొక్లోవోత్‍. దేవ్‍ మారు ఆహ్‍ఃనా మారు హాత్ను మీన్హాత్నా దేఖ్యో. అనటేకె హుయుతే రాత్‍ తునా గుర్కాయో" కరి బోల్యొ.

యాకోబ్ లాబాన్ ఓప్పందమ్

43 అనటేకె లాబాన్‍ "ఆ ఛోరియే మారి ఛోరియే, ఆ ఛియ్యా మార ఛియ్యా, ఆ మంద మారు మంద, తూన దేఖాయుతే హాఃరు మారు. ఆ మారి ఛోరియే హుయుతే, అవ్నా ఫైదయుతే ఛియ్యానా మే సాత్‍ కరిస్‍? 44 అనటేకె థూ మే ఏక్‍ నిబంధనా కర్లియే ఆవ్‍. యో తూనా, మన ఇఛ్మా సాబుత్‍ తార ర్హాస్‍" కరి యాకోబ్‍తి బోల్యొ. 45 తెదే యాకోబ్‍ ఏక్ ఫత్రొ పడిన్‍ ఇనా ఏక్‍ స్తంభంతి ఉబ్బర్‍ రాఖ్యొ. 46 " ఫాత్రా కుపోకరిన్‍" కరి ఇను మాయ మాత్రతి బోలమా ఇవ్నే కుపో కర్యా. ఇవ్నే యో కుపోకన హాఃణు కర్యా. 47 లాబాన్‍ ఇను "*31:47 ఆ అరమేయిక్ భాషమా సాబుత్ను కుప్పొ కరి అర్థమ్‌ యగర్‌ షహదూతా" కరి నామ్‍ మేంద్యో. పన్కి యాకోబ్‍ ఇనా "*31:47 ఆ హిబ్రూ భాషమా సాబుత్ను కుప్పొ కరి అర్థమ్గలేదు" కరి నామ్‍ మేంద్యొ. 48 లాబాన్‍ "ఆజ్‍ను ధన్‍ ఆ కుపో తూన మన ఇచ్మా సాబుత్‍తార ర్హాస్‍" కరి బోల్యో. అనటేకె ఇన గలేదు కరి నామ్‍ ఆయు. 49 అజు "అప్నే ఏక్నాయేక్‍ దూర్‍ ర్హాహితోబి యెహోవా మన తూనా ఇఛ్మా హుయుతే మాలంకర్సే" కరి బొల్యో అనటేకె ఇనా "*31:49 మూల భాషమా ఏక్నాయేక్ దేఖను జొగొ కరి అర్థమ్‌మిస్పా" కరి నామ్‍ మేంద్యొ. 50 బాద్మా లాబాన్ "థూ మారి ఛోరినా బాధ కర్యోతో, మారి ఛోరినా కాహేతిమ్‍ ఆలాదు ఛోగ్రియేనా య్హా కర్లిదో, దేఖ్‍, అప్నా కన కోన్‍ నార్హాహితోబి, తూన మన ఇఛ్మాతే దేవస్ సాబుత్‍" కరి బోల్యో. 51 ఆ కాహేతిమ్‍ లాబాన్‍ "తూన మన ఇఛ్మా మే ఉబ్రిన్‍ ఆ స్తంభాన్నా, ఆ ఫాత్రో కుపాన దేఖ్‍. 52 తూన హఃరబ్‍ కరనా మే ఆ కుపోనా, ఆ స్తంభామ్‍నా దాటిన్‍ తారకన ఆవ్వాకోయిన్తిమ్‍, థూ మన హాఃరబ్‍ కరనా ఆ కుపోనా, ఆ స్తంభామ్‍నా దాటిన్‍ మారకన ఆవ్వాకోయిన్తిమ్‍ ర్హావనాటేకె ఆ కుపో, ఆ స్తంభామ్‍ సాబుత్‍. 53 అబ్రాహామ్‍ దేవ్‍, నాహోరు దేవ్‍, ఇవ్నో భా దేవ్‍, అప్నా ఇఛ్మా న్యాయ్‍ కర్సే" కరి బోల్యో. తెదె యాకోబ్‍ ఇనో భా ఇస్సాక్‍ ఢర్యోతే దేవ్‍ను తోడ్‍ కరి ఓట్టు న్హాక్యో. 54 యాకోబ్‍ యో ఫాహ్డ్ ఫర్‍ బలి దిన్‍ హాఃణు కరనా ఇను మాయమాత్రనా బులయిన్‍ ఇవ్నే హాఃణు కరిన్‍ ఫాహ్డ్ ఫర్‍ యో రాత్‍ థా. 55 వ్హాణు హుయుతేదె లాబాన్ ఇను నాత్యా ఇను ఛోరియేనా బుచ్చాదిన్ ఇవ్నా ఆషీష్ దిన్‍ ఇను గామ్‍నా ఛాలిగో.