1 Nipele, Ŵafilisiti ŵaputene ngondo ni Ŵaisilaeli. Ŵaisilaeli ŵatisile paujo pa Ŵafilisiti, ni Ŵaisilaeli achajinji ŵaulajikwe ku chitumbi cha Giliboa. 2 Nambo Ŵafilisiti ŵaakuilichisye kwannope che Sauli ni achiŵanagwe, ni ŵaauleje che Yonatani ni che Abinadabu ni che Malikishua ŵanache ŵa che Sauli. 3 Ngondo ku che Sauli jaliji jakulimba nnope. Ŵandu ŵali ni mipamba ŵansimene che Sauli ni ŵansomile ni ŵammulesye kwannope. 4 Nipele che Sauli ŵansalile mundu juŵanjigalile yakumenyanilana, "Nsolomole lipanga lyenu musome une, kuti ŵandu ŵangaumbala ngasaika kundendela yachipongwe." Nambo mundu juŵanjigalile yakumenyenilana jula ŵajogwepe kwannope, namose nganalinga kutenda yeleyo. Nipele, che Sauli ŵajigele lipanga lyakwe ŵalisomile nsyene. 5 Ni mundu juŵanjigalile yakumenyanilana jula paŵaiweni kuti che Sauli awile, nombejo ŵalisomile lipanga lyakwe ŵawile. 6 Kwayele che Sauli ni achiŵanagwe ŵatatu ŵawile, ni nganapagwa jwajuli jose mu uŵelesi wakwe juŵaliji mwenye. 7 Ni Ŵaisilaeli wose uŵatemi ku chiŵata cha Yesileeli paŵaweni ŵangondo ŵaatisile ŵammagongo, ni kuti che Sauli ni achiŵanagwe awile, ŵajilesile misi jao ŵatisile. Nombe Ŵafilisti ŵaiche ni kutama mmisi jo.

8 Kundaŵi kwakwe, Ŵafilisiti paŵapite kukujigala indu ya ŵandu ŵawilewo, ŵagasimene malilo ga che Sauli ni malilo ga achiŵagwe kulitumbi lya Giliboa. 9 Ŵambusile che Sauli yakuwala yakwe, ŵaukatile ntwe wakwe ni kuujigala pamo ni yakumenyanilana yakwe, nipele ŵaatumile ŵandu ajaule kuchilambo chose cha ku Filisiti kukusala ngani ji ku nyuumba syose siŵapopelaga inyago yao ni ŵandu ŵao. 10 Ŵaiŵisile yakumenyanilana ya che Sauli mu nyuumba jakupopelela minungu jao, nipele ŵaukoleche ntwe wakwe mu nyuumba ja nnungu jwao jwakuŵilanjikwa Dagoni. 11 Nambo ŵandu ŵa ku Yabeshi Gileadi paŵapikene yose yati Ŵafilisiti ŵaatendele che Shauli, 12 ŵandu ŵajiganyikwe yambone ngondo ŵapite kukugajigala malilo ga che Sauli ni achiŵanagwe, ŵagaichisye ku Yabeshi. Ŵaasichile kusi chitela cha mwaloni kwele ku Yabeshiko, ni ŵatemi moŵa saba pangalya chilichose atamuno nganaang'wa chindu.

13 Che Sauli ŵawile ligongo nganaŵa mundu jwakukulupilichika kwa Ambuje Akunnungu. Nganalijitichisya liloŵe lya Ambuje Akunnungu, ni ŵalinjile kuŵenda ushauli kwa mundu jwachisango, 14 pamalo pa kwausya Ambuje Akunnungu. Kwayele Ambuje Akunnungu ŵaatendekasisye aulajikwe, ni umwenye wakwe ŵampele che Daudi mwana jwa che Yese.