1 Pakumala yeleyo ŵalijinjisye Lisanduku lya Lilangano lya Akunnungu, ni kuliŵika mu lisakasa liŵalikolosisye che Daudi. Sooni ŵatyosisye mbopesi sya kutinisya ni sya chitendewele paujo pa Akunnungu. 2 Che Daudi paŵamasile kutyosya mbopesi sya kutinisya ni sya chitendewele syo, ŵapele upile ŵandu kwa lina lya Ambuje Akunnungu, 3 ni ŵagaŵile Ŵaisilaeli wose, achalume ni achakongwe, kila mundu ŵapatile nkate ni chipande cha nyama jejoche ni nkate wakuwanganya ni sabibu.

4 Soni ŵasagwile Ŵalawi ŵane aŵe ŵakutumichila paujo pa Lisanduku lya Ambuje Akunnungu kuti ŵaapopelele ni kwaatogolela ni kwaalapa Ambuje Akunnungu, Akunnungu ŵa Isilaeli. 5 Ŵaasagwile che Asafu kuŵa chilongola ŵao, achikamuswagwa ni che Sekalia, ni che Yeieli ni che Shemilamoti, che Yehieli, che Metitia ni che Eliabu ni che Benaya ni che Obedi Edomu ni che Yehieli, ŵaasagwile aŵe ŵakugomba inanda ni ing'wenyengw'enye. Che Asafu ŵagombile tugoma twamwana, 6 nombe ŵambopesi che Benaya ni che Yahalieli, ŵasagulikwe kuŵa ŵakugomba lipenga pangalechela chitema paujo pa Lisanduku lya Lilangano lya Akunnungu. 7 Chindu chaandanda chiŵachitesile che Daudi lyele lyuŵa lyo chaliji kwaapa che Asafu ni achinjakwe Ŵalawi masengo ga kwajimbila Ambuje Akunnungu nyimbo sya kwatogolela.

8 Mwatogolele Ambuje Akunnungu,

nlilape liina lyakwa

mwamanyisye ŵandu ukulu wao,

mwasalile ŵandu ŵa ilambo yose indu iyaitesile!

9 Mwajimbile ŵelewo, mwajimbile nyimbo sya syakwalapa,

nnyisale ipanganyo yakwe yakusimosya!

10 Nlikusye liina lyao lyalikukundikwa kwa kwapopelela,

Ŵakwachimbichisya Ambuje Akunnungu asangalale.

11 Mwajaulilanje Ambuje Akunnungu ŵakwete machili,

mwapopelele Ambuje Akunnungu moŵa gose.

12 Nkumbuchile ipanganyo yakusimosya iŵaitesile,

yakusimonjeka yao ni malamusi gaŵalamwile.

13 Ŵanyamwe iŵelesi ya che Abulahamu, jwakutumichila jwao

ŵanyamwe iŵelesi ya che Yakobo, unsagulikwe ni Ambuje.

14 Ŵele ni ŵali Ambuje Akunnungu, Akunnungu ŵetu,

ulamusi wao uli pachilambo pose.

15 Ŵele akulikamulichisya lilangano lyao moŵa gose pangali mbesi,

akukwanilisya chilanga chao kwa iŵelesi yejinji.

16 Akulikamulichisya lilangano lyaŵatesile ni che Abulahamu,

ni chilanga chaŵalumbilile che Isaka.

17 Akukwanilisya chilanga chiŵatesile ni che Yakobo,

ni ku Isialeli chiŵe lilangano lya moŵa gose pangali mbesi.

18 Ŵatite, "Chinampe mmwe chilambo cha Kaanani,

Tichiŵe chenu mwachimisyene."

19 Pamwaliji nganintupe,

elo mwanondipe ni kuŵa achalendo mu chilambo cho,

20 Mwajendagajendaga kutyochela liuto li mpaka liuto line,

kutyochela ku umwenye umo mpaka wine,

21 Akunnungu ngananlechelela mundu jwalijose kummonelanga ŵanyamwe,

ŵaajamwiche mamwenye kwaligongo lyao,

22 "Ngasimwakwaya ŵandu ŵangu ŵanasagwile,

ngasimwaulasya ŵakulondola ŵangu!"

23 Mwajimbilanje Ambuje Akunnungu pachilambo pose.

Njenesye moŵa gose kwa ŵandu ŵane yakuti atukulupwisye uwe.

24 Mwasalile ŵandu ŵa ilambo ukulu wakwe,

mwasalile ŵandu wose indu yakusimwosya yaakuitenda.

25 Pakuŵa Ambuje Akunnungu ali ŵakulu, akulapikwa kwannope

akuŵajilwa kwajogopa kujipunda minungu jose.

26 Minungu jose ja ŵandu ŵa ilambo ine jangali chindu,

nambo Ambuje Akunnungu ŵagumbile kwinani.

27 Ukulu ni lumbili yasyungwile,

Machili ni uchimbichimbi ili mmakono mwawo.

28 Mwape Ambuje Akunnungu luchimbichimbi mwanyamwe ŵandu wose ŵa kila chilambo pachilambo pose,

elo, mwalape Ambuje Akunnungu kwa ukulu ni machili gao.

29 Mwachimbisye Ambuje Akunnungu ligongo lya ukulu wa lina lyao,

nnyiche nao mbopesi sya kutisya ni njinjile mu nyuumba jao.

Mwapopelele Ambuje Akunnungu pamalo pakwe pakukundikwa kwa kwapopelela.

30 Ŵandu ŵa chilambo chose; ntetemele paujo pakwe!

Achilimbikesye chilambo, ngachitinganyika.

31 Kwinani ni chilambo isengwe!

Ŵandu papali pose pa chilambo asaleje kuti, "Ambuje Akunnungu akutawala!"

32 Bahali ni indu yose yaigumbikwe yaili mwelemo yalape ŵelewo!

migunda ni indu yose yaili mwelemo isangalale,

33 itela yose mwikonde tiijimbe ichisengwaga

katema Ambuje Akunnungu pachaiche kwalamula ŵandu pachilambo.

34 Mwaatogolele Ambuje Akunnungu pakuŵa ali ŵambone,

unonyelo ŵakwe ukutamilisya moŵa gose pangali mbesi!

35 Mwasalile Ambuje Akunnungu, "Ntukulupusye, alakwe Akunnungu ŵa ukulupusyo wetu,

ntusonganganye pamo kutyochela ku ilambo,

kuti tukombole kulitogolela lina lyenu lyalikukundikwa kwa kwapopelela,

tulole ukulu ni yankuti kulapikwa."

36 Alapikwe Ambuje Akunnungu, Akunnungu ŵa ku Isilaeli,

kutandilila moŵa gose pangali mbesi ni moŵa gose pangali mbesi!

Nipele ŵandu wose ŵatite "Elo!" Sooni ŵalapile Ambuje Akunnungu.

37 Kwayele, mwenye che Daudi ŵaalesile che Asafu ni Ŵalawi achinjakwe pamalo paŵaliŵisile Lisanduku lya Lilangano lya Ambuje Akunnungu kwaligongo lya masengo gagakusachilwa gapanganyikwe paujo pa Lisanduku kila lyuŵa. 38 Che Obedi Edomu, mwanache ju che Yedusuni, pamo ni achinjakwe sitini ni nane ŵaakamwisye. Che Obed Edomu mwanagwao che Yedusuni ni che Osea ŵaliji ŵakulindilila nnango wekulungwa.

39 Mwenye che Daudi ŵaŵisile jwambopesi che Sadoki ni ŵambopesi achinjakwe aŵe ŵakutumichila mu Lisakasa lya Ambuje Akunnungu lilyaliji pa malo pakwapopelela Akunnungu kwele ku Gibeoni ko, 40 kuti ŵaapelechele Ambuje Akunnungu mbopesi sya kutinisya pachanya chilisa cha mbopesi sya kutinisya moŵa gose pangali mbesi kundaŵi ni ligulo, imo ni yose yailembekwe mmalamusi ga Ambuje Akunnungu gaŵalamulile Ŵaisilaeli. 41 Ŵaŵapanganyisye masengo pamo ni ŵanyao ŵaliji che Emani ni che Yedusuni ni aŵala wose uŵasagulikwe ni kukolanjikwa meena, kuti ŵaatogolele Ambuje Akunnungu pakuŵa unonyelo wao wangagalauka. 42 Che Emani ni che Yedusuni ŵaliji ni masengo ga kugomba imbeta, ni tugoma twamwana ni kugomba yombo ine ligongo lya nyimbo sya kwalapa Akunnungu. Ŵanache ŵa che Yedusuni ŵasagulikwe kulindilila pannango.

43 Nipele, ŵandu wose ŵatyosile ni kwaula kumangwawo, nombe che Daudi ŵapite kumangwawo kukwaapa upile ŵamu nyuumba jakwe.