1 Che Daudi ŵaŵechetesyene ni achakulu ŵa ŵangondo ŵa mipingo ja ŵandu elufu moja ni mipingo ja ŵandu mia moja pamo ni ilongola yose. 2 Nipele ŵaasalile Ŵaisilaeli wose uŵasongangene, "Naga nyiwonaga kuti ili yambone, ni iŵaga uli usache wa Ambuje Akunnungu, Akunnungu ŵetu, nipele tupeleche utenga kwa achalongo ŵetu ŵane ŵaali kwatalika ni mwakuŵandichila mu chilambo chose cha ku Isilaeli. Sooni tupeleche kwa ŵambopesi ni Ŵalawi ŵaali pamo nao mmisi jao ni mmalo syao sya kulisisya ilango yawo, aiche kukamulangana pamo ni uwe. 3 Nipele tujaule tukalijigale Lisanduku lya Lilangano lya Akunnungu ŵetu, pakuŵa nganitujaula kwausya Akunnungu tupanganye ichichi katema ka umwenye u che Sauli." 4 Ŵandu wose ŵajitichisyene kutenda yeleyo pakuŵa yawoneche kuti chili chindu chambone kwa ŵandu wose.

5 Kwayele, che Daudi ŵaasongangenye Ŵaisilaeli wose, kutandilila ku kasulo ka Shiholi kakali ku Misili, mpaka kundago ja Lebo Hamati kuti aiche nalyo Lisanduku lya Lilangano lya Akunnungu kutyochela ku Kiliati Yealimu mpaka ku Yelusalemu. 6 Che Daudi, pamo ni Ŵaisilaeli wose ŵapite mpaka musi wa ku Baala, yaani ku Kiliasi Yealimu, ku chilambo cha ku Yuda, kuti kutyochela kweleko akalijigale Lisanduku lya Lilangano lya Akunnungu lyalikuŵilanjikwa kwa lina lya Ambuje Akunnungu jwakutama pachitengu chakwe cha umwenye chachili pasikati ja yepanganyikwe yaili ni mapapiko. 7 Nipele, ŵalijigele Lisanduku lya Lilangano lya Akunnungu ni mutuka jajikukwekwelemwa ni ng'ombe jampya kutyochela mu nyuumba ja che Abinadabu. Che Usa ni che Ahio ni uŵajendesyaga mutuka jo. 8 Che Daudi ni ŵandu wose ŵa ku Isilaeli ŵatyasile kwa machili gao gose, paujo pa Ambuje Akunnungu. Ŵajimbile ni kugomba ing'wenyegw'enye ni inanda ni tugoma twamwana ni matoasi ni mapenenga.

9 Paŵaiche pa luŵala lwa kukung'undila magungulo wauli ku Kidoni, che Usa ŵatambalukwile nkono ŵao kulikamulila Lisanduku lya Lilangano lya Ambuje Akunnungu likagwa ligongo mikambaku ja ng'ombe ŵalikuŵele. 10 Nipele Ambuje Akunnungu ŵaatumbilile che Usa ligongo lya kulikamula lisandukulyo, ni ŵamputile. Che Usa ŵawile papopo paujo pa Akunnungu. 11 Che Daudi ŵatumbile ligongo Ambuje Akunnungu ammuleje che Usa ali ni chisongolo. Kwaligongo lyo pamalo po pakuŵilanjikwa Pelesi Usa mpaka lelo jino.

12 Lyele lyuŵa lyo che Daudi ŵaajogwepe Akunnungu, ŵatite, "Sambano ching'ombole chinauli kulijigala Lisanduku lya Akunnungu kumangwangu?" 13 Nipele, che Daudi nganalijigala Lisanduku lya Lilangano lya Akunnungu lyo kulijausya ku Musi wa che Daudi, nambo ŵalipeleche kunyuumba ji che Obedi Edomu ŵa kutyochela ku Gati. 14 Lisanduku lya Lilangano lya Ambuje Akunnungu lyatemi ku che Obedi Edomu kwa miesi jitatu, nombe Ambuje Akunnungu ŵaajipele upile nyumba ji che Obedi Edomu pamo ni yose yakwete.