1 Che Daudi paŵamasile kusitaŵa nyuumba syakwe ku musi wa che Daudi, ŵaakolosisye Lisanduku lya Akunnungu, nipele ŵaalijimiche lisakasa. 2 Nipele ŵatite, "Ngapagwa mundu jwalijose jwachalijigale Lisanduku lya Akunnungu ikaŵe Ŵalawi, pakuŵa Ambuje Akunnungu ŵaasagwile ŵanyawo kulijigala ni kwatumichila moŵa gose pangali mbesi." 3 Nipele, che Daudi ŵasongangenye Ŵaisilaeli wose aiche ku Yelusalemu, kuti aliichisye Lisanduku lya Ambuje Akunnungu pamalo paŵapakolochesye. 4 Nipele che Daudi ŵaŵilasile iŵelesi ya che Haluni ni ya Ŵalawi. 5 Kutyochela mu ntundu wa che Kohati, ŵaiche che Ulieli chilongola pamo ni achapwao mia moja na ishilini. 6 Kutyochela mu ntundu u che Melali ŵaiche che Asaya chilongola pamo ni achapwao mia mbili na ishilini. 7 Kutyochela mu ntundu u che Gelishomu, ŵaiche che Yoeli chilongola pamo ni achapwao mia moja na selasini. 8 Kutyochela mu ntundu u che Elisafani, ŵaiche che Shemaya chilongola pamo ni achapwao mia mbili. 9 Kutyochela mu ntundu wa che Hebuloni, ŵaiche che Elieli chilongola pamo ni achapwao semanini. 10 Kutyochela mu ntundu u che Usieli, ŵaiche che Aminadamu chilongola pamo na achapwao mia moja kumi na mbili.

11 Nipele, che Dauli ŵaŵilasile ŵambopesi ŵaŵili, ŵambopesi wo ali che Sadoki ni che Abiasali. Sooni ŵaaŵilasile Ŵalawi sita, che Ulieli ni che Asaya ni che Yoeli ni che Shemaya ni che Elieli ni che Abinadamu, 12 Ŵaasalalilenje, "Ŵanyamwe ndinji ilongola wa mitundu ja Ŵalawi. Ŵanyamwe pamo ni Ŵalawi achinjenu, nlijosye kuti mme ŵakukundikwa kwa kwapopelela Akunnungu nkaliiche nalyo Lisanduku lya Ambuje Akunnungu, Akunnungu ŵa Isilaeli, mpaka pamalo pangolosisye kwa ligongo lya Lisanduku lyo. 13 Pakuŵa ulendo waandanda nganinlijigala, Ambuje Akunnungu, Akunnugu ŵetu ŵaatujamwiche pakuŵa nganituwausya yakuti kutenda kuti tukombole kuliichisya mpela iŵatite pakutulajisya."

14 Nipele, ŵambopesi ni ŵalawi ŵalityosisye kwa ligongo lya Ambuje kuti aliichenalyo Lisanduku lya Ambuje Akunnungu, Akunnungu ŵa ku Isilaeli. 15 Ŵalawi ŵalijigele Lisanduku kwa chisanyasanya mmakoyo mwao mpela iŵatite kulajisya che Musa, malinga liloŵe lya Ambuje Akunnungu.

16 Che Daudi ŵaasalile ilongolo ŵa Ŵalawi kuti ŵaasalile achalongo achinjao ŵakwimba kuti ajimbeje nyimbo sya kusangalala ni kugomba ing'wenyegw'enye ni imbeta ni tugoma twamwana. 17 Kwayele ŵeleŵa ni Ŵalawi ŵaŵasagulikwe kutyochela kwa ŵakwimba, che Hemani mwana ju che Yoeli kutyochela pasikati ja achapwakwe, ni che Asafu mwana jwa che Belekia kutyochela pasikati ja achalongo achinjakwe Ŵamelali, ni che Etani mwana ju che Kushaia. 18 Nipele ŵasagwile Ŵalawi ŵane aŵe ŵakamusi ŵao kwa kukamula nafasi jaaŵili, che Sekalia ni che Yaasieli ni che Shemilamoti ni che Yehieli ni che Uni ni che Eliabu ni che Benaya ni che Maaseya ni che Matitia ni che Elifelehu ni che Mikineya. Sooni ŵaasagwile ŵakulindilila pannango, che Obedi Edomu ni che Yeieli. 19 Che Hemani ni che Asafu ni che Etani ŵasagulikwe kuti agombeje ing'wenyeng'wenye yaikolesekwe kwa madini ga shaba. 20 Che Sekalia ni che Asieli ni che Shemilamoti ni che Yeieli ni che Uni ni che Eliabu ni che Maaseya ni che Benaya, ŵaalinji ŵakugomba imbeta ya liloŵe lya Alamoti. 21 Nambo che Matitia ni che Elifelehu ni che Mikineya ni che Obedi Edomu ni che Yeieli ni che Asasia ŵasagulikwe kuti agombeje ing'wenyeng'wenye achilongoswagwa ni liloŵe lya Sheminiti.

22 Nombe che Kenani ligongo lya umanyilisi wakugombela ung'asi uŵaliji nao, ŵaŵichikwe aŵe chilongola jwa ŵakwimba wose. 23 Che Belekia ni che Elikana ŵaliji ŵakulilindilila Lisanduku lya Lilangano. 24 Che Shebania ni che Yoshafati ni che Netaneli ni che Amasai ni che Sekalia ni che Benaya ni che Eliezeli, uŵaliji ŵambopesi, ŵasagulikwe aŵeje ŵakugomba mapenenga paujo pa lisanduku lya Akunnungu. Che Obedi Edomu ni che Yehiya ŵaŵichikwe aŵe ŵakulindilila Lisanduku lya lilangano lya Akunnungu.

25 Nipele, che Daudi ni ilongola ŵa Ŵaisilaeli ni achakulu ŵa ŵangondo ŵa mipingo ja ŵandu elufu moja, ŵajawile kulijigala Lisanduku lya Lilangano lya Ambuje Akunnungu kutyochela ku nyuumba ji che Obedi Edomu alinkusengwa. 26 Ŵaatyochesye Akunnungu mbopesi sya mikambaku ja ng'ombe saba ni ngondolo tonde saba, ligongo Akunnungu ŵakamusisye Ŵalawi uŵajigele Lisanduku lya Lilangano lya Ambuje Akunnungu ŵala. 27 Che Daudi ŵaŵalile mwinjilo ŵeswela mbee, nti yatite kuwala Ŵalawi wose ŵaŵajigele Lisanduku lya lilangano lya Akunnungu, ni ŵakwimba ŵaŵalile iyoyo pamo ni che Kenania chilongola juŵalongosyaga nyimbo sya ŵakwimba. Che Daudi ŵaawete nombe chisibao cheswela mbee. 28 Kwayele, Ŵaisilaeli wose ŵalijigele Lisanduku lya Lilangano lya Ambuje Akunnungu kwa kusengwa achiputaga misengo ja ngondolo tonde ni mapenenga ni tugoma twamwana ni kugomba ing'wenyeng'wenye ni imbeta.

29 Katema Lisanduku lya Lilangano lya Ambuje Akunnungu palyajinjilaga mmusi u che Daudi, che Mikali mwali ju che Sauli ŵalingulilaga pedilisha, paŵammweni mwenye che Daudi alinkung'anda ni kusangalala, nipele ŵaanyelwisye chamuntima.