1 Aga gali meena ga ŵandu ŵa ku Isilaeli ŵaŵaliji ilongola ŵa paulongo wao ni ilongola ŵa mipingo ja ŵangondo elufu moja ni mipingo ja ŵangondo mia moja ni achakulu ŵaŵantumichile mwenye che Daudi pa kupanganya masengo mkupisyangana kwinjila ni kutyoka. Kila mwesi ni kila chaka, mpingo wakupisyangana wa ŵandu elufu ishilini na nne ŵakamulaga samu jakupanganya masengo.

2 Mwesi waandanda juŵajimilile mpingo waandanda ŵaliji che Yashobeamu mwanache jwa che Sabudieli. Mpingo wakwe waliji ni ŵangondo elufu ishilini na nne. 3 Jweleju ŵaliji jwa uŵelesi wa che Pelesi jwa lukosyo lwa Yuda, nombejo ŵaliji jwankulu jwa ilongola wosepe ŵa ŵangondo pa mwesi waandanda. 4 Juŵajimilile mpingo waaŵili pa mwesi waaŵili ŵaliji che Dodai jwa uŵelesi wa che Ahohi. Mpingo wakwe ŵaliji ni ŵangondo elufu ishilini na nne. 5 Juŵajimilile mpingo waatatu pa mwesi waatatu ŵaliji che Benaya mwanache jwa che Yehoyada jwambopesi. Jweleju ni juwaliji chilongola jwa mpingo wakwe uwaliji ni ŵangondo elufu ishilini na nne. 6 Ajuju ni ajula che Benaya juŵaliji mundu jwamchili pasikati ja aŵala ŵandu selasini, ni sooni ŵaliji chilongo jwa mpingo wo. Ni che Amisabadi mwanagwe ni juŵaliji jwankulu pa mpingo wakwe. 7 Juŵajimilile mpingo wancheche pa mwesi wancheche ŵaliji che Asaeli, mpwakwe che Yoabu, che Sebadia mwanagwe ni juŵajimilile pamalo pakwe. Mpingo wakwe waliji ni ŵangondo elufu ishilini na nne. 8 Juŵajimilile mpingo wa nsano pa mwesi wansano ŵaliji che Shamuhuti jwa uŵelesi wa Mwisilahi, nombe jweleju mpingo wakwe waliji ni ŵangondo elufu ishilini na nne. 9 Juŵajimilile mpingo wa sita pa mwesi wa sita ŵaliji che Ila mwana jwa che Ikeshi, kutyochela ku Tekoa. Mpingo wakwe waliji ni ŵangondo elufu ishilini na nne. 10 Juŵajimilile mpingo wa saba pa mwesi wa saba ŵalji che Helesi, jwantundu wa Peloni kutyochela mu lukosyo lwa Efulaimu. Mpingo wakwe waliji ni ŵangondo elufu ishilini na nne. 11 Juŵajimilile mpingo nane pa mwesi wa nane, ŵaliji che Sibekai, jwa uŵelesi wa che Sela kutyochela musi wa ku Hushati. Mpingo wakwe waliji ni ŵangondo elufu ishilini na nne. 12 Juŵajimilile mpingo wa tisa pa mwesi wa tisa ŵaliji che Abieseli, jwa kutyochela musi wa ku Anatoti lukosyo lwa Benjamini. 13 Juŵajimilile mpingo wa likumi pa mwesi wa kumi ŵaliji che Mahalai jwakutyochela ku Netofati. Jweleju jwaliji jwa ntundu wa che Sela, nombe najo mpingo wakwe walji ni ŵangondo elufu ishilini na nne. 14 Juŵajimilile mpingo wa kumi na moja pa mwesi wa kumi na moja ŵaliji che Benaya kutyochela ku Pilatoni malo ja ŵandu ŵa lukosyo lwa Efulaimu. Nombeju mpingo wakwe waliji ni ŵangondo elufu ishilini na nne. 15 Juŵajimilile mpingo wa kumi na mbili pa mwesi wa kumi na mbili ŵaliji che Helidai jwauŵelesi wa che Otinieli, kutyochela ku Netofati. Nombeju mpingo wakwe waliji ni ŵangondo elufu ishilini na nne.

16 Aga gali meena ga ŵandu ŵaŵaliji achakulu ŵa ngosyo sya ku Isilaeli. Kwa Ŵalobeni ŵaliji che Eleasali mwanache ju che Sikili, kwa Ŵasimeoni ŵaliji che Shefatia mwanache ju che Maaka, 17 kwa Ŵalawi waliji che Hashabia mwanache ju che Kemueli ni kwa Ŵaaluni ŵaliji che Sadoki, 18 kwa Ŵayuda ŵaliji che Elihu jumo mwa achapwakwe mwenye che Daudi, ni Ŵaisakali ŵaliji che Omuli mwanache ju che Mikaeli, 19 kwa Ŵasabuloni ŵaliji che Ishumaia mwanache ju che Obadia ni kwa Ŵanafutali ŵaliji che Yelimoti mwanache ju che Asilieli, 20 kwa Ŵaefulaimu ŵaliji che Hoshea mwanache ju che Asasia ni kwa nusu ja lukosyo lwa Manase ŵaliji che Yoeli mwanache ju che Pedaia, 21 kwa nusu ja lukosyo lwa Manase kwele ku Gileadi ko ŵaliji che Ido mwanache ju che Sakalia ni kwa Ŵabenjamini ŵaliji che Yaasieli mwanache ju che Abuneli, 22 kwa Ŵadani ŵaliji che Asaleli mwanache ju che Yelohamu. Ŵelewo ni ŵaŵaliji achakulu ŵa ngosyo sya Ŵaisilaeli.

23 Mwenye che Daudi nganiŵaŵalanga ŵandu ŵanganaichila yaka ishilini pakuŵapo Ambuje Akunnungu, ŵalanjile kwachuluya Ŵaisilaeli aŵeje achajinji mpela ndondwa sya kumaunde. 24 Che Yoabu mwanache ju che Seluya ŵatandite kwaŵalanga ŵandu nambo nganamalisya. Kwaligongo lya kwaŵalanga ŵandu, lutumbilo lwa Akunnungu lwaiche pachanya pa Isilaeli, nombe uŵalanje wo nganiulembekwa mu itabu ya chikumbuchisyo cha mwenye che Daudi.

25 Mundu juŵajimilile mbiko sya mwenye che Daudi ŵaliji che Asimaweti mwanache ju che Adieli. Che Yonatani mwanache ju che Usia ŵajimilile mbiko jijaliji mmamigunda, mmisi ni mmisinda ni pa likome. 26 Juŵaajimililaga ŵamasengo ga kulima mmigunda ŵaliji che Esili mwanache ju che Kelebu. 27 Juŵajimililaga migunda ja misabibu ŵaliji che Shimei, jwa ku Lamati. Juŵajimililaga kukolosya ni kujigosa divai mmalo mwakwe ŵaliji che Sabidi jwakutyochela ku Shifimi 28 Juŵajimililaga migunda ja misabibu ni mikuju ja ku Shefela ŵaliji che Baala Hanani, jwa ku Gedeli. Juŵajimililaga ngokwe sya mauta ŵaliji che Yoashi. 29 Juŵajimililaga ilango iyaliji ku Shaloni ŵaliji che Shitilai, jwa ku Shaloni. Juŵajimililaga ilango iyaliji ku iŵata ŵaliji che Shafati mwanache ju che Adilai. 30 Juŵajimililaga ngamia ŵaliji che Obili jwa uŵelesi wa Ishimaeli. Juŵajimililaga mbunda ŵaliji che Yedeya, jwa ku Melonoti. 31 Juŵajimillaga mipingo ja ngondolo ŵaliji che Yasisi, Mhagali. Ŵanawose wo ni uŵaliji ŵakwimilila ipanje ya mwenye.

32 Che Yonatani, njombagwe mwenye che Daudi, ŵaliji mshauli, mundu jwali ni umanyilisi ni jwakulemba. Jweleju ni che Yehieli mwanache ju che Hakimoni ŵaajinganyisye ŵanache ŵa mwenye. 33 Che Ahitofeli ŵaliji mshauli jwa mwenye, ni che Hushai jwa ku Aliki ŵaliji mbusangagwe mwenye. 34 Che Ahitofeli paŵawile, che Yehoyada mwanache ju che Benaya pamo ni che Abiasali ŵajigele lipesa, ŵaliji ŵashauli ŵa mwenye. Che Yoabu ŵaliji chilongola jwa mipingo jose ja ŵangondo wosepe ŵa mwenye.