1 Ŵanache ŵa che Lobeni, jwakwitio jwa che Isilaeli. Nachiŵamuno che Lobeni ŵaliji jwakwitiwo nambo chigolochelo chakwe cha jwakwitiwo ŵapegwilwe che Yusufu mpwakwe ligongo che Lobeni ŵagonile ni chilanga cha atatigwe. Kwayele, nganalembekwa mu ntundu wao malinga ni kuŵa mwanache jwa kwitiwo. 2 Atamuno ŵandu ŵa lukosyo lwa Yuda ni ŵaŵaliji ni machili nnope kupunda achapwakwe wose, ni ilongola ŵatyochele mwa ŵeleo, nambo upile wa kuŵa mwanache jwakwitio waliji u che Yosefu. 3 Ŵanache ŵachilume ŵa che Lobeni, jwakwitio ju che Isilaeli, ŵaliji che Hanoki ni che Palu, ni che Esiloni ni che Kalimi.

4 Uŵelesi wine wa che Lobeni waliji che Yoeli. Che Yoeli ŵammeleche che Shemaya ni che Shemaya ŵammeleche che Gogi ni che Gogi ŵammeleche che Shimei, 5 ni che Shimei ŵammeleche che Mika ni che Mika ŵammeleche che Leaiya ni che Leaiya ŵammeleche che Baali, 6 ni che Baali ŵammeleche che Beela. Che Beela ŵaliji chilongola jwa lukosyo lwa Lobeni. Nambo che Tigilasi Pileseli mwenye jwa ku Ashulu ŵankamwile ni kunjigala kunjausya ku usami ku Ashulu.

7 Achakulu ŵa mitundu ŵaŵalembekwe mu meena ga chikumbuchisyo cha lukosyo lwa che Lobeni ŵaliji che Yeieli ni che Zekalia, 8 ni che Bela, mwanache jwa che Azazi mwanache ju che Shema, mwanagwawo che Yoeli. Ŵelewo ŵatemi ku musi wa ku Aloeli wauli chakumpoto kwa musi wa ku Nebo ni ku Baali Meoni. 9 Ilango yao yaŵelekene kwannope ni kuŵa yejinji, kwayele ŵanyao ŵajenele chakungopochelo lyuŵa mpaka mungulugulu mwa chipululu, chakumpoto kwa lusulo lwa Eufulate.

10 Katema mwenye che Sauli paŵaliji nkutawala, lukosyo lwa che Lobeni ŵaputene ngondo ni uŵelesi ŵa Hajili, ŵauleje kungondo ni kwasumula malo jao jose chakungopochelo lyuŵa kwa chilambo cha ku Gileadi, ni ŵatemi mwelemo.

11 Lukosyo lwa Gadi lwatemi chiŵandi ni lukokosyo lwa Lobeni chakumpoto ku chilambo cha ku Bashani, chachijenele chakungopochelo lyuŵa mpaka ku Saleka. 12 Che Yoeli ni juŵaliji chilongola jwa ntundu waandanda, che Shafamu ŵaliji chilongola jwa ntuundu waaŵili. Che Yanai ni che Shefati ŵaliji ilongola ŵa mitundu jine kwele ku Bashaniko. 13 Ni achalongo ŵao malinga ni mitundu jao ŵaliji saba: Che Mikaeli ni che Meshulamu ni che Sheba ni che Yolai ni che Yaakani ni che Zia ni che Ebeli. 14 Woseŵa ŵaliji ŵanache ŵa che Abihaili, juŵaliji mwanache ju che Huli, mwanache ju che Yaloa, mwanache ju che Yeshishai, mwanache ju che Yado, mwanagwao che Buzi. 15 Che Ahi, juŵaliji mwanache ju che Abdieli ni chisukulu chi che Guni, ŵaliji chilongola jwa mitundu ji. 16 Ŵagadi ŵatamaga ku Gileadi, kwele ku Bashani ko pamo ni misinda jakwe jijasyungulile, sooni ku chilambo chose mwakulisisya inyama ku Shaloni kose, ŵajenele. 17 Yele yose yalembekwe mu chikumbuchisyo cha ntundu, katema che Yotamu paŵatawele ku Yuda, ni che Yeloboamu pŵatawele ku Isilaeli.

18 Ŵandu ŵa ngosyo sya Lobeni, Gadi ni nusu ja lukosyo lwa Manase ŵa kungopochelo lyuŵa, ŵakwete ŵa ngondo ŵajiganyikwe yambone kuputana ngondo ŵaali ni chakulisiŵila pantima na mapanga, ni ŵakukuta maukunje, ŵaliji elufu alubaini na nne ni mia saba ni sitini. 19 Ŵaputene ngondo ni ngosyo sya uŵelesi wa Hajili, Ŵayetuli, Ŵanafishi, Ŵanodabu. 20 Ŵaakulupalile Akunnungu ni ŵaapopelele kuti ŵakamuchisye, nombe Akunnungu ŵaajitichisye ni ŵaaputile ngosyo sya uŵelesi wa Hajili ni achambusanga ŵao. 21 Ŵaasumwile inyama yaikuŵilanjikwa ngamia elufu hansini, ngondolo laki mbili ni elufu hansini, mbunda elufu mbili, ni ŵandu uŵakamwilwe mateka laki moja. 22 Ŵaauleje ŵammagongo achajinji nnope ligongo Akunnungu ŵaputene kwaligongo lyao. Ni ŵanyao ŵajendelechele kutama muchilambo mo, mpaka katema ka kwajausya ku usami.

23 Ŵandu nusu ja lukosyo lwa Manase ŵaliji achajinji nnope, ŵatemi kutandilila ku Bashani mpaka ku Baali Helimoni, yaani ku Senili ni ku chitumbi cha Helimoni. 24 Ni ŵanyaŵa ni uŵaliji ilongola ŵa ngosyo syo: Che Efeli ni che Ishi ni che Elieli ni che Azilieli ni che Yelemia ni che Odavia ni che Yadieli. Wose ŵaliji ŵandu ŵangondo ŵajiganyikwe yambone kuputana ngondo, ni ŵandu ŵakumanyika kwannope ni sooni ŵaliji ilongola ŵa mitundu jao.

25 Nambo ŵandu nganiŵajitichisya Akunnungu juŵapopelelwagwa ni achambuje ŵao. Ŵatandite kujipopelela minungu jine ja ŵandu ŵa ilambo, yati Ambuje Akunnungu ŵaijonasile paujo pao. 26 Nipele, Ambuje Akunnungu ŵa ku Isilaeli ŵantesile che Pulu, mwenye jwa ku Ashulu, mwenye ju liina lyakwe liine ŵaŵilanjikwe che Tigilasi Pileseli, achigungumuchile chilambo chao ni kwajigala mateka Ŵalobeni ni Ŵagadi ni nusu ja ŵandu ŵa lukosyo lwa Manase, kwajausya ku usami. Ŵaajawisye kwele ku Alaa kula ni ku Aboli ni ku Hala, mungulugulu lusulo lwa Gozani, kuŵatemi mpaka lelo jino.