1 Che Isilaeli ŵaliji ni ŵanache kumi na mbili ŵa chilume, ŵanache wo ali che Lobeni ni che Simeoni ni che Lawi ni che Yuda ni che Isakali ni che Zebuloni, 2 ni che Dani ni che Yosefu ni che Benyamini ni che Nafutali ni che Gadi ni che Asheli.

3 Ŵanache ŵachilume ŵa che Yuda uŵaŵelechele ku che Besishua, ŵankwawo ŵa lukosyo lwa Kanaani, ŵaliji che Eli ni che Onani ni che Shela. Che Eli, jwakwitiwo ju che Yuda, ŵaleŵa ŵaliji jwachigongomalo paujo pa Akunnungu, nipele Ambuje Akunnungu ŵammuleje. 4 Che Tamali, akwegwao che Yuda, ŵaŵelechele che Yuda ŵanache ŵaŵili maŵila, che Pelesi ni che Sela. Kwayele ŵanache wose ŵa che Yuda ŵaliji nsano.

5 Ŵanache ŵachilume ŵa che Pelesi ŵaliji ŵaŵili, che Esiloni ni che Amuli. 6 Che Sela mpwakwe ŵakwete ŵanache nsano, ŵanache wo ali che Simuli ni che Esani, ni che Emani ni che Kalikoli ni che Dala. 7 Mwanache ju che Kalimi, ŵaliji che Akani, Jweleju jwaichisye malagasyo kwa Ŵaisilaeli ligongo nganagachimbichisya makanyo gakuti ngasyajigala indu yaityosekwe kwa Ambuje Akunnungu.

8 Che Esani ŵakwete mwanache jwachilume, lina lakwe Asalia.

9 Ŵanache ŵachilume ŵa che Esiloni ŵaliji che Yelameeli, ni che Lamu ni che Kalebu.

10 Che Lamu ŵammeleche che Aminadabu, che Aminadabu ŵammeleche che Nashoni, juŵaliji chilongola jwa lukosyo lwa Yuda. 11 Che Nashoni ŵammeleche che Salumoni, che Salumoni ŵammeleche che Boasi, 12 Che Boasi ŵammeleche che Obedi, che Obedi ŵammeleche che Yese.

13 Che Yese ŵaŵeleche ŵanache achalume saba. Ŵanache wo ali che Eliabu jwakwitiwo jwakwe, ni che Abinadabu ni che Shimea, 14 ni che Netaneli ni che Ladai, 15 ni che Osemu ni che Daudi. 16 Sooni ŵakwete achiŵali ŵaŵili, achiŵali wo ali che Seluya ni che Abigaili.

Ŵanache ŵachilume ŵa che seluya ŵaliji ŵatatu, che Abishani ni che Yoabu ni che Asaeli. 17 Che Abigaili ŵammeleche che Amasa ni atati ŵa che Amasa ŵaliji che Yeseli, jwa uŵelesi wa che Ishumaili.

18 Che Kalebu mwanache ju che Esiloni, ŵalombele achakongwe ŵaŵili. Jwankongwe jumo liina lyakwe che Asuba, ŵammelechele ŵanache ŵatatu, ŵanace wo ali che Yesheli, ni che Shobabu ni che Alidoni. 19 Paŵawile che Asuba, che Kalebu ŵaalombile che Efulata juŵammelechele mwanache jwannume juŵaŵilanjikwe che Huli. 20 Che Huli ŵammeleche che Uli, che Uli ŵammeleche che Besaleli.

21 Che Hesiloni paŵaliji ni yaka sitini, ŵanlombile mwali ju che Makili, nnumbu gwao che Gileadi. Ni ŵaŵeleche mwanache jwannume lina lyakwe che Segubu. 22 Che Segubu ŵammeleche che Yaili juŵatawele misi jekulungwa ishilini na tatu ku chilambo cha ku Gileadi. 23 Nambo mwenye sya ku Geshuli ni ku Alamu syaagunguchile ni kwasumula misi ja ku Haloti Yaili, ni ku Kenati ni misinda jakwe, misi jose jaliji sitini. Wose ŵaŵatamaga mu misi jo ŵaliji uŵelesi u che Makili, atatigwe che Gileadi. 24 Che Hesiloni Paŵawile, che Kalebu ŵajinjile majumba ku che Efulata juŵaliji ŵankwakwe che Hesiloni, atati ŵao. Che Efulata ŵaaŵelechele che Kalebu mwanache lina lyakwe che Ashuli, ni juŵautandisye musi wa Tekoa.

25 Che Yelameeli jwakwitiwo jwa che Heziloni, ŵakwete ŵanache nsano ŵachilume, ŵanache wo ali che Lamu, jwakwitiwo jwakwe, ni che Buna ni che Oleni ni che Osemu ni che Aiya. 26 Che Yelameeli ŵaliji ni liŵasa lina lyao che Atala. Ŵeleŵa ŵammelechele che Yelameeli mwanache jwannume lina lyakwe che Onamu. 27 Ŵanache ŵachilume ŵa che Lamu, juŵaliji jwakwitiwo ju che Yelameeli, ŵaliji che Maasi ni che Yamini ni che Ekali. 28 Ŵanache ŵachilume ŵa che Onamu ŵaliji che Shamai ni che Yada. Nombe ŵanache ŵa che Shamai ŵaliji che Nadabu ni che Abishuli.

29 Che Abishuli ŵalombele, lina lya ŵankwawo lyaliji che Abihaili, nombejo ŵammelechele ŵanache ŵaŵili ŵachilume, ŵanache wo ali che Abani ni che Molidi. 30 Ŵanache ŵachilume ŵa che Nadabu ŵaliji che Seledi ni che Apaimu; Nambo che Seledi ŵawile pangakola mwanache. 31 Che Apaimu ŵaliji ni mwanache jumo lina lyakwe che Ishi. Che Ishi ŵammeleche che Sheshani, ni che Sheshani ŵammeleche che Alai.

32 Che Yada, apwao che Shamai, ŵakwete ŵanache ŵaŵili ŵachilume, ŵanache wo ali che Yeseli ni che Yonatani. Nambo che Yeseli ŵawile pangakola ŵanache. 33 Che Yonatani ŵakwete ŵanache ŵaŵili: Che Pelesi ni che Zaza. Welewo ni uwaliji uŵelesi u che Yelameeli.

34 Che Sheshani nganakola ŵanache ŵachilume; ŵakwete achiŵalipe. Namose yeleyo, ŵaliji ni kapolo jwanchanda jwa kutyochela ku Misili liina lyakwe che Yalia, 35 Kwayele, che Sheshani ŵampele che Yalia mwali jwakwe jumo aŵe ŵankwakwe, nombejo ŵammelechele mwanache jwachilume liina lyakwe che Atai. 36 Che Atai ŵammeleche che Natani, ni che Natani ŵammeleche che Zabadi. 37 Che Zabadi ŵammeleche che Efulali, che Efulali ŵammeleche che Obedi, 38 che Obedi ŵammeleche che Yehu, che Yehu ŵammeleche che Azalia, 39 che Azalia ŵammeleche che Helesi, che Helesi ŵammeleche che Eleasa, 40 che Eleasa ŵammeleche che Sisimai, ni che Sisimai ŵammeleche che Shalumu, 41 che Shalumu ŵammeleche che Yekamia, ni che Yekamia ŵammeleche che Elishama.

42 Jwakwitiwo jwa che Kalebu, mpwakwe che Yelameeli, ŵaŵilanjikwe che Mesha. Che Mesha ŵammeleche che Zifu, ni che Zifu ŵammeleche che Malesha ni che Malesha ŵammeleche che Hebuloni. 43 Che Hebuloni ŵakwete ŵanache ncheche, che Kola ni che Tapua ni che Lekemu ni che Shema. 44 Che Shema ŵammeleche che Lahamu ni che Lahamu ŵammeleche che Yokeamu, nombe che Lekemu nkulugwe che Shema ŵammeleche che Shamai. 45 Che Shamai ŵammeleche che Maoni, ni Maoni ŵammeleche che Beti Suli.

46 Che Kalebu ŵakwete jwamasengo jwakwe lina lyao che Efa. Che Efa ŵammelechele che Kalebu ŵanache ŵatatu ŵachilume, ŵanache wo ali che Halani, che Mosa ni che Gazezi. Che Halani ŵakwete mwanache, nombejo ŵammilasile che Gazezi.

47 Che Yadai ŵakwete ŵanache sita, che Legemu ni che Yotamu ni che Geshani ni che Peleti, ni che Efa ni che Shaafu.

48 Che Kalebu ŵakwete jwamasengo jwine lina lyakwe che Maaka. Che Maaka ŵammelechele che Kalebu ŵanache ŵaŵili: Che Shebeli ni che Tiliana. 49 Sooni che Maaka ŵammelechele che Kalebu ŵanache ŵane, Che Shaafu juŵautandisye musi wa ku Madimana, ni che Sheva juŵatandisye misi ja ku Makibena ni ku Gibea.

Nombe che Kalebu ŵakwete mwali, liina lyakwe che Akisa.

50 Yelei ni iŵelesi i che Kalebu.

Ŵanache ŵa che Huli jwakwitiwo jwao ŵaŵaŵelechele ku che Efulata, ŵakwete ŵanache ŵatatu, Che Shobali, juŵautandisye musi wa ku Kiliasi Yealimu, 51 ni che Salima, juŵautandisye musi wa ku Beselehemu, ni che Helefu, juŵautandisye musi wa ku Beti Gadeli.

52 Iŵelesi i che Shobali, juŵautandisye musi wa Kiliati Yealimu yaliji, ku Haloe, ni nusu ja ŵandu ŵakutama kumusi wa ku Menuhoti, 53 pamo ni mitundu ja ku Kiliati Yealimu, yaani, Ŵaitili ni Ŵaputi, ni Ŵashumati ni Ŵamishilai. Kutyochela ni ŵandu ŵa japagwilwe mitundu ja Ŵasolati ni Ŵaeshitaoli ŵatyochele nkati ŵanduo.

54 Iŵelesi i che Salima, juŵatandisye musi wa ku Beselehemu yaliji, Ŵanetofati, ni Ŵaatiloti Beti Yoabu ni nusu ja Ŵamenahati yaani Ŵasoli.

55 Pamo ni aji mitundu ja ŵakulemba jijatamaga musi wa ku Yabesi, yaani, Ŵatilati ni Ŵashimeati ni Ŵasukati. Ŵanyao ni Ŵakeni uŵatyochele mu uŵelesi u che Amasi, ŵaŵautandisye musi wa ku Beti Lekabu.