1 Jeleji ni mipingo ja uŵelesi wa che Haluni. Che Haluni ŵakwete ŵanache ncheche, ŵanache wo ali che Nadabu ni che Abihu ni che Eleasali ni che Itamali. 2 Che Nadabu ni che Abihu ŵajasiche atati ŵao ali chiŵela ŵajumi, ni nganakola ŵanache, kwayele che Eleasali ni che Isamali achapwawo ŵaliji ŵambopesi. 3 Mwenye che Daudi ŵaaŵisile uŵelesi wa che Haluni mu mipingo malinga ni masengo gawo. Ŵatesile yeleyo kwa ukamusi wa che Sadoki, mwanache ju che Eleasali, ni che Ahimeleki, mwanache ju che Itamali. 4 Ilongola achajinji ŵatyochele mu uŵelesi u che Eleasali, kulekangana ni uŵelesi u che Itamali, ŵaŵichikwe malinga mwaŵelele, uŵelesi u che Eleasali ŵakwete ilongola kumi na sita, ni uŵelesi u che Itamali ŵakwete ilongola nane. 5 Ŵaŵichikwe pangali lusagu kwa kwapijila kula, pakuŵa kwaliji ni achakulu ŵa peuto papakundikwe kwa kwapopelela Akunnungu ni achakulu ŵa ŵandu ŵa kwapopela Akunnungu pasikati ja uŵelesi u che Eleasali ni che Itamali. 6 Nombe jwakulemba che Shemaya mwana ju che Netaneli juŵaliji Mlawi, ŵalembile meena gao paujo pa mwenye che Daudi ni ŵakamusi ŵakwe, che Sadoki jwambopesi, ni che Ahimeleki mwana ju che Abiasali ni ilongola ŵa achalongo ŵao ŵambopesi ni Ŵalawi. Ntundu wa che Eleasali ŵapatile kula jimo, ni ntundu wa che Itamali ŵapatile kula jimo.

7 Kula jaandanda ŵapatile che Yehoialibu ni jaaŵili ŵapatile che Yedaya, 8 kula jaatatu ŵapatile che Halimu ni jancheche ŵapatile che Seolimu, 9 jansano ŵapatile che Malikia ni jasita ŵapatile che Miyamini, 10 jasaba che Hakosi ni janane che Abiya, 11 jatisa che Yoshua ni jakumi che Shekania, 12 jakumi na moja che Eliashibu ni jakumi na mbili che Yakimu, 13 jakumi na tatu che Hupa, jakumi na nne 14 che Yeshebeabu, 14 jakumi na tano che Biliga ni jakumi na sita che Imeli; 15 jakumi na saba che Hesili ni jakumi na nane che Hapisesi, 16 jakumi na tisa che Petahia ni jaishilini che Yehesikeli, 17 jaishilini na moja che Yakini ni jaishilini na mbili che Gamuli; 18 ja ishilini na tatu che Delaya ni ja ishilini na nne che Maasia.

19 Ŵelewu ni uwaliji utalati wao uwaŵichikwe wa kupanganya masengo paŵajiinjilaga pa Nyuumba ja Ambuje Akunnungu malinga ni iŵatite kulajiswa ni che Haluni atati ŵao, mpela Ambuje Akunnungu, Akunnungu ŵa ku Isilaeli, iŵatite kwalamula.

20 Aŵa ali ilongola ŵa uŵelesi wine wa Ŵalawi.

Kutyochela ku che Amulamu ŵapali che Shubaeli, ni kutyochela ku che Shubaeli ŵapali che Yedeya.

21 Kutyochela ku che Lehabia mwanache ju che Eleasali ŵapali che Ishio juŵaliji jwakwitiwo.

22 Kutyochela mu uŵelesi wa che Ishio ŵapali che Shelomiti ni kutyochela ku che Shelomiti ŵapali che Yahati.

23 Ŵanache ŵa che Ebuloni ŵaliji, che Yelia mwanache jwa kwitio, che Amalia jwaaŵili, che Yaasieli ŵatatu, che Yakameamu ŵa ncheche.

24 Mwanache ju che Usieli ŵaliji che Mika. Kutyochela kuuŵelesi wa che Mika ŵaliji che Shamile.

25 Kutyochela mu uŵelesi wa che Ishia mpwakwe che Mika kwaliji che Sekalia.

26 Ŵanache ŵa che Melali ŵaliji, che Maili ni che Mushi ni Yaasia, 27 che Yaasia ŵakwete ŵanache ncheche, ŵanache wo ali che Beno ni Shohamu ni che Zakuli ni che Ibili. 28 Che Mahili ŵakwete ŵanache ŵaŵili, ŵanache wo ali che Eleasali ni che Kishi. 29 Che Eleasali nganakola mwanache nambo che Kishi ŵakwete mwanache jumo liina lyakwe che Yelameeli. 30 Che Mushi ŵakwete ŵanache ŵatatu, ŵanache wo ali che Mahili, ni che Edeli ni che Yelemoti.

Ŵanyao ni uŵelesi wa che Lawi malinga ni mitundu jao.

31 Nombe ŵanyawo wose ŵapijile kula mpela achalongo ŵao uŵelesi wa che Haluni yatesile, paujo pa che Daudi ni che Sadoki ni che Ahimeleki ni paujo pa ilongola ŵa ulongo wa ŵambopesi ni Ŵalawi. Nnango wa ŵandu achajinji watendelwe yalumo ni nnango wa ŵandu kanandi.