1 Fuä hä, Baɨla kisiã kula abawiliki bisuẽ bäti uwe bawe na uwe (72) kikedi yo ni ba uwe uwe i pele mbata yò fu ko ku logo ägu agbata na alago dundukä si aidi kʉ ndʉ ni ni tiko. 2 Kʉ kinyã fu yo: «Zũzũ zende ahẽ ni kumu he vulu äti, ono nge nga abolosʉnge te. Oni kpäli tie fu Baɨla äti kʉ kedi kula abolosʉnge tɨpa kẽ gako zende ahẽ. 3 Oni ndʉ: oni ngele mi nakeda loni wa awili akandolo ku dagba amama. 4 Ka oni tindi nga mängu afalanga ya, na saki ya, na katala ya, ka oni lʉ nga gene kafʉ sene fu bolo ya. 5 Gu kpolo dundukä oni kalimä ku logo ho, oni nyã mbata: ‹Zeleda dʉ ku logo gi kpolo le!› 6 Ka bolo zeleda sã dʉ hõ, gǒni zeleda adʉ ku lii ni. Ka si adʉ nga wo ya, si akalaga tihe koyò dʉ oni ni. 7 Oni niläki kina logo gu kpolo le, kinili liahẽ na kinimbili gu hẽ i kafʉ he fu loni, bämbikä si lengbe alengba bolosʉnge gbiã gäni mutumä. Ka oni yeke nga tiloni logo akpolo ni gbata ba lame ya. 8 Gu gbata oni kalimä ku logo ho i kidi loni ku gume, oni li gu hẽ i kafʉ he fu loni. 9 Oni husi ägu abolo kaza nikadʉ yò, kinyã fu yo: ‹Ga Mbäli Kindä ima mbeda na oni.› 10 Ono gu gbata oni kalimä ku logo ho ka i adia nga loni ku gume ya, oni kindʉ ku bakele gene yò, kinyã: 11 ‹Zavula gu nvutu nga ga gǒni gbata zi tihe kuti ndʉlani, ani tädi he tɨpa yugä hä fu loni ya oni mängi gbegbelẽ payi. Ono oni ini he ya ga Mbäli Kindä ima mbeda na oni.› 12 Mi nápe he fuloni ya, ti gu ulu Mbäli kasapa ngbanga, kʉ anyakasa pai ku lii abolo gi gbata le sʉsi ga ambe Sodomo.

13 Lungä folo nga gu gbata nga Kolazine! Lungä folo Betesaida! Ka agu iliwä iliwä apai namängi kpuloni yò amängi kina wo logo ägu agbata nga Tile na Sidona, ka i aimá sá ngbäduyo bakulu yò, kivodi tiyo na asaki, kibe tiyo na kuke. 14 Si du, i asapa nga ngbanga ambe Tile na ambe Sidona nyänyäki wa gǒni te. 15 Mo tigamʉ gu gbata nga Kafalanauma, mʉ nabelã hã ya i atʉmba lo da ku ngbängbätulũ yò? Õõ, i agitäsi lo ku yò dʉ kpikpí abolo ni*. 16 Guni nagiã loni, ni nagiã le â. Guni ka paloni, ni ima ka pale â. Guni ka pale, ni ima ka pa guko nakedi le.»

17 Ägu abawiliki bisuẽ bäti uwe bawe na uwe (72) le kiyägä na bakele ngbalago kinyã fu Yesu: «Baɨla, zavula kina adaimuna ni tiyo ǎilisä lani ti limälo.» 18 Yesu kinyã fu yo: «Mi ǎbi Satana kʉ naguali ngbängbätulũ yò kiniti ku sende nò wa ikpilä gʉmba. 19 Oni gĩ, mi fʉ tändu fu loni tɨpa kandʉ lii awoo, kandʉ lii agbalakungulu, na kandʉ lii ga Satana tändu dundukä. Wele, hẽ hõ sã te nikamanga loni gbegbelẽ. 20 Ono, ka oni dʉ nga na ngbalago bämbikä gbegbelẽ atolo ǎilisä loni ya. Ono tie, oni dʉ na ngbalago bämbikä limäloni ni kẽkẽ he ngbängbätulũ yò.»

21 Ti kina gu legbo le, Yesu kihĩ na bakele ngbalago be Ziazia Toló, kʉ kinyã: «Mi natambwa lo, Buba, nga Baɨla ngbängbätulũ na kpoto sende, bämbikä mʉ aõkõ agi apai le ti abolo tatamana na ti abolo bilĩ, kiyugu he fu ägu abolo dʉ wa agudee. Iĩ, Buba, mʉ amängi he wo, bämbikä wo mʉ akpi nyämu he si mängi.

22 Buba ima fʉ apai dundukä ku vulu bele. Bolo hõ sã te ini da nga Wili Mbäli ono kina Buba sã. Bolo hõ te ini da nga Mbäli Ba; ono kina Wili Mbäli sã, gbiã kuti kina gu bolo Wili Mbäli aida käyugä ko fu ni.»

23 Ti fuä hä, kʉ kisa tiko koyò dʉ gako abawiliki ni, kikpala kina yo sã kinyã fu yo: «Ngbalago fu ägu loni näbi agi apai le ni bängiloni! 24 Bämbikä mi nápe he fu loni nga dʉngu anäbi na dʉngu abäkindä aidi käbi gu pai oni äbi he, ono i ǎbi ngä hä te. I aidi kagiã gu pai oni agiã hã, ono i ǎgiã nga ha te.»

25 Wele tie, bäyugu andikä sã kiyee kalẽ Yesu logo fʉla, kinyã fu ko: «Bäyugu, mi mängi waĩ kagbiã nyenye unga?» 26 Yesu kinyã fu ko: «Gini pai dʉ ni kẽkẽ hẽ logo andikä? Mʉ nageda gini hẽ logo ho yò?» 27 Gu kʉmba le kikalaga ha kinyã: «Mʉ kpi nyämu Baɨla nga gǎ Mbäli na ngbädulo dundukä, na mbisimälo dundukä, na ʉmelo dundukä, na belãlo dundukä. Mʉ kinikpi nyämu kwalo â wa mʉ nakpi nyämulo ni tilo✝.» 28 Yesu kinyã fu ko: «Mʉ kalaga pai wenengaĩ. Mʉ mängi he wo, mʉ adʉ na bata.» 29 Ono gu bäyugu andikä le aidi käyugä tiko ni lulu bolo, kʉ kisana Yesu kinyã: «Da nga kwale?»

30 Yesu kikalaga ha kinyã: «Kʉmba sã aguali Yelusalema yò kazolã ku Yeliko yò, kʉ kiti ku be aɨladĩ. I kigbʉ gako ahẽ dundukä, kita ko, i kimbʉ ko mbembedi na kpio, kindʉ. 31 Fuä hä, bazomutumä sã ǎzolã ti kina gu gene le. Kʉ kibi gu kʉmba le, kisʉsi bändulu gene ku bäni tutũlũ tiko. 32 Levi* sã kida logo gu ba le â, kibi gu kʉmba le, kʉ kisʉsi bändulu gene ku bäni tutũlũ tiko. 33 Ono mbe Samalia sã nǎndʉ ndʉge ngba gu gene le, kida pati gu kʉmba le, kibi ko, lungäko kizi ko. 34 Gi mbe Samalia le kigbisi mbembedi na ko, kizundu bängili gako aolo niuka kpaĩ wasã na vino ku tini, kivo ho. Kʉ kitumba ko ku lii gako nya kindʉ na ko ku bämbu agino yò, kibi pako yò. 35 Ni gu kula gililago, kʉ kikusi zende afalanga uwe, kifʉ he fu bábanda bämbu agino kinyã fu ko: ‹Mʉ bi pa gi kʉmba le. Gu falanga mʉ kagbelesa lu sʉsi gele, mi agasa lu folo ni tile lago yägä mi.›»

36 Yesu kisana hẽ kinyã: «Bala bängilo, da dagba agi abolo biata le nadʉ fu gu kʉmba nati ku be aɨladĩ ni kulako?» 37 Gu bäyugu ändikä le kikalaga ha kinyã: «Guni näbi lungä ko.» Yesu kinyã fu ko: «Mo â tigamʉ, mʉ ndʉ damängi he kina wo!»

38 Wa Yesu na gako abawiliki ǎndʉ ngba gäyo gene, kʉ kilimi ku logo kpolo sã. Dee sã limäli angia Malata kidi ko ku gume ku kpuli yò. 39 Li adʉ na wilinäli limäli angia Malia, nga guli nasungu sende pati ndʉ Baɨla kinigĩ gu pai kʉ ǎgʉmba ha. 40 Ti gu legbo le, Malata ǎfʉda tili na dʉngu asʉnge. Li kiyee kinyã: «Baɨla, si bängilo ni pai te nga wilinämi mbu le mi nimängi sʉnge ni sã le? Mʉ nyã fu li tie li yée kaundä le.» 41 Baɨla kikalaga ha fu li kinyã: «Malata, Malata, mʉ na baka bängilo nifudi tilo na dʉngu apai, 42 hẽ sã gbua lengbe. Malia siã wene pai, nga gu bolo nikadia nga ha beli ya.»