1 Fuä hä, Yesu kiyǎngele pati ko, kʉ kibi aɨla kumukä i niba gäyo gamahẽ ku logo abumä gamahẽ bakele bämbu Mbäli yò. 2 Kʉ kibi lungä lungä dee ni däkulugbä nǎba lukutu zende afalanga uwe gbua â ku logo ho. 3 Yesu kinyã: «Mi nagʉmba ha fu loni ni lengo ya gi lungä lungä däkulugbä le gämu hẽ susi gu kula abolo dundukä. 4 Bämbikä gu kula abolo dundukä di gu gäyo hũ kumukä ni nǎdʉ nga na sʉnge fu yo ya kifʉ he ni gamahẽ. Ono li, logo gäli zingä, li fʉ gu dundukä li adʉ na ni tɨpa kabata.»

5 Wa gu kula abolo ǎfʉla lii pa ngbanya bakele bämbu Mbäli kango gu wene wene ambia i adua ha na ni wasã na ägu wene wene ahẽ i afʉ he ni gamahẽ tɨpa ha, Yesu kinyã: 6 «Gu oni äbi he le, aulu áyee hõ mbɨa kadʉ nga ni lii gu kula ha ya. I agbandaka ha dundukä.»

7 I kisana ko kinyã: «Bäyugu, gini legbo ägi apai le kada tini? Gini kpiapai nikayugä hä ya si nikada?» 8 Yesu kikalaga ha kinyã: «Óni banda tiloni tɨpa ka bolo nängi ngä loni ya. Bämbikä dʉngu abolo adia limäle kiyee ninyã: ‹Mi du nga Masiya!›. Watadʉ i anyã: ‹Legbo yägä Masiya ima da!› Ka oni peke nga fuäyo ya. 9 Hõ oni kagiã pande avʉla ni na pande ga abolo samungu, ka oni gʉnde nga ya bämbikä lengbe he alengba ägu apai le da mbatano. Ono digidä ngbiĩ nikangia ha nibasã te.» 10 Fuä hä kʉ kinyã belewe fu yo: «Ngbatʉnga sã asovʉla kuti gu kula ngbatʉnga, ngbiĩ sã kisovʉla kuti gu kula ngbiĩ. 11 Bakele kele abäzigizä adʉ. Logo alago kiãkiã, bakele gomolõ na kele kele akaza ambʉsa abolo. Ailiwä iliwä apai wasã na agu akpiapai nagʉndesi abolo akʉla ali yò. 12 Ono mbata fu da ägu apai le dundukä, i aziä loni kimbusi loni, i azoga loni ku be abaɨla abämbutɨlia tɨpa i säli ngbanga loni, i aba loni ku kamba yò. Fuä hä, i andʉ na oni ku bala bängili agbiã lingálá na abäkindä tɨpa i säli ngbanga loni tɨpa pa le. 13 Ägi apai le adʉ fu loni ni mämu tɨpa oni täki pandele fu yo. 14 Óni mäĩ gele tie wenengaĩ ku logo gǒni belã ya anga oni nikambakada gu pai oni kape he yò tɨpa kabatasa tiloni te. 15 Bämbikä mi ni tile, mi afʉ ägu afʉla na gu tatamana fu loni ka bolo sã dagba avʉlaloni alengba nga kalu gene he ya watadu kati kango na ni â ya. 16 Zavula avʉnguloni, awilinäloni, agʉmeloni wasã na ndikili abakʉlealoni, i azoga loni azoga ku be asogoloni. Agbiã aimä badʉngu abolo dagba loni. 17 Abolo dundukä asoga loni tɨpa pa le. 18 Ono kandala mangeliloni hõ sã te nikainga*. 19 Ka oni dʉ na ziä ngbäduse, oni agbiã nyenye ʉnga.

20 Hõ oni käbi asovula ni i nake pati Yelusalema kilikili, óni ini he ya legbo gbandaka ha ima mbeda. 21 Ti gu legbo nga ha le, ägu abolo nikadʉ lingálá Yudaya yò í oto ku lii abagangala yò. Ägu yo nikadʉ Yelusalema yò, i kulu akula. Agu abolo nikadʉ logo agbalia, ka i ndʉ nga belewe ku gbata yò ya. 22 Bämbikä si adʉ ni äulu mbusa, tɨpa sangba Kẽkẽ Apai dundukä lengbesi ti he. 23 Lungä adʉ ti gu ulu le fu ägu adee nikadʉ na vuse wasã na ägu yo nikaãga agudee! Bämbikä si adʉ ni bakele gbelã ngbiĩ lii zägino, ga Mbäli zɨnga ati ku lii ägi abolo le. 24 I aimä ägu yo na basape, kindʉ na ägu yo ni zizi abolo ku logo gu kula angbiĩ dundukä. Azanga idapase andʉ lii Yelusalema na ba ha, da ku hõ gäyo legbo kalengba ni.

25 Ägu akpiapai nagʉndesi abolo akula bängili ulu yò, kpäkpu diwi yò na kpäkpu akelekulu yò. Angbatʉnga lii kpoto sende adʉ na bakele gunde be wolo bakele bäime na wolo gu ime wige atʉmba ha. 26 Hẽ amã abolo be gʉnde wa i kǎsungudä gu bakele egetele nikati li kpoto sende na baha, bämbikä ägu atändu dʉku ali yò* awó. 27 Wele, i äbi Wili bolo kʉ niyee logo dubä na tändu dundukä wasã na taälimä dundukä. 28 Hõ ägi apai le dundukä katona da ni, oni lʉ nyänyäki nikidä kina ku ngbängbätulũ yò bämbikä legbo batasa loni ima mbeda.»

29 Fuä hä, Yesu kipe gi gii fula yò le fu yo kinyã: «Óni bi ngä gu ngwa nga figi watadu gu kula angwa dundukä. 30 Hõ vovo akpe he aenga funä ni, oni nibi kina bibi he kiini he ni tiloni ya kitä ima mbeda. 31 Kina wo, tɨpa loni â tigǒni, hõ oni käbi ägi apai le ni si nimängi, óni ini he ya ga Mbäli Kindä ima mbeda. 32 Mi nápe he fu loni ni lengo ya, gi ngbatʉnga abolo dʉ awele le anyasa nga te mbata fu da ägi apai le dundukä. 33 Ngbängbätulũ na kpoto sende asʉsa sʉsa, ono fʉlale anyasa nga wasã te.

34 Óni banda tiloni tɨpa ka bilĩloni lá nga alá kina ku lii pa bakele li liahẽ ya, na lii pa bakele kpi buda wasã na fʉdatise tɨpa gǒni bata ya. Ka gu ulu le andʉ kadingisä loni nibasã, 35 wa gbina nizã. Bämbikä gu ulu le ati ku lii ägu abolo dundukä dʉ lii kpoto sende na ba ha. 36 Ka oni lá nga ya, oni nikpäli fu Mbäli ti alegbo dundukä. Wele oni adʉ na ʉme tɨpa kabitikpa be ägu apai dundukä nikayee le na kalʉ ngba ndʉloni bala bängili Wili bolo.»

37 Ulu na ulu, Yesu ǎyugä pai bakele bämbu Mbäli yò, ono nyämu, kʉ kinindʉ kala lii gu gangala i ayamba ha gangala Aolive. 38 Ngba wiso, abolo dundukä kinitilia ko ku bakele bämbu Mbäli yò tɨpa kagiã ko.