1 Ulu sã, Yesu kipe kpia pai sã fu gako abawiliki tɨpa yugä hä fu yo nga i nikpäli dedede fu Mbäli zanga ga ni giise. 2 Kʉ kinyã fu yo: «Basäpu ngbanga sã adʉ logo gbata sã. Kʉ anâgunde nga ti Mbäli te. Kʉ anadʉ nga na ilisä fu abolo â te. 3 Däkulugbä sã adʉ â kina logo gu gbata le. Li anadogoda fuä ko tɨpa nyã fu ko: ‹Mʉ säli ngä ngbanga dagba le na vʉlale.› 4 Ku vulu gbanga legbo, kʉ kinika ha aka. Ono fuä hä, kʉ kinyã ku ngbäduko yò: ‹Zavula wa mi agʉnde nga ti Mbäli ya, ka mi ailisä ngä abolo â ya, 5 ono wa gi däkulugbä le akata ngbädule kindi, mi nikasala gäli ngbanga tɨpa li mbu yée kǎsala lile.›» 6 Baɨla kizungudi fulako kinyã: «Óni gĩ gu pai gu kele basäpu ngbanga le ape he. 7 Mbäli ti gako, kʉ akalaga nga pai fu gako siãsiã abolo te nga ägu yo nakpala fu ko ulu na yulu? Kʉ aundä ngä yo ni ipä te? 8 Mi nápe he fu loni: Kʉ akalaga pai fu yo ni ipi ipi he. Ono hõ Wili bolo kayägä ni, kʉ agbiã aidipase lii kpoto sende?»

9 Fuä hä, Yesu kipe gi kpia pai le â fu ägu abolo nǎbi tiyo ni lulu abolo kinibisila pa akʉläyo: 10 «Akumba uwe andʉ́ ku bakele bämbu Mbäli yò kakpala fu Mbäli. Gu ko sã angia Falusi, gu kula ko kingia babägi pákʉ. 11 Falusi alʉ ngba ndʉko nikpäli fu Mbäli ku ngbäduko yò wa gele: ‹Akoo Mbäli, mi natambwa lo bämbikä mi wa gu kula abolo te ngia abolo diĩ, ngia hila hila abolo, ngia abolo bäli. Mi natambwa lo bämbikä mi wa gu babägi pákʉ le te. 12 Mi nâginä hẽ bala uwe vulu poso sã kinifʉ sã dagba bawe lii ägu ahẽ dundukä mi nâgbiã hã.› 13 Babägi pákʉ tigako, kʉ alʉ́ tutulũ tǒni, ka kʉ asada nga tumba bängiliko ku ali yò ya. Ono, kʉ kinizädi ngbäduko ni bilatise ninyã: ‹Akoo Mbäli, mʉ bi lungä le, mi nga bolo ingapai.› 14 Mi nápe he fu loni ya: Babägi pákʉ du nagá ku kpʉko yò i naima vu ko ti gako ingapai, ono Falusi te. Bämbikä gu bolo dundukä nakiĩsä pa tini, i aumbäsi päni. Ono gu ni naaumbäsi pa tini, i akiĩsä päni.»

15 Abolo kiniyee na fogo ägudee â fu Yesu tɨpa kʉ zädi yo. Abawiliki kiyǎbi he wo, i kizã yo tini. 16 Ono Yesu kinyã i yée na fogo ägudee ku pati ko. Kʉ kinyã fu abawiliki: «Óni mbu ägudee i yée fuä le, ka oni zã nga yo ya. Bämbikä ga Mbäli Kindä tɨpa ägu abolo dʉ wa yo. 17 Mi nápe he fu loni ni lengo ya gu bolo ádɨa nga ga Mbäli Kindä ku gume wa tǒni gudee ya, ni alimä ngä koyò te.»

18 Fuä hä, gbiã Ayuda sã kisana Yesu kinyã: «Wene Bäyugu, mí mängi gini hẽ tɨpa kagbiã nyenye ʉnga?» 19 Yesu kinyã fu ko: «Tɨpa gini hẽ mʉ ayamba le tini wene bolo? Bolo hõ sã te dʉ ni wene ni, ono kina Mbäli sã. 20 Mʉ ima inä ga Mbäli andikä: ‹Ka mʉ mängi ngä bäli ya, ka mʉ imi ngä bolo ya, ka mʉ dĩ ngä hẽ ya, ka mʉ kiti nga ngbángá bolo ni zilee ya, mʉ ilisi bamʉ na namʉ.✝›» 21 Gi gbiã Ayuda le kikalaga ha kinyã: «Agi apai le dundukä, mi nâilisä hä enga ngba palangale.» 22 Yesu kiyǎgĩ ko, kʉ kinyã fu ko: «Pai sã nakpá folo belewe: mʉ bägi ägu ahẽ dundukä dʉ belo, kigämu he fu lungälungä abolo. Wele, mʉ agbiã kumukä ngbängbätulũ yò. Fuä hä, mʉ yée kipeke fuä le.» 23 Hõ gu kʉmba le agĩ gi pai le ni, bakele lungä kiti ku ngbäduko yò, bämbikä kʉ adʉ ni bakele bolo kumukä. 24 Yesu kiyǎbi he nga bakele lungä ati ku ngbädu gi kʉmba yò le, kʉ kinyã: «Nakpakala ha tie fu aɨla kumukä tɨpa kalimä ku logo ga Mbäli kindä! 25 Si ni kpakala kpakala ha gbẽ fu bolo kumukä kalimä ku logo ga Mbäli kindä susi pa limä kamela ti yalo sindani so lokoo.» 26 Agu abolo nǎgiã Yesu kisana hẽ ninyã: «Ka si dʉ tie wele, da lengbe kabata?» 27 Yesu kikalaga ha kinyã: «Gu pai gäsi abolo, ka si gäsi ngä Mbäli te.» 28 Petelo kinyã tie: «I ngele, ani ti gǎni, ani mbu gǎni apai dundukä kipeke fuä lo.» 29 Yesu kikalaga ha fu yo kinyã: «Mi nagʉmba ha fu loni ni lengo ya ka bolo mbu kpuni, kimbʉ diäni, kimbʉ awilibäni, kimbʉ avʉnguni watadu awilini tɨpa ga Mbäli kindä, 30 ni agbiã hã belewe logo gi zägino le ni bakele he susi, ni agbiã nyenye ʉnga logo gu ngbiĩ nikäyee.»

31 Fuä hä, Yesu kikpala tiko wasã na amokedi bawe na uwe (12), kinyã fu yo: «Oni gĩ, ani gi nandʉ le ku Yelusalema yò. Agu apai dundukä anäbi akẽ he lii pa Wili bolo si nikalengbesa tihe. 32 Bämbikä i azoga Wili bolo ku be azanga idapase, i apäyäsi pako, i asenga ko, i aba sʉle kuti ko, 33 i ata ko, fuä hä i aimä ko. Ono ti biata ulu, kʉ azinga be kpio.» 34 Ono ka amokedi aluga nga tiyo na pai sã ya. Sangba gi fula le adʉ fu yo ni õkõ õkõ hõ. I ǎinä ngä gini pai Yesu ǎida gʉmba ha te.

35 Wa Yesu ǎmbeda ku Yeliko yò, bolo vuläli sã asungu pangba gene kinihõ ahẽ. 36 Kʉ kiyǎgĩ wolo limbasa abolo i nisʉsi, kʉ kisana hẽ kainä gu pai nǎsʉsa. 37 Abolo kikalaga ha fu ko kinyã: «Gu Yesu nga mbe Nazaleta du nasʉsa.» 38 Kʉ kita ngbako tie nyänyäki kinyã: «Yesu, Wili Davidi, mʉ bi lungäle!» 39 Agu abolo nápele mbatayò ǎzã ko tɨpa kʉ ongo. Ono kʉ kinita ngbako ata belewe sʉsi: «Wili Davidi, mʉ bi lungäle!» 40 Yesu kilu, kizɨna hẽ ya i yée na ko. Hõ gi bolo vuläli le ǎmbeda ni na Yesu, Yesu kisana ko kinyã: 41 «Gini hẽ mʉ aida mi mängi he folo?» Gi bolo vuläli le kikalaga ha kinyã: «Baɨla, mi naida kangela belewe!» 42 Yesu kinyã fu ko: «Mʉ́ ngele belewe. Gamʉ idapase ima batasa lo.» 43 Nibasã, kʉ kiza kangela belewe. Kʉ kitona peka Yesu, kinitääsi limä Mbäli. Abolo kiyǎbi gi pai le, i kitona kailisä limä Mbäli.