1 Pumbä gu mapa zanga toma ǎmbeda. I nayamba gu pumbä le Pasika*. 2 Agbiã abazomutumä wasã na abäyugu andikä ǎgbata gene kaimä Yesu ono i ǎgunde be abolo.

3 Wele Satana kilimi ku ngbädu Yuda Isikaliote yò nadʉ dagba amokedi bawe na uwe (12). 4 Kʉ kindʉ kagiã tiko na agbiã abazomutumä wasã na agbiã abábanda bakele bämbu Mbäli lii pa gene baga Yesu ku beyo. 5 I kidʉ na ngbalago kiidi kafʉ falanga fu Yuda. 6 Kʉ kiidi he, kitona gbatá wene mämu tɨpa kabaga Yesu ku beyo zanga ábolo ini he.

7 Ulu pumbä gu mapa zanga toma kida, si angia gu ulu si anâida i yele golõ palanga kandolo tɨpa Pasika. 8 Yesu kikedi Petelo wasã na Yoane ninyã fu yo: «Óni ndʉ kambakada pumbä Pasika fu lani tɨpa ani li he.» 9 I kisana ko kinyã: «Wäli mʉ aida ani mbäkädi he ni?» 10 Kʉ kikalaga ha fu yo kinyã: «Hõ oni kalimä ni ku gbata yò, oni agbiã kʉmba sã áka kämbu ime. Óni pe fuä ko da ku logo gu kpolo kʉ kalimä ni. 11 Oni anyã fu baɨla kpolo: ‹Baɨla nasana lo ninyã: Wäli dʉ gu vulu bämbu ni mi nikali pumbä Pasika logo ho na gimi abawiliki?› 12 Kʉ ayugä bakele vulu bämbu sã ali yò fu loni dʉ ni mbäkädi mbäkädi he. Yò gu du oni kambakada Pasika ni.» 13 I kindʉ, kigbiã apai dundukä wa Yesu agʉmbá ha fu yo. I kimbäkädi pumbä Pasika.

14 Hõ legbo liahẽ alengbé ni, Yesu kisungu bá ligo yò wasã na gako amokedi. 15 Kʉ kinyã fu yo: «Mi akpí nyämu li gi Pasika le gbẽ wasã na oni mbata fu mi lungä. 16 Bämbikä mi nagʉmba ha fu loni ya mi alí nga Pasika belewe te dá kuti gu legbo si nikalengba ni logo ga Mbäli Kindä.» 17 Kʉ kidi kopo vino, kitambwa Mbäli, kinyã: «Óni di he kimbili he oni ni basã sã. 18 Bämbikä mi nagʉmba ha fu loni: ‹Tona aleme kandʉ, mi ambila nga vino belewe te dá ku hõ ga Mbäli Kindä kayee ni.›» 19 Fuä hä, kʉ kidi mapa, kigäsi tambwa hẽ fu Mbäli, kikuä logo ho yò, kifʉ he fu yo ninyã: «Gele nga kpotole dʉ ni fʉfʉ he fu loni. Óni nimängi he wele tɨpa kǎtingida pale.» 20 Fuä nyasa yo li liahẽ, kʉ kidi kopo kifʉ he fu yo ninyã: «Gi kopo le ni vovo gbakʉle logo kʉlele ʉka tɨpa loni. 21 Ono i ngele, gu ko nikazoga le kube asogole, kʉ gu du bá ligo elẽ wasã na ani. 22 Wili bolo nandʉ sa kpio â wa Mbäli ambäkädi he. Ono lungä fu gu bolo nikazoga ko ku be asogoko!» 23 Amokedi kitona sasana tiyo dagba yo ni ba sã sã nga da dagba yo lengbe kamanga pai wa gele.

24 Abawiliki kitona ti kango dagba yo nyänyäki tɨpa kainä ya da nga nyänyäki pa bolo susi dagba yo. 25 Yesu kinyã fu yo: «Abäkindä lii azanga idapase nâzoga avuluyo na pagbiã dundukä, ägu abolo dʉ na pa gbiã lii akula yo naida í niyämbu yo ni abolo wenelingise. 26 Ono ka si dʉ nga wo tɨpa loni ya. Ono tie, guni nga nyänyäki pa bolo dagba loni, ní mängi wa tâta pa bolo, guni nga bazogo kidʉ wa bolosʉnge. 27 Gini bolo nyäki päni susi, guni sungu mesa yò nili liahẽ watadʉ guni naundä kuläni ku mesa yò? Anga guni dʉ mesa yò te? Ono, mi dagba loni tie wa kina bolosʉnge. 28 Oni ti gǒni, oni nga ägu abolo näzí ngbäduloni wasã na mi logo ägu aasada mi agbiã hã. 29 Sidu, mi tigimi, mi nafʉ pa gbiã fu loni â wa gu Bʉba afʉ he fele 30 tɨpa óni li hẽ kimbili hẽ wasã na mi logo gimi kindä. Oni asungä li mbata abäkindä tɨpa sapa ngbanga angbatʉnga Isalaele ti bala ha bawe na uwe (12).»

31 Yesu kinyã: «Simo! Simo! Satana ima hõ pa loni tɨpa kayagita loni wa i nâyagita vunde tɨpa kakpala ha ti umu he. 32 Ono mi, mi ima kpala fu Mbäli tɨpa lo, ka mʉ zanga nga idapase ya. Mo tie tigamʉ, gu legbo mʉ kasa ngbädulo kiyägä sa le, mʉ́ nyäkäsi awilinamʉ.» 33 Petelo kikalaga ha kinyã fu ko: «Baɨla, mi legelege kalimä ku kámba yò watadʉ käkpi wasã na mo.» 34 Yesu kituka ngbako kinyã: «Petelo, mi nagʉmba ha folo ya mbata fu kwa bakondo aleme, mʉ aká pa le bala biata.»

35 Fuä hä, Yesu kisa tiko koyò dʉ abawiliki ni kinyã belewe fu yo: «Gu legbo mi akedi loni ni zanga mängu afalanga, zanga saki, zanga katala â, nyã mo oni azangá hẽ?» I kikalaga ha kinyã: «Hẽ te.» 36 Kʉ kinyã fu yo: «Ono awele, gu bolo dʉ na mängu afalanga, ni dɨ he adɨa. Guni dʉ na saki, ni dɨ he adɨa â. Gu bolo zanga basape, ni bägi gäni koti tɨpa kangbe he. 37 Bämbikä kẽkẽ apai gu dʉ lii pale nanyã ‹I akodí ko na äimi abolo✝›. Mi nagʉmba ha fu loni ya si naida sí lengbesi tihe. Ni lengo, gu Kẽkẽ Apai dundukä dʉ lii pale nikalengbesa tihe.» 38 Abawiliki kinyã: «Baɨla, mʉ́ ngele, abasape uwe gi dʉ le.» Kʉ kikalaga ha fu yo kinyã: «Sí lengbe ku hõ*.»

39 Fuä hä, Yesu kikʉlu, kindʉ ku lii bagangala Aolive yò â wa kʉ anamanga ha dedede. Gako abawiliki kipe fuä ko. 40 I kiyǎda yò, kʉ kinyã fu yo: «Óni kpäli fu Mbäli tɨpa ka oni ti nga ku logo asada ya.» 41 Fuä hä, kʉ kigbisi tiyo ku sayo wa batulä zumuzumu baso, kʉ kikuku nikpäli fu Mbäli ninyã: 42 «Bʉba, ka mʉ idi na ni, mʉ alia gi kopo le tile ku sayò. Ono ka si mängi ngä wa gu mi akpi nyämu he ya, sí mängi wa gu mʉ akpi nyämu he!» 43 [Wele, malaika sã kiyee ngbängbätulũ tɨpa kanyakasa ko. 44 Wa imisili äzi Yesu, kʉ kinikpäli belewe fu Mbäli nyänyäki, ländimä ti kpotoko kida wa kule nǎtoga ku sende.]*

45 Ti fuä gi kpala kpẽ le, kʉ kitumba tiko. Kʉ kindʉ fuä gako abawiliki, kigbiã yo i naima lá be lungä. 46 Kʉ kinyã fu yo: «Oni nalá alá tie? Óni tumba tiloni kikpäli fu Mbäli tɨpa ka oni ti nga ku logo asada ya!»

47 Wa Yesu ǎfʉla kindi, limbasa abolo kigbädi. Gu ko i ǎyamba ko Yuda, nadʉ́ kina dagba amokedi bawe na uwe (12), ǎnungusa gi limbasa abolo le. Kʉ kimbedi na Yesu tɨpa dungä ko. 48 Yesu kinyã fu ko: «Yuda, logo dungätise yò gu mʉ abaga Wili bolo?» 49 Agu abawiliki nadʉ wasã na Yesu kiyǎbi gu pai nǎyee, i kisana ko kinyã: «Baɨla, áni sásá yo na abasape?» 50 Gu ko sã dagba yo kiyawa ga gbiã abazomutumä bolosʉnge kiyele tuko ku kʉmbabe. 51 Ono Yesu kituka ngbako kinyã: «Susu*, óni mbu he». Fuä hä, Yesu kizädi tu gi kʉmba le kihusi ko. 52 Agbiã abazomutumä gbiã kuti agbiã abábanda bämbu Mbäli na ga Ayuda abaakʉmba ayee kaziä Yesu. Yesu kinyã fu yo: «Oni yée na abasape na angbondo wa na bäimiabolo nga mi? 53 Aulu dundukä, mi ǎdʉ na oni bakele bämbu Mbäli yò, ka oni aziä ngä le ya. Ono awele, legbo nga ha fu loni na fu tändu nga ga bitimä.»

54 Fuä ziä yo Yesu, i kindʉ na ko ku gbiã abazomutumä yò. Petelo ǎpeka ko tutulũ tǒni. 55 I agindä we bebele vulu kpolo yò kisungu pati he. Petelo asungu â dagba yo. 56 Bolosʉnge sã ni dee kiyǎbi Petelo tima we, kidʉa bängilili tiko kinyã: «Gi ko le â ǎdʉ wasã na Yesu.» 57 Petelo kika ha ninyã: «Dee, mi ainä ngä gu kʉmba le te.» 58 Fuä bete legbo, kula bolo kibi Petelo, kinyã: «Mo â, mʉ kina dagba ägu abolo le.» Petelo kikalaga ha ninyã: «Aiii, mi te.» 59 Ti fuä bete legbo wa saa sã, kula bolo kinyäkäsi he ninyã: «Ni lengo, gi kʉmba le adʉ wasã na Yesu. Belewe, bolo Galilaya nga ko.» 60 Petelo kikalaga ha kinyã: «Mi ainä ngä gu pai mʉ aida kagumba ha te.» Kina ti gu legbo le, wa kʉ ǎfʉla kindi, kondo kikua. 61 Baɨla nga Yesu kisa tiko kingele koyò Petelo adʉ ni. Petelo kitingidi gu fula Baɨla ape he fu ko nga: «Mbata fu kondo ku aleme, mʉ aká pa le bala biata.» 62 Petelo kikʉlu kitona kpala na egetele.

63 Ti gu legbo le, ägu akumba nǎbanda Yesu ǎsawia ko kinita ko. 64 I awädi bängiliko na lokoo kinisasana ko ninyã: «Mʉ́ fʉ́lá nga wa näbi! Da näli lo?» 65 I kinisenge ko na kula dʉngu likä asenga hẽ belewe gbẽ.

66 Hõ lago agili ni, gbuu abaakʉmba Ayuda gbiã kuti agbiã abazomutumä na abäyugu andikä kidungulã tihe. I kiyee na Yesu ku bala bängili gi bábakele gbuu Ayuda le. 67 I kisana ko kinyã: «Masiya nga mo? Mʉ́ gʉmba ha fu lani.» Kʉ kikalaga ha fu yo kinyã: «Ka mi gʉmba ha fu loni, oni aida nga fulale te. 68 Ka mi sana loni, oni akalaga nga pai fele te. 69 Ono enga aleme, Wili bolo asungä ku kʉmbabe Mbäli nga Ɨla Tändu Dundukä.»✝ 70 I dundukä kisana ko: «Si naida kanyã Wili Mbäli nga mo?» Yesu kikalaga ha fu yo kinyã: «Oni ima gʉmba ha ni tiloni, bolo mi du.» 71 I kinyã tie: «Nyã mo ani lengbe kakpí nyämu adezilee belewe? Ani ima giã hã ni tulani kuti mulä ngbako.»