1 Yesu kinyã belewe fu gako abawiliki: «Kʉmba sã ni bolo kumukä adʉ yò na gako kapita nǎbi pa gako ahẽ. I kiyee kakita ngbángá gi kapita le fu ko ya kʉ nagbelesa gako ahẽ. 2 Baɨla gi kapita le kiyämbu ko kinyã fu ko: ‹Gini mi agiã ti limälo le? Mʉ yugu ngä fele waĩ mängi mo sunge na gimi hũ kumukä bämbikä mʉ adʉ́ nga belewe ni kapita lii gimi ahẽ te.› 3 Kapita kinyã ku ngbäduko yò: ‹Mi amanga waĩ wa baɨlale akʉsa le ti sunge? Kasopa binä? Mi na gu ʉme le te. Kǎhõ hẽ be abolo? Mi adʉ na zeẽ. 4 Mi ini gu pai mi akamanga ha tɨpa abolo di le adia ku gume ku kpuyo yò fuä kula mi ti sunge.› 5 Kʉ kiyämbu ga baɨlako abolo bánzá ni basã sã. Kʉ kisana bambata bolo bánzá kinyã: ‹Ga baɨlale bánzá belo waĩ?› 6 Gi bolo le kikalaga ha kinyã: ‹Angbungulu nzeme mbilä kama sã (100).› Kapita kinyã fu ko: ‹Gamʉ walaga bánzá du le. Ni ipä, mʉ sungu kikẽ he: angbungulu bisuẽ bawe (50).› 7 Fuä hä, kapita kisana gu kula bolo bánzá ninyã: ‹Na mo tigamʉ, ga baɨlale bánzá belo waĩ?› Kʉ kigalaga ha kinyã: ‹Asaki zende vunde kama sã (100).› Kapita kinyã: ‹Mʉ di gǎ walaga bánzá kikẽ he bisuẽ bäti biata bawe (80).› 8 Baɨla kitambwa gi kapita nangɨa bolo zilee le bämbikä kʉ amängi apai na bilĩ. Bämbikä awili gi zägino le na bilĩ logo gäyo laka dagba yo susi awili timalago.»

9 Yesu kinyã belewe: «Mi ti gimi, mi nápe he fu loni ya óni zi bakʉle na abolo pati hũ kumukä nga ga gi zägino le. Wele, hõ kumukä nikadʉ nga ni belewe ya, i adia loni ku gume ku logo nyenye kpolo. 10 Gu bolo ka i mäĩ ida ku logo ni yò logo lukutu apai, ni â ni gu bolo ka i mäĩ ida ku logo ni logo bakele apai. Guni nga bolo zilee logo lukutu apai, ni â ni bolo zilee logo bakele apai. 11 Ka si dʉ tie nga i ǎlengba nga kamaã ida ku logo loni tɨpa manga sunge na hũ kumukä nga ga gi zägino le te, da nikazoga pa ndikili hũ kumukä ku beloni? 12 Ka si ngɨa i ǎlengba nga kamaã ida ku logo loni tɨpa manga sunge na ägu ahẽ nga ga gu kula bolo te, da nikafʉ ndikili gǒni fu loni?

13 Bolosʉnge sã te lengbe kamanga sunge fu abaɨla uwe. Watadʉ ni asoga guni sã kiidi na gu kula ni. Watadʉ ni aziä tini kuti guni sã kipäyäsi pa gu kula ni. Oni alengba nga tamanga sunge fu Mbäli nimängi he fu hũ kumukä nga ga gi zägino le te.»

14 Afalusi naniidi na pa afalanga gbẽ ǎgiã ägu apai dundukä Yesu ǎgʉmba ha le. I kinimämu Yesu amama. 15 Kʉ kinyã fu yo: «Oni, oni nâyugä hä ku bängili abolo ya lulu abolo nga oni. Ono Mbäli ini gu pai dʉ ngbäduloni yò. Gu hẽ kiĩ paha gbẽ bängili abolo, Mbäli sogo pa ha asoga gbẽ.

16 Ga Mose andikä gbiã kuti ga anäbi abuku anungusi da kuti yée Yoane Babatiza✝. Tona hõ nga ha le, i natʉngusa wene pangbanga lii pa ga Mbäli kindä. Bolo na bolo namanga ha ni ʉme tɨpa kalimä koyò. 17 Si tâta tɨpa ngbängbätulũ na kpoto sende nyäsi. Ono kandala tǒni walaga andikä sã anyasa nga wasã te.

18 Ka kʉmba dändi diäni kidi gu kula dee, gu kʉmba le mängi bäli. Gu kʉmba di gu dee kumbäni adändi ni, gu kʉmba le namanga bäli â.

19 Kʉmba sã adʉ yò ni bolo kumukä. Kʉ anavoda bawenewene wesewese alokoo gino ho anidʉ ku ali. Aulu dundukä, kʉ anamanga pumbä kinili bawenewene liahẽ gbẽ. 20 Lungälungä bolo sã adʉ yò limäko angia Lazalo. Kpotoko na ba ha adʉ na kina aalo bagbandua. Kʉ ǎpi pangbändimä gi bolo kumukä le. 21 Kʉ ǎkpi nyämu li gu bete liahẽ nǎtiwa lii ga bolo kumukä mesa, ono kina aango nǎyee kǎsila gako aalo bagbandua. 22 Gu lungälungä bolo le kikpi. Amalaika kiaka ko ku pati Abalahama yò*. Bolo kumukä â ti gako kikpi. I kikpisidi ko. 23 Yò dʉ kpikpí abolo ni*, kʉ adʉ logo bakele egetele. Kʉ kitumba bängiliko kibi Abalahama tutulũ na Lazalo pati ko. 24 Wele, kʉ kita ngbako kinyã: ‹Abalahama, buba, mʉ bi ngä lungäle kikedi Lazalo kʉ́ mogó wili nzagako ku logo ime tɨpa zelesa milãle bämbikä mi naima gbẽ logo ägi amilã we le.› 25 Abalahama kikalaga ha fu ko kinyã: ‹Wilee, mʉ tingidi he ya mʉ agbiã wenewene apai logo gamʉ bata lii kpoto sende. Ono Lazalo ti gako, kʉ agbiã lungä. Awele, kʉ gbiã zelesa ngbäduse nò. Ono mo ti gamʉ, mʉ nagbiã egetele. 26 Ku lii gi pai le, badudungulä ngbungumu gu dʉ dagba lani na oni tɨpa ägu yo käkpi nyämu guali nò kayee fuä loni, ka i lengbe nga kamanga ha ya. Ka bólo lengbe nga kaguali yò dʉ oni ni kasi konò fuä lani â ya.› 27 Bolo kumukä kinyã: ‹Mi nazungädi lo tie buba, mʉ kedi Lazalo ku buba yò. 28 Bämbikä mi na awilibämi bisuẽ. Kʉ́ gbe tuyo tɨpa ka i yée ngä â ti gäyo ku logo gi bá mbusa le ya.› 29 Abalahama kikalaga ha fu ko kinyã: ‹Awilibamʉ na ga Mose andikä sa beyo gbiã kuti ga anäbi abuku. Í gĩ he.› 30 Bolo kumukä kinyã: ‹Ako, buba Abalahama. Ono ka si ngia bolo sã dagba ägu yo naímá kpi guali kindʉ fuä yo, i asá ngbäduyo asá.› 31 Abalahama kikalaga ha fu ko kinyã: ‹Ka i ágiã nga ga Mose andikä na ga anäbi abuku ya, bolo azavula zɨnga be kpio, i aida nga pai sã te.›»