1 Yesu kilimi ku logo gu gbata nga Yeliko, kinisusi vulu he. 2 Kʉmba sã adʉ yò limäko angia Zakayo. Kʉ adʉ ni gbiã abábägi pákʉ, kidʉ ni bolo kumukä â. 3 Kʉ anâgbata käbi da nangia Yesu. Ono ka kʉ alengba nga käbi Yesu ya kango limbasa abolo bämbikä Zakayo adʉ ni gulu ko. 4 Kʉ kiolo ku mbatayò, kidakpa gu ngwa nga sikomolo tɨpa käbi Yesu, bämbikä Yesu ǎyee kasʉsa hõ. 5 Hõ Yesu adá ni logo gu ba le, kʉ kitumba bängiliko kinyã fu ko: «Zakayo, mʉ zõlõ ku sende nò ni ipä bämbikä aleme, mi alá kina dimä kpʉlo yò.» 6 Zakayo kizõlõ ni ipä, kidi Yesu ku gʉme na ngbalago. 7 Abolo kiyǎbi gi pai le, i kitona kpakana hẽ ninyã: «Í ngele, kʉ ndʉ kala ku bolo ingapai yò!» 8 Ono Zakayo kilʉ bala bängili Baɨla kinyã fu ko: «Baɨla, mi akpala logo gimi ahũ kumukä uwe kifʉ bebele he fu abolo lungä. Ka si ngia mi adi ga bolo hẽ ngba ʉme, mi agasa ha fu ni bala biama (4).» 9 Wele, Yesu kinyã fu ko: «Aleme, ga Mbäli batasa limi ku logo gi kpolo le, bämbikä gi ko le â ni wili Abalahama. 10 Bämbikä Wili bolo ayee kagbata ingi ingi abolo tɨpa kabatasa yo.»

11 Wa limbasa abolo ǎgiã fula Yesu kindi, ku kipe kula kpia pai belewe fu yo. Bämbikä kʉ ǎmbeda ku Yelusalema yò, abolo kinibelẽ he ya ga Mbäli Kindä nikada nibasã. 12 Kʉ kinyã tie fu yo: «Kʉmba sã ni ngbatʉnga abäkindä ǎndʉ ku logo tutulũ ngbiĩ tɨpa i mäi ko yò ni bäkindä. Fuä hä, si alengbe kʉ yägä ayägä. 13 Mbata fu kʉ ndʉ, kʉ kiyämbu abolo bawe (10) dagba gako abolosʉnge kifʉku bakele pa falanga* ku be yo ni ba sã sã kinyã fu yo: ‹Óni sonosi gu gimi afalanga le da ku hõ mi kayägä ni.› 14 Ono abolo gako ngbiĩ asogo ko gbẽ. I kikedi amokedi ti fuä ko tɨpa kanyã: ‹Ani aida nga gí kʉmba le zogo lani te.› 15 Ono fuä maã yo ko ni bäkindä, kʉ kiyägä ku logo gako ngbiĩ. Kʉ kiyämbu gako abolosʉnge ku pati ko nga ägu yo kʉ afʉku gako afalanga ku beyo tɨpa kainä waĩ bolo na bolo asonosi he. 16 Bambata bolosʉnge kiyee kinyã fu ko: ‹Baɨla, gamu falanga akʉsi kula afalanga bawe (10).› 17 Kʉ kinyã fu ni: ‹Si wenengaĩ! Wene bolosʉnge nga mo! Bämbikä mʉ amängi sunge na tǒni hẽ ngba lulu gene, mi fʉ pa gbiã folo lii agbata bawe (10).› 18 Uwe bolosʉnge kigbisi koyò dʉ ko ni kinyã: ‹Baɨla, gamʉ falanga akʉsi kula afalanga bisuẽ (5).› 19 Baɨla kinyã fu ko: ‹Mo â, mi fʉ pa gbiã folo lii agbata bisuẽ (5).› 20 Gu kula ni kiyee kinyã fu ko: ‹Baɨla, gamʉ falanga gi dʉ le. Mi akäĩ he na ngba lokoo kibanda ha. 21 Mi ǎgunde be lo bämbikä mo ni igilãigilã bolo. Mʉ nádia gu hẽ adia angia nga mo namäĩ he ya, mʉ nákẽ gu zende ahẽ akẽ nga gu angia nga mo nalũ he ya.› 22 Bäkindä kinyã fu ko: ‹Mo, gbegbelẽ bolosʉnge, mi nikasala ngbangalo kina kuti ndikili fulalo. Wa mʉ aini he ainä ya igilãigilã bolo ningia mi, ya mi nádia gu hẽ angia nga mi namäĩ he ya, kinikẽ ägu ahẽ angia nga mi nalũ he ya. 23 Tɨpa gini hẽ tie mʉ ǎmaã nga gimi falanga tini ku baki yò ya? Ka mi yägä wele kidi he si nakusi kula ha ku lii he.› 24 Fuä hä, kʉ kizɨna hẽ fu ägu abolo nadʉ hõ kinyã: ‹Oni di gi falanga le be ko kifʉ he fu gu ko dʉ na ni bawe (10).› 25 Ono i kinyã fu ko: ‹Baɨla, kʉ ima dʉ na afalanga bawe (10) be ko!› 26 Bäkindä kinyã fu yo: ‹Mi nagʉmba ha fu loni ya gu bolo dʉ na hẽ beni, i afʉ kula ha fu ni belewe sʉsi. Ono guni dʉ na hẽ tǒni gbua, zavula gu tǒni he dʉ be ni i adia ha adia. 27 Ono tɨpa ägu asogole náká pa dʉ mi ni bäkindä lii yo, oni yée na yo konò, kiyele gõlõyo ku bala bängile.›»

28 Fuä pe Yesu gi pai le, kʉ kingbe mbatayò fu gako abawiliki kandʉ ku Yelusalema yò. 29 Hõ kʉ ǎmbeda ni ku logo ägu akpolo nangia Betefaza wasã na Betania, mbembedi na ägu agangala i ayamba ha gangala Aolive*, kʉ kikedi abawiliki uwe i pele mbatayò. 30 Kʉ kinyã fu yo: «Óni ndʉ ku logo gu kpolo dʉ mbatayò le. Hõ oni kada ni yò, oni äbi palanga ane vo yo lu avo, bóló ata sungä ngä li lu mbata ya. Óni zäki lu kiyee na ũ konò. 31 Ka bolo sana loni ninyã: ‹Tɨpa gini hẽ oni azaka lu tini?› Oni akalaga ha ya: ‹Baɨla nakpi nyämu lu.›»

32 Agu abawiliki uwe le kindʉ, i kigbiã apai â wa gu Yesu agʉmba ha fu yo. 33 Hõ i ǎzaka gu palanga ane le ni, aɨlalu kisana yo kinyã: «Tɨpa gini hẽ oni azaka gu palanga ane le tini?» 34 I kikalaga ha kinyã: «Baɨla du nakpi nyämu lu.» 35 I kindʉ na ũ koyò dʉ Yesu ni. I kima gäyo alokoo aulu lu, kisungusi Yesu aulu lu. 36 Wa Yesu ǎndʉ ku mbatayò, abolo kinimã gäyo alokoo sende bängili gene tɨpa kailisä ko. 37 Kʉ aima mbeda kuti gu gene nǎzolã ti ngbädu gangala Aolive. Limbasa abawiliki dundukä adʉ́ na ngbalago. I kitona ta ngbäyo nyänyäkĩ niilisi limä Mbäli tɨpa ägu ailiwä iliwä apai dundukä i äbi he. 38 I kininyã:

«Mákʉ dʉ fu gu bäkindä nayee ti limä Baɨla!

Zeleda dʉ ngbängbätulũ yò

taälimä kidʉ ku ngbängbätulũ ali yò gbẽ!»✝

39 Gu kula Afalusi nadʉ dagba limbasa abolo kinyã fu Yesu: «Gbiã, mʉ zã gamʉ abawiliki i ongo!» 40 Yesu kikalaga ha fu yo kinyã: «Mi nápe he fu loni ya ka i kisi ngbäyo ti gäyo, ambia ata ngbaha!»

41 Hõ Yesu ambedi ni na gu gbata nga Yelusalema, kʉ kibi he, kikpäli kuti ni. 42 Kʉ kininyã: «Soo, Yelusalema! Ka mʉ nilengbe aleme â tigamʉ kainä gene gbiã zeleda! Ono awele, si ni õkõ õkõ hõ bala bängilo. 43 Bämbikä äulu ayee ku lii lo, avʉlalo ambakada bäyo pati lo, i ake pati lo kilikili kinifiã lo kubäni na kubäni. 44 I abuluwä lo abuluwä dundukä, mo wasã na avululo. I ambʉ nga mbɨa sã te li akula ha. Memé bämbu hõ sã te nikanye ngba ndʉhe. Bämbikä mʉ ainä ngä legbo ga Mbäli undähẽ folo te.»

45 Fuä hä, Yesu kiyǎlimi ku bakele bämbu Mbäli yò, kʉ kitona danda ägu abolo nǎbaga ahẽ yò. 46 Kʉ kinyã fu yo: «Si ni kẽkẽ he ya: ‹Gǐ bämbu ádʉ ni bämbu kpala fu Mbäli.› Ono oni, oni sa ha tigǒni ni ba dʉngulãtise nga ga aɨla diĩ.✝»

47 Yesu ǎyugä pai äulu dundukä bakele bämbu Mbäli yò. Agbiã abazomutumä wasã na abábanda andikä, gbiã kuti abázogo abolo ǎgbata kaimä ko. 48 Ono i ǎgbiã nga gene imä ko te bämbikä abolo dundukä ǎdega tuyo kagiã ko silisili.