1 Yesu kiyämbu gako abawiliki bawe na uwe (12), kifʉ tändu wasã na ʉme fu yo tɨpa danda adaimuna dundukä na tɨpa husa abolo be akaza. 2 Kʉ kikedi yo katʉngusa pa ga Mbäli kindä na kahusa abolo kaza. 3 Kʉ kinyã fu yo: «Ka oni di nga hẽ tɨpa gene wasã ya: si ngia tope, si ngia saki, si ngia liahẽ, si ngia falanga. Ka oni logo nga alokoo ni bauwe uwe ya. 4 Gu kpolo i kadia loni ni ku gume, oni niläki kina hõ da kuti gu ulu oni nikaguali logo gu lago le. 5 Ka i adia nga loni ku gume ya, oni kulu logo gu gbata le kitädi nvutu ti kpete ndʉloni tɨpa yugä hä fu abolo gu gbata le ya i mängi gbegbelẽ pai.»

6 Abawiliki kindʉ kinisusi logo alago ni basã sã, nitʉngusi Wene Pangbanga. I kinihusi abolo kaza logo ägu alago dundukä i ǎsʉsa ni.

7 Ti gu legbo le, Elode nangɨa gbiã lingala Galilaya kigĩ ägu apai dundukä Yesu ǎmanga ha. Wele kʉ adʉ́ na bakabängilise bämbikä kula abolo ǎnyã wẽ Yoane du nazingi be kpio. 8 Kula yo ninyã Elia du yägä. Gu kula yo belewe ǎbelã ha ya bolo sã dagba ägu anäbi nadʉ́ mbata du zingi be kpio. 9 Elode kinyã ku ngbäduko yò: «Yoane, mi anyã ni tile i de gõko. Da nga gini tie mi agiã ägi apai le lii päni?»

10 Fuä yägä amokedi, i kitangalã ägu apai fu Yesu dundukä i amängi he. Kʉ kiguali na yo kikpala tiko na yo ti abolo kindʉ na yo bala koyò du gu gbata ni nga Betesaida. 11 Limbasa abolo kiini he, i kipe fuä ko. Yesu kidi yo ku gume, nipe pa ga Mbäli kindä fu yo kinihusi ägu yo nǎkpi nyämu he. 12 Ulu atoná ti. Wele, amokedi ti bala yo bawe na uwe (12) kiyee fuä Yesu kinyã fu ko: «Mʉ fʉ́ gene fu limbasa abolo, í ndʉ́ ku logo ägu akpolo na ägu agbalia dʉku mbembedi elẽ tɨpa ziä ba lame na gbiã liahẽ yò. Bämbikä ani elẽ ngbäkungbä.» 13 Ono kʉ kinyã fu yo: «Oni ni tiloni, oni fʉ́ liahẽ fu yo.» I kikalaga ha kinyã: «Ani na mapa kina bisuẽ na atiä uwe gbua. Watadʉ si aida ani ndʉ ni tilani kangbe liahẽ fu ägi abolo le dundukä?» 14 Bange ägu akumba nadʉ hõ adʉ wa kútuu bisuẽ (5.000).

Yesu kinyã fu abawiliki: «Oni sungusi yo logo alii gbuu ni ba bisuẽ bawe (50).» 15 I kimängi he kina wo, kisungusi abolo dundukä. 16 Yesu kidɨ ägu amapa bisuẽ na ägu atiä uwe le, kitumba bängiliko ku ngbängbätulũ yò, kikpäli fu Mbäli tɨpa uka makʉ ku lii he. Kʉ kikuä hä, kifʉ he fu abawiliki tɨpa i gämu he ti abolo. 17 Abolo dundukä kili, kimbiki. I kidungulã yangada ha, si kihĩki abumä bawe na uwe (12).

18 Ulu sã, Yesu akpálá tiko ti abolo kakpala fu Mbäli. Abawiliki adʉ wasã na ko. Kʉ kisana yo kinyã: «Limbasa abolo nabelã ya da nga mi?» 19 I kikalaga ha kinyã: «Agu yo nabelã ya Yoane Babatiza nga mo, kula yo ninyã Elia nga mo, gu kula yo belewe nabelã ya mo ni bolo sã dagba ägu anäbi nadʉ mbata zingi be kpio.» 20 Kʉ kisana yo ninyã: «Na oni tigǒni, oni nâbelã ya da nga mi?» Petelo kituka ngbako kinyã: «Gu Masiya Mbäli akedi ko nga mo.»

21 Yesu kizã yo nyänyäki ya ka i pe nga ha fu bolo sã ya. 22 Kʉ kizungudi fulako ninyã: «Si naida Wili bolo lungä alungä gbẽ. Si naida abaakʉmba lingala, agbiã abazomutumä gbiã kuti abäyugu andikä, i sogo pa ko. Si naida i imi ko nga Wili bolo, ono ti fuä biata ulu, kʉ azinga be kpio.»

23 Fuä hä, Yesu kisa ngbako fuä abolo dundukä kinyã: «Ka bolo idi dá ni gimi bawiliki, ní mbu peka kina fuä gu pai ni akpi nyämuhe, ono ni aká gäni wägiwägingwa kipe fuä le. 24 Bämbikä gu bolo idi kabatasa gäni bata, ni aingɨsa ha aingisa. Ono gu ni nikaingisa gäni bata tɨpa le, ni abatasa ha batasa. 25 Gini mǔndä ka bolo gbiã hã ka ni kumukä logo zäginò na baha ono ni kiingisi gäni bata ni tini watadu kigbelesi he? 26 Bämbikä ka bolo kpi zeẽ lii pale na tɨpa sangbale, Wili bolo akpi zeẽ â lii päni hõ kʉ kayee ni logo gako taälimä na logo ga Bako taälimä wasã na ga zɨazɨa amalaika. 27 Mi nagʉmba ha fu loni ni lengo ya dagba ägu abolo du elẽ, ägu yo kina hõ nikäkpi ngä mbata fu bi ga Mbäli kindä ya.»

28 Aulu wa bisuẽ bäti biata fuä peka ägi apai le, Yesu kidi Petelo, Yoane na Yakobo kibiti ku lii bagangala yò tɨpa kpala fu Mbäli. 29 Hõ kʉ ǎkpala ni fu Mbäli, kpäkpuko yò kitona sa tihe ni kĩ akĩ, gako lokoo kivulu kpäu. 30 Nibasã, akumba uwe ǎfʉla na ko. Mose gbiã kuti Elia nadʉ. 31 I ǎkĩ akĩ be ga Mbäli täälimä. I ǎfʉla na Yesu lii pa kpioko nǎmbeda kalengbesa tihe Yelusalema yò. 32 Petelo gbiã kuti ägu akʉlako nadʉ wasã nako adʉ logo doloma doloma lame. I yǎzingi be lame, i kibi ga Yesu taälimä, kibi akumba uwe nadʉ wasã na ko. 33 Hõ ägi akumba le ǎguali ni pati Yesu, Petelo kinyã fu ko: «Gbiã, si ni wene he anidʉ elẽ. Ani dudua abandawuli biata: gu sã folo, gu sã fu Mose, gu sã fu Elia.» Kʉ ǎinä ngä gini pai kʉ ǎpe he te. 34 Kʉ tadʉ na fʉla wele, dubä kiyee nibasã kidädi yo na kilimä hä. Wa i ǎlimä ku logo ho yò, gunde kizi yo. 35 Fula sã kipäyi logo dubä yò ninyã: «Ndikili wile nga gi ko le mi asia ko. Oni gĩ kina ko!» 36 Fuä paa gu fula le, kina Yesu kinye ni sana ko. Petelo na Yoane gbiã kuti Yakobo ti gäyo kiongo kĩ, ka i agʉmba nga pai sã fu bolo lii gu pai i äbi he ya.

37 Gu kula gililago, fuä yägä yo lii bagangala yò, bakele limbasa abolo kiyee kagbiã Yesu. 38 Kʉmba sã dagba limbasa abolo kita ngbako kinyã: «Akoo Bäyugu, mʉ undä ngä wile bämbikä gǐ bangisã kumbagudee du. 39 Dedede, gbegbelẽ toló sã nâlimä ku logo ko yò, nibasã kʉ kinita ngbako, kʉ kiniti nizugba tiko, käkpu käkpu sʉle nikulu ngbako. Gu daimuna le kiniza kambu gudee fuä bakele mbusa, kpoto gudee naima hõka. 40 Mi azungädi gamʉ abawiliki i dändi gu daimuna le, ono ka i alengba nga na ni ya.» 41 Yesu kinyã: «Soo, oni nga azanga idapase ni hila hila abolo â, mi adʉ na oni na mi ahí gǒni pai da ti gini legbo?» Kʉ kinyã fu gu kʉmba le: «Mʉ yée na wilo ku elẽ.» 42 Hõ gudee ǎmbeda ni, gu daimuna le kimelẽ ko ku sende, kizigizä ko nyänyäki. Ono Yesu kizɨna hẽ nyänyäki fu daimuna, kihusi gi kumbagudee le, kigäsi ko fu bako. 43 Wele, kíki ga Mbäli bakele täälimä kizi abolo dundukä.

Wa abolo dundukä adʉ logo kíki be gu pai dundukä kʉ amängi he, Yesu kinyã fu gako abawiliki: 44 «Oni mäĩ gi pai mi akape he fu loni le ku tuloni yò: i agama Wili bolo ku be asogoko.» 45 Ono ka abawiliki agiã nga tiyo logo gi fula le ya. Si adʉ́ ni gbugbu he fu yo wele i kizanga inä sangba ha. I ǎgunde kasana Yesu tini.

46 Abawiliki kitona ti kango dagba yo ya da nga nyänyäki pa bolo gbẽ dagba yo. 47 Yesu aini gu pai i ǎbelã hã. Wele, kʉ kidi gudee sã kigbisi lu ku pati ko. 48 Kʉ kinyã fu yo: «Gu bolo nikadia gi tǒni gudee le ku gume ti limäle, ni di kina le ku gume. Gu bolo di le ku gume, ni di gu ko nakedí le ku gume. Bämbikä, gu bolo nga tâta pa bolo dagba loni dundukä, ni gu tie nga kĩkĩ pa bolo gbẽ.»

49 Yoane* kituka ngbako kinyã: «Bäyugu, ani äbi kʉmba sã nǎdanda adaimuna ti limälo. Ani aidí kazã ko tini bämbikä kʉ apeka nga lo wa ani te.» 50 Ono Yesu kikalaga ha kinyã: «Ka oni zã nga ko ya, bämbikä guni ásoga nga loni ya, ni na oni wasã.»

51 Hõ legbo gate ko ku ali yò ǎmbeda ni, Yesu kika kuti pa ndʉgeko ku Yelusalema yò. 52 Kʉ kikedi kula abolo í pele mbata yò. I kindʉ kida limi ku logo gbalia sã logo ga ambe Samalia lingala tɨpa mbakada pa dá Yesu. 53 Ono ka ambe Samalia adia nga ko ku gume ya bämbikä kʉ ǎndʉ ku Yelusalema yò. 54 Agu abawiliki nangia Yoane na Yakobo kiyǎgĩ he, i kinyã fu Yesu: «Baɨla, mʉ idi he ani yämbu we si gitä ngbängbätulũ yò kanyasa pa ägi abolo le?»

55 Ono Yesu kisa tiko koyo du yo ni, kizã yo nyänyäki. 56 Wele, i kindʉ ku logo kula gbalia.

57 Wa i adʉ ngba gene gäyo ndʉge, kʉmba sã kinyã fu Yesu gene: «Mi apeka lo logo gu aba dundukä mʉ kǎndʉ ni.» 58 Yesu kinyã fu ko: «Agalawa na ayalola tini, azile â na abämbula tini. Ono Wili bolo ti gako, zanga gu ba ka kʉ ongodi ni.»

59 Yesu kinyã fu gu kula bolo: «Mʉ peke fuä le.» Ono gi bolo le kikalaga ha fu ko kinyã: «Baɨla, mʉ idi he fele mi ndʉ kakpisidä bämi mbataano.» 60 Ono Yesu kikalaga ha fu ko kinyã: «Mʉ mbu ägu abolo toloyo naima kpi i kpisidi gäyo akangba. Ono mo tigamʉ, mʉ ndʉ katʉngusa pa ga Mbäli kindä.»

61 Gu kula bolo belewe kinyã fu Yesu: «Mi nikapeka lo Baɨla. Ono mʉ idi he mi ndʉ kapaa kuti gimi abolo kpolo ni yangada ha.» 62 Yesu kikalaga ha fu ko kinyã: «Gu bolo mäĩ beni ti sʉnge binä kiningele ku sayo, ni alengba nga kamanga wene sʉnge fu ga Mbäli kindä te.»