1 Ulu sã ti ägu alegbo le, wa Yesu ǎyugä pai bakele bämbu Mbäli yò kinitʉngusi Wene Pangbanga fu abolo, agbiã abazomutumä wasã na abäyugu andikä gbiã kuti ga Ayuda abaakʉmba kigbädi. 2 I kinyã fu ko: «Mʉ pe nga ha fu lani ya gini pagbiã mʉ namanga ägi apai le na ni? Da fʉ gi pagbiã le folo?» 3 Kʉ kikalaga ha fu yo kinyã: «Mi â, mi nakasana loni. Oni pe he fele: 4 Gu batisimo Yoane ǎfʉ he, da naasiá pa ha fu ko: Mbäli watadʉ abolo?» 5 I kiwisigi he dagba yo ninyã: «Ka ani nyã: ‹Si ayee be Mbäli›, kʉ anyã fu lani: ‹Tɨpa gini hẽ oni ǎida nga ga Yoane tʉngusa pai tini ya?› 6 Ono ka ani nyã: ‹Ga Yoane batisimo ayee be abolo›, abolo dundukä azumudä lani ni mbɨa. Bämbikä i idi he ya Yoane adʉ́ ni näbi.» 7 Wele, agbiã abazomutumä wasã na abäyugu andikä gbiã kuti ga Ayuda abaakʉmba kikalaga ha kinyã i ainä ngä wäli ga Yoane batisimo ayee ni te. 8 Yesu kikalaga ha fu yo kinyã: «Mi â, mi agʉmba nga pa gu pagbiã fu loni mi amanga gi pai le na ni te.»

9 Fuä hä, Yesu kisa ngbako fuä abolo, kitona pe kpia pai wa gele fu yo: «Kʉmba sã alũ äti vino, kizogo pa ha ku be abolosʉnge í nitumä pa ha fu ko. Kʉ kindʉ nʉngʉlo ku li gbanga legbo gbẽ. 10 Legbo kata zũzũ vino kiyǎda, kʉ kikedi bolosʉnge sã fuä ägu abolosʉnge le tɨpa í fʉ bete zũzũ vino fu ko. Ono i kita gi bolo le atá kidändi ni ni ku beni. 11 Baɨla äti vino kikedi kula bolosʉnge fuä yo. Gi bolosʉnge le â, i kita ko ata, kiwäsi ko, kidändi ko ni ku beko. 12 Baɨla binä kikedi biata bolosʉnge fuä yo. Gi bolosʉnge le â, i kihõgosi ni kidändi ni. 13 Baɨla äti vino kisana tiko tie kinyã: ‹Mí mängi waĩ? Mi nikakeda wile kpí mi nyämu ko gbẽ. Mi ainä wäli ya i ailisä ko ailisä.› 14 Ono ägu abolosʉnge le kiyǎbi wili baɨla äti, i kifʉla dagba yo kinyã: ‹Di kumbä du le. Ani imi ko tɨpa hũ kumbä dá ni gǎni!› 15 I kikusi ko kusa logo äti vino, kiimi ko. Baɨla äti vino amanga ägi abolosʉnge le waĩ?

16 Kʉ ayee, kinyäsi pa ägu abolosʉnge le, kifʉ äti vino ku be akula yo.» Abolo kiyǎgĩ gi fula le, i kinyã: «Ka gule mängi ngä wasã te.» 17 Ono Yesu kidʉa bängiliko tiyo kisana yo ninyã: «Sangba gi Ziazia Kẽkẽ Apai le tie nga gini hẽ:

‹Gu mbɨa adua bämbu abá ha ku sayò,

si gu nada ni nyänyäki pa mbɨa nga gu i amaã hã ti tukpu bämbu tɨpa kadua bämbu ku li he?✝›

18 Gu bolo dundukä nikati ku li gu mbɨa le, ni akuä akuä. Gu ni gu mbɨa le nikati ku li ni, si akpetekolo ni akpetekolo.»

19 Abäyugu andikä gbiã kuti agbiã abazomutumä kigbata kaziä Yesu ti kina gu legbo le. Ono i kigunde be abolo. I aima luga tiyo na ni ya kʉ apé gi kpia pai le fu kina yo. 20 I kienge wisigä Yesu. Sidu, i kikedi abämäĩ fuä ko nǎmanga tiyo wa lulu abolo tɨpa kalẽ ko logo fugo yò hõ ka kʉ koto ni ngbako yò, í lu hõ kaziä ko. Wele, í lu hõ kakita ngbângako ku be tändu nga ga gbiã lingálá Aloma. 21 Agi abämäĩ le kisana Yesu ninyã: «Bäyugu, ani ini he ya mʉ nafʉla kiniyugu pai ni lulu he. Mʉ nayugä ga Mbäli gene logo lengo yò zanga gunde bängili abolo. 22 Nyã mo, ani lengbe katumä pákʉ fu Kaisala, watadu te?» 23 Yesu kiyǎini gäyo bilikí, kʉ kinyã fu yo: 24 «Óni yugu ngä gu zende falanga nga denalio* fele. Kpia dá na limä dá dʉ li he?» I kikalaga ha kinyã: «Kpia Kaisala na limä Kaisala dʉ li he.» 25 Yesu kinyã tie fu yo: «Wele, óni fʉ gu nga ga Kaisala fu Kaisala. Óni fʉ gu nga ga Mbäli fu Mbäli.» 26 I kizanga ziä Yesu ti fulako ku bängili abolo. Ono ngbäyo kizele be gako kalaga pai, i kiongo ku kĩ.

27 Fuä hä, bete Asaduseo✝ kiyee fuä Yesu. Asaduseo ananyã zinga be kpio tini te. I kisana Yesu kinyã: 28 «Bäyugu, Mose akẽ gi lugute le fu lani ya: Ka kʉmba sã dʉ na wilinäni nadɨ́ dee, gu wilinäni le kikpi kimbʉ diäni zanga vunga, si naida ni dɨ däkulugbä gu wilinäni nakpí tɨpa kusa tunga ti limä guni nakpí*. 29 Awilinä adʉ yò bisuẽ bäti uwe (7). Bambata ko kidɨ dee, ono kʉ kikpi zanga vunga. 30 Gu uwe ko kidɨ gu däkulugbä le, ono kʉ kikpi zanga vunga. 31 Fuä hä, gu biata ko kidɨ li. Si kimängi kina wo tɨpa yo bisuẽ bäti uwe (7) dundukä. I kpiki zanga vunga gudee. 32 Ti digisä hä, gu dee le kikpi â ti gäli. 33 Lago zɨnga abolo be kpio, gu dee le adʉ tie ni dia gini ni dagba yo wa yo dundukä aima dɨa li ni dee?» 34 Yesu kikalaga ha fu yo kinyã: «Logo gi zägino le, akumba na adee naloga tiyo. 35 Ono ägu akumba na ägu adee nikalẽ nazinga be kpio na kabata logo gu ngbiĩ nikayee, i aloga nga tiyo belewe te. 36 I alengba nga belewe käkpikä te, bämbikä i adʉ wa kina amalaika. I adʉ ni äwili Mbäli wa i naima zinga be kpio. 37 Tɨpa gu pai näbi pa zɨnga abolo be kpio, si nga gu pai Mose ayugu he logo pa gu zigidili ngwa milã we ǎkĩ logo ho ti gu legbo kʉ ayämbu Baɨla ni gu Mbäli Abalahama, Isaka na Yakobo náilisä ko zavula wa i aima kpikä. 38 Mbäli ni gu Mbäli nga ga ägu abolo naima kpikä te, ono Mbäli nga ga ägu abolo dʉ ti ʉnga. Bämbikä abolo dundukä ti unga fu ko.» 39 Kula abäyugu andikä kituka ngbäyo kinyã: «Bäyugu, mʉ ima gʉmba ha ni wene he.» 40 Ka boló aasada nga belewe kasana Yesu wasã ya.

41 Yesu kisana abolo tie kinyã: «Waĩ waĩ du abolo anyã ya Kilisito Masiya ni wili Davidi? 42 Bämbikä Davidi ni tiko akẽ he logo buku Abia Tambwa hẽ ninyã:

‹BAƗLA anyã fu Baɨlale:

Mʉ sungu ku kʉmba bele

43 Da kuti gu legbo mi nikasa avʉlalo ni ku tii kpetendʉlo✝.›

44 Davidi nayamba Masiya tie ni Baɨla. Waĩ lengbe Masiya kadʉ ni wili Davidi?»

45 Yesu kinyã fu gako abawiliki ku bängili ägu abolo dundukä nǎgiã ko: 46 «Óni banda tiloni ti wilika abäyugu andikä nínakpi nyämu tá dagba abolo logo bawenewene alokoo, nikpi nyämu ábolo nipäi tiyo na ilisä logo alimbasa, ninaida sungä lii abásungä nga ga ilisä logo abämbutɨlia na abá ilisä logo abá pumbä. 47 I ninâgbu ga adäkulugbä ahẽ kinimängi gbanga gbanga akpala kpẽ fu Mbäli tɨpa yugä hä ya wene abolo nga yo. Sala ngbanga adʉ ku li yo nyänyäki gbẽ.»