1 Hõ bäkindä Aloma nga Tibele Kaisala ada ni na agalã bawe na bisuẽ (15) logo pa zoga lago, Posio Pilatu adʉ ni gbiã lingala Yudaya, Elode angɨa gbiã lingala Galilaya, wilibako nga Filipo kingɨa gbiã gu lago nga Itule na Talakonitide, Lisania kidʉ ni gbiã Abilene yò. 2 Ti gu legbo le, Ane na Kaifa adʉ ni agbiã abazomutumä. Mbäli kimäi fulako ngbäkungbä yò ngba Yoane nangɨa wili Zakalia. 3 Sidu, Yoane kitona ta logo lingala pangba bakele di nga Yolodani na ba ha, kitatʉngusa pai ninyã: «Oni sa gǒni bata kidi batisimo tɨpa Mbäli vu loni ti gǒni aingapai.»

4 Â wa du he ni kẽkẽ he logo buku nga ga näbi Isaya ya:

«Fula bolo sã napaa ngbäkungbä yò ya:

Oni mbäkädi gene fu Baɨla,

Oni lʉgu agene fu ko nzũ!

5 Oni hĩkisĩ angbongbo alago dundukä,

Oni yalia abagangala na agangala dundukä,

Oni lʉgu ägu agene dundukä dʉ ni nunugä nunugä hä,

Oni yalia ägu agene dʉ kpukutu kpukutu.

6 Wele, abolo dundukä äbi waĩ Mbäli akabatasa abolo.»

7 Limbasa abolo kiniyee koyò du Yoane ni tɨpa kʉ fʉ batisimo fu yo. Kʉ kininyã tie fu yo: «Oni, angbatʉnga awoo! Da yugu he fu loni ya oni oto be ga Mbäli zɨnga nikayee? 8 Oni mängi gu wene wene apai tie nayugä hä ya oni ima sa gǒni bata! Ka oni ka nga kina kuti nyã ku logo loni yò ya atita Abalahama nga oni ya. Bämbikä mi nápe he fu loni, Mbäli lengbe alengba kasa ägi ambia le ni awili Abalahama! 9 Mangwa ima da tɨpa kama ngwa ku sende ti talã hã. Gu ngwa dundukä azũ ngä wene lindihe ya, i ade he ade kiba ha ku we yò.»

10 Alimbasa abolo kinisana ko ninyã: «Ani mängi gine tie?» 11 Yoane kikalaga ha fu yo ninyã: «Gu bolo dʉ na alokoo uwe, ni fʉ gu sã fu guni adʉ nga na ni ya. Gu ni dʉ na liahẽ ni mängi â kina wo.»

12 Abägi pákʉ kiyee â tɨpa kadia batisimo. I kisana ko kinyã: «Bäyugu, ani mängi gine?» 13 Kʉ kinyã fu yo: «Ka oni gedi ngä gino fu bolo sʉsi gu i alengbesi he fu loni ya.»

14 Asuda kisana ko â kinyã: «Na ani tigǎni, ani mängi gine?» Kʉ kinyã fu yo: «Ka oni gbʉ nga ga abolo ahẽ ya, ka oni kiti nga zilee ku lii bolo ya. Ono, oni idi kina pa gǒni mutumä na wene ngbäduse.»

15 Abolo ǎsungudä pa yée Masiya. I dundukä ǎsasana tiyo ku ngbäduyo yò singia Yoane angɨa Masiya. 16 Yoane kikalaga ha fu yo kinyã: «Mi tigimi, mi nafʉ batisimo fu loni na ime. Ono gu ko nayee sayò dʉ na tändu sʉsi le, mi alengba nga kazaka gili gako katala te. Ko tigako, kʉ afʉ batisimo fu loni logo Ziazia Toló na we. 17 Kʉ na gako hũ peka ahẽ beko tɨpa kagilisä gako bátaka zende ahẽ. Kʉ amaa zende vʉnde ku logo gako gbämu*, ono umuhe tiga ha, kʉ azo ho logo gu we kǎbisä ngä wasã ya.»

18 Yoane kitatʉngusa Wene Pangbanga tie fu abolo kinizungädi yo na agu akʉla dʉngu alugʉte. 19 Ono Yoane azã Elode nangɨa gbiã Galilaya wa kʉ adi Elodia nangɨa dia wilinäko. Kʉ azã Elode â ti gu kʉla gbegbelẽ apai dundukä kʉ amängi he. 20 Ku lii ägi agbegbelẽ apai le dundukä, Elode kiba Yoane ku kámba yò.

21 Fuä abolo dundukä di batisimo, Yesu kidi batisimo â. Hõ kʉ ǎkpala ni fu Mbäli, ngbängbätulũ kizäki. 22 Ziazia Toló kidi kpia mbipo kigitä ku lii ko, fʉla kiyee ngbängbätulũ yò ninyã: «Ndikili wile nga mo dʉ ngbädule yò! Ngba mo tile gbẽ.»

23 Yesu adʉ na agalã wa biata bawe (30) hõ kʉ atona manga gako sʉnge ni. Abolo ǎbelã ha ya wili Yozefu nangɨa ko. Yozefu nangɨa wili Eli, 24 Eli angɨa wili Matate, Matate nangɨa wili Levi, Levi nangɨa wili Meliki, Meliki nangɨa wili Yanai, Yanai nangɨa wili Yozefu, 25 Yozefu nangɨa wili Matatia, Matatia nangɨa wili Amosa, Amosa nangɨa wili Naumi, Naumi nangɨa wili Esili, Esili nangɨa wili Nagai, 26 Nagai nangɨa wili Maate, Maate nangɨa wili Matatia, Matatia nangɨa wili Semeine, Semeine nangɨa wili Yoseke, Yoseke nangɨa wili Yoda, 27 Yoda nangɨa wili Yonane, Yonane nangɨa wili Lesa, Lesa nangɨa wili Zolobabele, Zolobabele nangɨa wili Salatiele, Salatiele nangɨa wili Neli 28 Neli nangɨa wili Meleki, Meleki nangɨa wili Adi, Adi nangɨa wili Kosame, Kosame nangɨa wili Elemadame, Elemadame nangɨa wili Ele, 29 Ele nangɨa wili Yesu, Yesu nangɨa wili Eliezele, Eliezele nangɨa wili Yolime, Yolime nangɨa wili Matate, Matate nangɨa wili Levi, 30 Levi nangɨa wili Simeona, Simeona nangɨa wili Yuda, Yuda nangɨa wili Yozefu, Yozefu nangɨa wili Yonama, Yonama nangɨa wili Eliakime, 31 Eliakime nangɨa wili Melea, Melea nangɨa wili Mena, Mena nangɨa wili Matata, Matata nangɨa wili Natame, Natame nangɨa wili Davidi, 32 Davidi nangɨa wili Yese, Yese nangɨa wili Obede, Obede nangɨa wili Boazi, Boazi nangɨa wili Sala, Sala nangɨa wili Naasona, 33 Naasona nangɨa wili Aminadabe, Aminadabe nangɨa wili Adimine, Adimine nangɨa wili Alini, Alini nangɨa wili Eselome, Eselome nangɨa wili Peleze, Peleze nangɨa wili Yuda, 34 Yuda nangɨa wili Yakobo, Yakobo nangɨa wili Isaka, Isaka nangɨa wili Abalahama, Abalahama nangɨa wili Tela, Tela nangɨa wili Naola, 35 Naola nangɨa wili Seluge, Seluge nangɨa wili Lagau, Lagau nangɨa wili Pelege, Pelege nangɨa wili Ebele, Ebele nangɨa wili Sala 36 Sala nangɨa wili Kainama, Kainama nangɨa wili Alapakisade, Alapakisade nangɨa wili Seme, Seme nangɨa wili Noa, Noa nangɨa wili Lameke, 37 Lameke nangɨa wili Matusela, Matusela nangɨa wili Henoke, Henoke nangɨa wili Yalete, Yalete nangɨa wili Malalele, Malalele nangɨa wili Kainama 38 Kainama nangɨa wili Enose, Enose nangɨa wili Sete, Sete nangɨa wili Adamu, Adamu nangɨa wili Mbäli.