1 Ulu sã, Yesu kinyã fu gako abawiliki: «Ka ndʉ tigo abolo ku logo ingapai zanga nga te, ono lungä fu gu bolo namá mbulu tigo ku logo ingapai. 2 Si sʉsi na ngbanya fu ni i vo bambia sã hẽ ku gõni kiba ni ku logo bäime, kuba gu pai nga ni ma mbʉlu tigo ku logo ingapai fu bolo sã dagba gi lukutu yo le*. 3 Oni banda tiloni tie ti gǒni mangapai! Ka wilinamʉ mängi ingapai kuti lo, mʉ zã ni tini. Ka nisa ngbäduni ti gäni ingapai, mʉ kivu ni tini.

4 Ka ni mängi ingapai kuti lo bala bisuẽ bäti uwe (7) ti ulu sã, ni kiyee fuä lo bala bisuẽ bäti uwe (7) â ninyã: ‹Mi sa ngbädule ti gimi ingapai.› Mʉ vu ni ti gäni ingapai.»

5 Amokedi kinyã fu Baɨla: «Mʉ kiĩsi gǎni idapase.» 6 Baɨla kikalaga ha fu yo kinyã: «Ka gǒni idapase ni dʉ tǒni wa zende zũzũ mboyo, oni lengbe alengba kanyã fu gu bangwa le: ‹Mʉ muku tilo elẽ kindʉ kalʉ̃ tilo logo bäime yò›, si kiilisi sangbaloni ailisä.

7 Ka bolo sã dagba loni dʉ na gäni bolosʉnge nga guni ninasopa binä watadu ninabanda limbasa anya fu ni. Hõ gi bolosʉnge le kayägä ni äti yò, nyã mo baɨlani anyã fu ni: ‹Mʉ yée ni ipä kali liahẽ?› 8 Wasã te! Ono baɨlani anyã tie fu ni ya: ‹Mʉ mängi ligo fele, kivo gǎ lokoo sʉnge tɨpa kaundä le mi nili liahẽ nimbili hẽ, fuä hä tie mʉ kilʉ kali liahẽ na kambila hẽ â tigamʉ. Anga wote?› 9 Nyã mo si aida baɨla tambwa gu bolosʉnge le atambwa bämbikä ni mängi gu pai i afʉ lugute lii pa ha fu ni? 10 Oni awo tigǒni, hõ oni kamanga gu pai ni dundukä i nifʉ lugute lii pa ha fu loni, oni nyã: ‹Kungbä abolosʉnge gbua nga ani, ani mängi kina gu pai si nilengbe ani mängi he.›»

11 Ulu sã, wa Yesu ǎndʉ ku Yelusalema yò, kʉ kisʉsi ngbanda alingala Samalia na Galilaya. 12 Hõ kʉ ǎlimä ni ku logo kpolo sã, abolo kungú bawe (10) kiyee kagbiã ko. I kilu tiko tutulũ tǒni, 13 kitona ta ngbayo ninyã: «Yesu, Gbiã, mʉ bi lungälani!» 14 Hõ Yesu äbi yo ni, kʉ kinyã fu yo: «Oni ndʉ käyugä tiloni fu abazomutumä.» Hõ i ǎndʉ ni koyò, i kigili be kungú. 15 Gu ko sã dagba yo kiyǎbi he ya kʉ ima hu, kʉ kikalaga tiko koyò dʉ Yesu ni kitata ngbako nitaäsi limä Mbäli. 16 Kʉ kikuku kidʉa kpäkpuko ku sende pati ndʉ Yesu, kitambwa ko. Ono mbe Samalia nangia ko tigako. 17 Wele, Yesu kisana hẽ kinyã: «Anga abolo bawe (10) nihu te? Agu akula yo bisuẽ bäti biama (9), i wäli? 18 Bolo hõ sã te kalaga tini tɨpa kataasa limä Mbäli, ono kina gi yée ayee bolo le sã?» 19 Fuä hä, Yesu kinyã fu ko: «Mʉ guali kiga, gǎ idapase bätäsi lo.»

20 Ulu sã, Afalusi kisana Yesu kinyã: «Ga Mbäli Kindä ayee tie ti gini legbo?» Kʉ kikalaga ha fu yo kinyã: «Ga Mbäli Kindä ayee ngä ni gu hẽ ka i bi he äbi ni bängilise te. 21 I anyã nga nyã: ‹Oni ngele! Si gi dʉ le, watadu si gu dʉ yò le te!› Bämbikä, óni íni he wenengaĩ ya ga Mbäli Kindä ima da dagba loni.»

22 Fuä hä, Yesu kinyã fu gako abawiliki: «Legbo ayee, hõ oni käkpi nyämu bi Wili bolo ni zavula tɨpa ulu sã, ono oni äbi ngä ko te. 23 Ti gu legbo le, i anyã fu loni: ‹Kʉ gi dʉ nòlẽ›, watadu ‹Kʉ gu dʉ yòle.› Ono ka oni ndʉ nga koyò ya, ka oni olo nga koyò ya. 24 A wa gu gʉmbá naĩkpilä kifʉ timalago enga ti vulä ngbängbätulũ kubäni sã da kubäni, kina wo Wili bolo kadʉ ti ulu yägä ko. 25 Ono, si naida i lungäsi ko mbatano gbẽ, ngbatʉnga abolo gi alegbo le kisogo pa ko. 26 Apai amanga lago yägä Wili bolo â wa gu si amängi ti legbo Noa. 27 Abolo ǎli liahẽ kinimbili hẽ, akumba kinilogo adee na kinifʉ awili yo nga adegudee sa logatise da kuti gu ulu Noa alimi ku bakʉlungba yò. Fuä hä bakele bangbondo ayee kiimi yo dundukä. 28 Si adʉ â wa kina gu si amängi ti legbo Loto: abolo ǎli liahẽ kinimbili hẽ, i ǎngbeka ahẽ kinibäbägi ahẽ, i ǎlũlũkä ahẽ kinidudua abämbu. 29 Ono gu ulu Loto akʉlʉ Sodomo yò we baluti alʉ ngbängbätulũ yò kinina wa maĩ ku lii Sodomo, kiimi yo dundukä. 30 Si adʉ kina wo ti gu ulu Wili bolo käyugä tiko.

31 Ti gu ulu nikangia ha le, gu bolo nikadʉ lii gäni bämbu yò gäni ahẽ kidʉ dimä yò, ka ni zõlõ nga tɨpa kadia ha ya. Gu bolo â nikadʉ äti yò, ka ni kalaga nga tini ku kpʉni yò ya. 32 Oni tingidi gu pai namängi dia Loto. 33 Gu bolo nikagbata kabanda gäni bata, ni aingɨsa ha aingɨsa. Ono gu ni nikaingisa gäni bata, ni agbiã hã agbiã belewe. 34 Mi nápe he fu loni ya gu yʉlu nikangia ha le, abolo uwe (2) adʉ lii bapigo sã, i adia gu ni sã kimbʉ gu kula ni. 35 Adee uwe ago nisã hẽ wasã, i adia gu li sã kimbʉ gu kula li. 36 [Akʉmba uwe (2) adʉ äti yò kinimängi sʉnge, i adia gu ni sã kimbʉ gu kula ni.»]* 37 Wele, abawiliki kisana ko kinyã: «Baɨla, wäli si kamanga ni?» Kʉ kikalaga ha fu yo kinyã: «Hõ kangba kadʉ ni, yò gu anzagu kadungulã tila ku hõ ni.»