1 Ti gu legbo le, abolo kútu na kútu adʉngulã tiyo kinisäĩ tiyo asaã. Yesu kitona pe he mbatano fu gako abawiliki ninyã: «Oni banda tiloni ti ga afalusi toma* si nga bilikí. 2 Dädidädi pai hõ sã te ni kazanga kula gbayaga. Õkõ õkõ pai hõ sã â te i kazanga inä hä. 3 Bämbikä, gu dundukä oni apé he logo bitimä, i akʉsa ha ulu. Gu oni apé he ni patapata ku tu bolo yò dimä yò, i alʉ lii bämbu yò kagbada ha.

4 Awilinä, mi nagʉmba ha fu loni ya: Ka oni gunde nga be ägu abolo lengbe kaimä kpoto bolo ono fuä hä ka i alengba kamanga kula pai ya. 5 Mi nakayugä gu bolo lengbe oni kagunde beni: Oni gunde be gu ko lengbe käimä bolo fuä hä kidʉ na tändu kaba ni â ku lifelu* yò. Iĩ, mi nagʉmba ha fu loni, gu ko le du oni alengba kagunde be ko.

6 I nâbaga nga agoli bisuẽ na zende afalanga uwe gbua te? Ono, gu lu hõ sã te dagba la Mbäli aätädi lu. 7 Tɨpa loni tie susi, Mbäli ima inä bange mange liloni dundukä. Wele, ka oni dʉ nga na gunde ya bämbikä paloni nyäki susi limbasa ägu agoli le.

8 Mi nagʉmba ha fu loni ya gu bolo nikaida pale gbayaga ku bängili abolo, Wili bolo aida päni â ku bängili ga Mbäli amalaika. 9 Ono gu bolo nikaká pale ku bängili abolo, Wili bolo aká päni â ku bängili ga Mbäli amalaika. 10 Gu bolo nikafʉla gbegbelẽ bala Wili bolo, i avu ni ti gäni ingapai. Ono gu bolo nikasenga Ziazia Toló, i avu ngä ni ti gäni ingapai te.

11 Hõ i kandʉ na oni ni ku logo abämbutɨlia, ku bala bängili abäsäpu ngbanga na ku bängili agbiã, ka oni bäki ngä bängiloni tɨpa waĩ oni kakusa tiloni logo pai ya. Ka oni bäki ngä bängiloni tɨpa gu fula oni kape he â ya. 12 Bämbikä, ti kina gu legbo le, Ziazia Toló ayugä gu fula fu loni oni kape he.»

13 Kʉmba sã dagba limbasa abolo kinyã fu Yesu: «Bäyugu, mʉ nyã fu wilibämi kʉ kpalaka hũ kumbä balani dagba le na ko.» 14 Yesu kikalaga ha fu ko kinyã: «Kʉmba, da namäĩ le ni gǒni basäpu ngbanga watadu tɨpa kakpalaka gǒni ahẽ?» 15 Fuä hä kʉ kinyã belewe fu yo: «Oni banda tiloni gbẽ ti dʉ na bakele nyämu kumukä. Bämbikä i alengbesa nga ga bolo ʉnga na ägu ahẽ dʉ beni te, ka ni zavula dʉ ni ɨla kumukä vulu.»

16 Kʉ kipe gii fula yò sã tie fu yo ninyã: «Kʉmba sã ni bolo kumukä adʉ na äti áhẽ aidi logo ho fu ko ni kumu he. 17 Gi kʉmba le kitona belã ku ngäduko yò ninyã: ‹Gini hẽ mi nikamanga? Bämbikä mi na gu tetele bá tɨpa kamaã gimi ahũ äti ku logo ho te.› 18 Kʉ kinyã: ‹I ngele, gu pai mi akamanga ha dʉ le: Mi nakabuluwä gimi agbämu kidudua bäkindigi he. Mi amaã gimi zende vunde dundukä ku logo ho yò na gu kula gimi ahẽ.› 19 Fuä hä, mi anyã ku ngbädule yò ya: ‹Mbisimäle, mo gu dʉ le na ahẽ guyä tɨpa dʉngu agalã. Mʉ ongodi, mʉ li liahẽ, mʉ mbili hẽ kidʉ logo ngbalago.› 20 Ono Mbäli kinyã fu ko: ‹Bolo pupä nga mo. Kina gi yulu le i nakadia mbisimälo. Agi ahẽ dundukä dungulã mo hõ le, da nikadia ha?› 21 Gule nga gu pai nikada tɨpa gu bolo dungulã kumukä tɨpa ni ni sana ni zanga kumukä yò du Mbäli ni.»

22 Yesu kizungudi fula ninyã fu gako abawiliki: «Sidu mi anyã tini fu loni ya: Ka oni fudi nga tiloni ya tɨpa gǒni bata nga oni ali gini hẽ. Ka oni fudi nga tiloni tɨpa kpotoloni nga gini hẽ oni kavo ho â ya. 23 Bämbikä bata nyäki paha gbẽ susi liahẽ, pa kpotose kinyäki gbẽ susi pa lokoo. 24 Óni wisigi ägu azile nga ambiloli: Ami nâlũ ngä hẽ te, ami nâke nga hẽ te, ami na gbämu tɨpa liahẽ â te. Ono Mbäli naliga la. Oni nyäki päloni gbẽ susi pa azile. 25 Da dagba loni lengbe kagbisä gäni äulu bata ku mbatayò tǒni kango gäni fudatise? 26 Ka si du tie nga oni zanga tändu kamanga kandala gi tǒni pai le, oni nafʉda tiloni lii kula apai tɨpa gini hẽ? 27 Oni wisigi mbumbämbumbä nvuä gbuku yò: si nâmanga nga gbakáká sunge te, si nâtu nga lokoo â te. Ono mi nápe he fu loni ya zavula Salomo ǎvo nga tiko logo gako taälimä wa ägu ambumbudä nvuä le te. 28 Ka Mbäli avoda anvuä dʉku gbuku yò wele nga gu dʉ hõ aleme, ono gba i kaba aba ku we yò, tɨpa loni, ka i pe nga ha ape te, kʉ avoda loni tie susi, oni nga abolo umba idapase! 29 Oni ti gǒni, ka oni fudi nga tiloni tɨpa gu hẽ oni kali he ya na tɨpa gu hẽ oni kambila ha â ya. Ka oni bäki ngä bängiloni ya. 30 Agu ahẽ le dundukä, azanga idapase nagbata ha kpekpekpe. Ono tɨpa loni tigǒni, Bäloni ini he ya oni nakpi nyämu he. 31 Oni gbata ga Mbäli Kindä mbatano. I afʉ ägu ahẽ le fu loni ku lii he.

32 Oni, umba limbasa, ka oni gunde nga ya bämbikä si ngba angba ti Bäloni kafʉ gako Kindä fu loni. 33 Oni bägi ägu ahẽ dundukä dʉ oni na ni, kigämu malã hã ti abolo lungä. Oni dungulã gǒni kumukä ku logo gu mängu kasipä ngä ya, kibanda gǒni ahũ kumukä ku ngbängbätulũ yò, yò ka si akpeda nga ni ya, ka ɨladiĩ adĩ ngä hä ni â ya. 34 Bämbikä hõ dʉ gamʉ hũ kumukä ni, ngbädu lo kina koyò.

35 Oni dʉ legelege kivo gile ngba dumäloni, gǒni tála dʉ ni tigi tigi he kindi. 36 Oni dʉ wa ägu abolosʉnge nasungudä baɨlayo yägä nándʉ sa pumbä logatise tɨpa ula ngbädimä fu ko nibasã ti gu legbo kʉ kayägä kingoka ngbädimä. 37 Ngbalago fu ägu abolosʉnge baɨla kagbiã yo i ningele kindi hõ kʉ kada ni. Mi nápe he fu loni ni lengo ya: kʉ avo lokoo sunge kivo gile ngbä dumäko, kʉ asungusä yo bá ligo yò kifʉ liahẽ fu yo. 38 Ka kʉ zavula da bebele yʉlʉ watadʉ ti saa biata pangba na ngbäwiso, ngbalago fu ägu abolosʉnge kʉ kagbiã yo i ningele kindi.

39 Oni ini he â ni bedi he ya: ka baɨla kpolo aini gu legbo ɨladiĩ kayee tini, ka kʉ ambu nga ɨla diĩ ni limi ku dimä kpʉko yò te. 40 Oni â tigǒni, oni dʉ adʉ legelege bämbikä Wili bolo ayee ti gu legbo oni kainä ngä hä ya.»

41 Wele, Petelo kisana ko kinyã: «Baɨla, mʉ nagʉmba gi gii fula yò le tɨpa kina lani watadʉ tɨpa abolo dundukä?»

42 Baɨla kikalaga ha fu ko kinyã: «Gini wene kapita ni ɨla tatamana baɨla kamaã ni lii gako abolo sunge tɨpa kǎfʉ gäyo liahẽ fu yo ti wene legbo? 43 Ngbalago fu gu bolosʉnge le ka baɨlani yägä kigbiã ni ni nimängi gäni sʉnge wo! 44 Mi nagʉmba ha fu loni ni lengo, baɨla gu bolosʉnge le amaã ni ni gbiã lii gako ahẽ dundukä. 45 Ono ka gu bolosʉnge le nyã ku ngbäduni yò: ‹Baɨlale agʉmba nga yägä te›. Ni kitona kata gu kula abolosʉnge nga akumba na adee, kitali liahẽ, nimbili buda, nikpi he, 46 baɨla gu bolosʉnge le ayägä ti gu ulu ni nikabelã nga ha ya, na ti gu legbo ni nikäinä ngä hä â ya. Baɨlani ayepa ni futufutu, kʉ amanga ni ku hõ i namanga azanga idapase kuoni. 47 Gu bolosʉnge ini gu pai ainä baɨlani aɨda na ni, ono ka ni ambakada nga pai sã nya, ka ni amanga nga pai wa baɨlani aɨda na ni ya, i ata ni ni badʉngu he gbẽ. 48 Ono gu bolosʉnge nǎinä ngä gu pai baɨlani ǎida na ni ya, ka ni mängi gu pai lẽ na mbusa, i atá ni ni bete he gbua. Gu bolo i áfʉ hẽ fu ni ni bakele he, i asana ni â gbẽ tɨpa ha. Gu ni i ázogó pa sʉnge ku beni ni bakele he gbẽ, i ahõ pai beni â ni bakele he gbẽ».

49 Yesu kinyã belewe fu yo: «Yée mi kaba we ku lii kpoto sende, mi naida nga si kĩ akĩ ni ipä! 50 Ono batisimo hõ sã si alengba mi dɨ he, si ni läläĩ hẽ ti ngbädule da ku hõ si kamanga ni. 51 Oni nabelã hã tigǒni ya mi ayee kamaa zeleda ku lii kpoto sende? Wasã te, mi nápe he fu loni ni lengo, mi ayee kamaa kpalakalo. 52 Bämbikä tona awele kandʉ ku mbatayò, abolo bisuẽ logo ngbatʉnga sã nikakpalaka dagba tiyo ägu yo biata kuti ägu yo uwe, ägu yo uwe kuti ägu yo biata. 53 Kpalakalo adʉ dagba bagudee na wilini ni kumbagudee, dagba kumbagudee na bäni; dagba nàgudee na wilini ni degudee, dagba degudee na näni; dagba nagbiä na dia wilini, dagba diagudee na nàkumbäni.»

54 Yesu kinyã belewe fu limbasa abolo: «Hõ oni nibi lungbutulungbutu maĩ ni si niyee Dioyò, nibasã oni ninyã: ‹Bamaĩ nikana›, si kinimängi kina wo. 55 Zavula hõ oni nibi wige ni si nalʉ Padiyò kǎya, oni ninyã: ‹Lago nikafaa ni kele he.› Si kinimängi kina wo. 56 Oni, aɨla biliki! Oni nalʉga tiloni aluga wenengaĩ na ägu akpiapai namanga lii kpoto sende na ali yò. Agu alegbo du awele, tɨpa gini hẽ oni aluga nga tiloni tini na ni ya?

57 Tɨpa gini hẽ oni aluga nga tiloni aluga tini na gu lulu pai si alengba oni mängi he ya? 58 Ka mʉ ǎndʉ ku ngbanga yò na sogolo, mʉ gbata kagiã tilo na ni gene mbata fu da oni ngbanga yò. Ka si adʉ nga wo ya, ni agbe lo ku balabängili abäsäpungbanga. Abäsäpungbanga aba lo ku be äziabolo, i kiba lo ku kamba yò. 59 Mi nápe he folo ni lengo, mʉ akʉla nga yo zanga tumä gu falanga i kageda lu folo na bälu te.»