1 Ulu sã, Yesu ǎkpala fu Mbäli logo lago sã. Hõ kʉ anyäsi he ni, gako bawiliki sã kisana ko kinyã: «Baɨla, mʉ yugu ngä fu lani waĩ lengbe ani kakpala fu Mbäli wa Yoane ayugu he fu gako abawiliki.» 2 Yesu kinyã fu yo: «Hõ oni akpala ni fu Mbäli, oni nyã:

Balani,

Limälo dʉ ni ziazia ha,

Gamʉ Kindä yée!

3 Mʉ fʉ gǎni liahẽ fu lani nga ga ulu ni basã sã.

4 Mʉ vu lani ti gǎni aingapai

â wa ani navu ägu abolo dundukä namanga lani na gbegbelẽ apai.

Ka mʉ mbʉ nga lani ani ti ku logo asada ya.»

5 Yesu kinyã belewe fu yo: «Ka bolo sã dagba loni dʉ na bakʉleani, ni kindʉ kazingisa gu bakʉleani le bebele yulu tɨpa kanyã fu ni: ‹Bakʉleami! Mʉ fʉ nga mapa biata fele ni banza, 6 bämbikä gu kʉla bakʉleami yée fuä le ngba gäni ndʉge, ono hẽ bele te tɨpa kafʉ he fu ni.› 7 Ka gu bolo dʉ dimo yò le kalaga pai kinyã: ‹Ka mʉ fʉdi nga le ya! Ngbädimä ni kisi kisi he, mi gbiã kuti äwile ani ima pikä, ka mi guali nga kafʉ he folo te.› 8 Mi nápe he fu loni ya: Ka gu bakʉle dʉ dimä yò avula nga aguali kafʉ mapa ti limä bakʉle ya, ono mbikä ka kuti hõ pai nga ga gu ni dʉ zägi yò, ni atingidi tʉmba tini kafʉ agu ahẽ dundukä guni dʉ zägi yò akpi nyämu he.

9 Sidu mi anyã tini fu loni: Oni hõ pai, wele i afʉ he fu loni. Oni gbata hẽ, oni agbiã hã. Oni ngoka ngbädimä, i azaka ha fu loni. 10 Bämbikä gu bolo nahõ pai, ni agbiã hã. Gu ni nagbata hẽ, ni agbiã hã. I aʉla ngbädimä aʉla fu gu bolo nangoka ha. 11 Oni ni abaägudee. Gini bagudee dagba loni ka wilini hõ tiä beni, ni kifʉ woo apupe fu ni? 12 Watadʉ ka wilini hõ pala kondo, ni kifʉ gbalakʉngulu fu ni? 13 Ka si ngɨa oni nga kele abolo oni ini fʉ kina wene ahẽ fu äwiloni, ni lengo Bäloni dʉ ngbängbätulũ yò susi nafʉ Ziazia Toló fu ägu abolo nahõ Ziazia Toló beko!»

14 Ulu sã, Yesu abätäsi kʉmba sã kidändi gu gilisä kusa ti ko nǎka na fʉla ngbako. Hõ gu gilisä le akʉlʉ ni, gu kʉmba le kitona fʉla. Si kiiliwä ailiwä sã ti limbasa abolo. 15 Ono gu kula abolo kininyã: «Mbikä tändu nga ga Belezebulu nga gbiã adaimuna du kʉ adanda adaimuna.» 16 Gu akʉla yo kinigbata kalẽ ko logo fʉla ninyã: «Mʉ mängi ngä kpiapai fu lani nga gu nayee ngbängbätulũ yò.»

17 Ono wa Yesu aini gäyo belã, kʉ kinyã fu yo: «Gu ngbiĩ dundukä ambe he aso vʉla dagba tiyo, si nandʉ kanyasa. Abämbu nabuluwä yò dundukä. 18 Oni nanyã ya mi nadanda agilisä na gu tändu nga ga Belezebulu. Ka Satana ǎsovula kuti ko nitiko, gako Kindä alʉ tie waĩ ku mbata yò? 19 Ka mi adanda agilisä na ga Belezebulu tändu, gǒni abawiliki nadanda yo tigäyo na ga da tändu? Sidu gǒni abawiliki nitiyo asala ngbanga loni! 20 Ono ka singɨa mi nadanda agilisä kango ga Mbäli tändu, si nayugä ha ya ga Mbäli Kindä ima yée ku dagba loni.

21 Ti gu legbo kʉmba ʉme dʉ na gäni amalã vʉla abanda kpʉni, ka bolo wo nga ti gäni ahẽ te. 22 Ono ka gu kʉla ni sã sʉsi ni na ʉme yée kidi beni, ni agbʉ amalã vʉla dundukä nangɨa ʉme gu bambata ni, kilogo ga gu bambata ni le ahẽ dundukä, kigämu he.»

23 «Gu bolo adʉ nga wasã na mi ya, ni ni vʉlale. Gu bolo aundä ngä le tɨpa kadʉngulã gimi akandolo wasã na mi ya, ni nagbataka la.»

24 «Hõ gilisä akʉla ni logo bolo yò kindʉ kasanga kpatakpali yò nigbata ba ongoda, wa ni agbiã nga ha ya, wele ni kinyã: ‹Mi nikakalaga tile ku logo gu gǐ bämbu mi nikʉlu ni.› 25 Hõ gilisä akalaga tini ni, ni nagbiã gu bolo le wa gu bämbu du ni wege wege he, ni mbäkädi mbäkädi he â. 26 Wele, ni kindʉ kaloga gu kʉla kele agilisä belewe bisuẽ bäti uwe (7) sʉsi ni asʉsa, i kiyägä na ni wasã ku logo gu bolo le kizi ba yò. Wele, gäni bata kida ni kele he sʉsi gu nadʉ mbata.»

27 Hõ Yesu ǎgʉmba agu apai le ni, dee sã dagba limbasa abolo kita ngbäli nyänyäki kinyã fu ko: «Ngbalago fu gu dee navʉngu lo, kihãgi lo!» 28 Ono Yesu kikalaga ha kinyã: «Ngbalago sʉsi gule fu ägu abolo nagiã Sangba Mbäli, kinihilisi he!»

29 Hõ limbasa abolo ǎdʉngulã tiyo ni gbẽ ku pati Yesu, kʉ kitona nyã: «Ägu abolo dʉ ti gi alegbo le ni gbegbelẽ abolo, i nahõ kina iliwä iliwä kpia payi. Ono iliwä iliwä pai sã i käbi he nga kina gu namängi gu näbi nangɨa Yona. 30 Bämbikä wa Yona adʉ ni kpia pai fu ambe Ninive, kina wo â Wili bolo kadʉ ni kpiapai fu ägu abolo dʉ aleme. 31 Ti ulu sapa ngbanga, gu dee nadʉ ni bäkindä lii gu ngbiĩ nadʉ ku Padiyò alʉ kuali kasapa ngbanga agu abolo dʉ aleme. Bämbikä li aguali logo gu ngbiĩ dʉ tutulũ kayee kagiã afʉla tatamana nga ga Salomo✝. Oni ini he ya bolo kina elẽ kĩ pa ni sʉsi ga Solomono. 32 Ti ulu sapa ngbanga, ambe Ninive alʉ kuali kakata ngbanga agu abolo dʉ aleme bämbikä i agiĩ ga Yona tʉngusa pai✝, kisa gäyo bata. Ono tie, bolo kina elẽ kiĩ pa ni sʉsi ga Yona.»

33 Yesu kinyã belewe: «Ka bolo tigi nga tálá tɨpa kahõka ahõka te watadu kamaã hã ku tii akolo yò te, ono tɨpa kamã hã lii ba maã hã kuali. Wele abolo kitalimä ku dimä yò kiningele tima ha. 34 Bängilo ni tálá fu kpotolo. Ka bängilo dʉ wenengaĩ, kpotolo dundukä adʉ â logo timalago; ono ka bängilo adʉ nga wenengaĩ ya, kpotolo adʉ â logo bitimä. 35 Si du, mʉ banda tilo tɨpa ka gu timalago dʉ logo lo yò dʉ nga ni bitimä ya. 36 Ka kpotolo na baha dʉ logo timalago zanga dʉ gu kʉla bala paha logo bitimä, si adʉ dundukä logo timalago wa tálá afʉ timalago pati lo kilikili.»

37 Hõ Yesu ǎpe agi apai le ni, Falusi sã kiyämbu ko kʉ yee kali liahẽ kpʉko yò. Yesu kilimi ku dimä kpʉko yò kisungu kali. 38 Kina ngba gu Falusi le kizele käbi he nga Yesu ǎzʉnda nga beko mbata fu li liahẽ te*. 39 Ono Baɨla kinyã fu ko: «Oni nga Afalusi, oni nâkõ kpoto kopo na kpoto saani ni wene he! Ono tie ngbäduloni yò hĩ ahĩ na diĩ wasã na nyämu gbegbelẽ apai! 40 Oni, aɨla bäyu! Mbäli namängi kpoto ho zägi, anga kina ko namängi vulu he yò â te? 41 Ono, oni fʉ agu apai dʉ ngbäduloni yò ni gamahẽ fu abolo lungä, wele gǒni apai dundukä ada ni giligili he.

42 Lungä fu loni Afalusi! Oni nâfʉ sã dagba bawe lii gǒni ahũ äti dundukä na lii gǒni dendekele akpe päsiä dundukä. Ono, oni nabasa ga Mbäli lʉlu apai na gako nyämuse. Gele tie nga gu meme pai lengbe oni mängi he, zanga basa kula apai.

43 Lungä fu loni Afalusi! Oni nakpi nyämu sungä ku mbatayò lii iliili abásungä abämbutɨlia yò; kiniidi abolo nifʉ sene fu loni na ilisä badʉngulã tise yò. 44 Lungä fu loni! Oni wa kɨna agu amulä ka i ainä ngä bala ha ya, i andʉ lii he zanga inä pa ha*.»

45 Bäyugu andikä sã kitʉka ngbako kinyã fu Yesu: «Bäyugu, hõ mʉ agʉmba apai ni wa gele, mʉ nasenga agi lani le â.» 46 Yesu kikalaga ha kinyã: «Lungä fu loni â nga abäyugu andikä! Oni namaã kele läläĩ atindilo ku li abolo. Ono oni nitiloni, oni ataã nga kandala wilinzagaloni tɨpa katʉmba ha te. 47 Lungä fu loni bämbikä oni name amulä tɨpa ägu anäbi nga agu yo kina atɨtaloni aimi yo. 48 Wele oni ni adezilee, na kiniidi ägu apai atɨtaloni amängi he bämbikä yo, i aimi anäbi, oni tigǒni oni name amuläyo. 49 Sidu, Mbäli logo gako tatamana yò nanyã: ‹Mi akeda anäbi gbiã kuti amokedi fu yo. I aimä ägu yo dagba yo, kinimbusi ägu akʉla yo. 50 Wele, Mbäli asana agu abolo dʉ aleme tɨpa kʉle agu anäbi dundukä i aimi yo enga ti tona tona zäginò, 51 tona ti kʉle Abele da kuti ga Zakalia i aimi ko dagba ba zo mutumä na Bakele Bämbu Mbäli.› Mi nápe he fu loni ni lengo ya i asana ägu abolo asana dʉ awele tɨpa gu kʉle i aʉka ha✝.

52 Lungä fu loni nga abäyugu andikä bämbikä oni náká na ngbädimä inä pa Mbäli be abolo, oni ni tiloni aida nga kalimä koyò â te; oni kinizã ägu abolo naida tigäyo kalimä.»

53 Hõ Yesu akʉlʉ ni logo gu bämbu le, ngbädu abäyugu andikä wasã na ga Afalusi kiimi aima gbẽ kuti ko, i kitona sasana ko ti dʉngu apai, 54 kiniäsädi kalẽ ko logo fula yò tɨpa kaziä ko ka kupe ila ila pai sã.