1 Ti kina gu legbo le, kula abolo kiyee kape pa ägu abolo Galilaya fu Yesu Pilatu aimi yo kʉleyo kikodi tihe na gu mutumä i ǎzo ho fu Mbäli. 2 Yesu kikalaga ha fu yo kinyã: «Oni nabelã hã ya i aimi agi abolo Galilaya le wele bämbikä i adʉ ni abolo ingapai susi gu kula abolo Galilaya dundukä? 3 Wasã te, ono mi nagʉmba ha fu loni ya ka oni asa nga ngbäduloni ti gǒni ingapai ya, oni akpikä â ndundukä kina wo. 4 Watadʉ ägu abolo bawe na bisuẽ bäti biata (18) bagbanga bämbu ati ku li yo Siloe yò kiimi yo, oni nabelã hã ya i nangia kele abolo ingapai susi gu kula abolo dundukä nǎbata Yelusalema yò? 5 Wasã te, ono mi nagʉmba ha fu loni ya ka oni asa nga ngbäduloni ti gǒni ingapai ya, oni akpikä â ndundukä kina wo.»

6 Yesu kigʉmba gi gii fula yò le belewe fu yo kinyã: «Kʉmba sã alũ ngwa figi logo gako äti vino. Kʉ kiyee kagbata zũzũ he ali he yò, ono ka kʉ äbi ngä hä ya. 7 Kʉ kinyã tie fu gako bolosʉnge: ‹Mʉ ngele, vulu agalã biata mi ima yée kagbata zũzũ figi ali gi ngwa ha yò le, ono mi agbiã nga ha te. Mʉ ma hã ku sende. Tɨpa gini hẽ si agbe nzeme sende tini gbua?› 8 Ono bolosʉnge kikalaga ha fu ko kinyã: ‹Gbiã, mʉ mbʉ nga ha ano tɨpa gi galã le belewe. Mi nikage lago pati he kilikili, kimäĩ sende nduka kuti ligä hä tɨpa kaliga ha. 9 Mʉ ainä wäli, si azũ zũzũ he ku mbata yò, ka si adʉ nga wo ya, mʉ kimã hã tie ku sende.›»

10 Lago sabatu sã, Yesu ǎyugä pai abämbutɨlia yò. 11 Dee sã adʉ yò gbegbelẽ tolo agbälãsi li na ima kude, li ǎlengba nga kataã tili ngbaalã*13:11 ngbaalã nzũnzu te. Li adʉ logo gu pai le ku vulu agalã bawe na bisuẽ bäti biata (18). 12 Hõ Yesu äbi li ni, kʉ kiyämbu li kinyã fu li: «Dee, mʉ ima bata be gǎ gbalã.» 13 Kʉ kimäi beko li li, nibasã li kitäĩ logo li yò ngbaalã kitona taasa limä Mbäli. 14 Ono, ngbädu baɨla abämbutɨlia kiimi bämbikä Yesu ahʉsi gu dee le lago sabatu. Baɨla abämbutɨlia kinyã fu limbasa abolo: «Aulu bisuẽ bäti sã (6) vulu poso dʉ tɨpa manga sʉnge. Óni niyee ti ägu aulu le i husi loni be gǒni akaza, ono ti ulu sabatu te.» 15 Yesu kikalaga ha fu ko kinyã: «Oni aɨla biliki! Ti ulu sabatu, oni nazaka nga gǒni ba bagala azaka watadu gǒni ane ba ligo lu yò tɨpa ndʉ na hũ kafʉ mbilimbili ime fu lu te? 16 Ono gi dee le nga ngbatʉnga Abalahama, Satana avo li na amaniyolo ku logo kaza ku vulu agalã bawe na bisuẽ bäti biata (18), si nǎlengba nga kabatasa li lago sabatu te?» 17 Gi fula Yesu le kifʉ zeẽ fu avʉlako dundukä. Ono tie limbasa abolo na ba ha kidʉ na bakele ngbalago tɨpa gu iliwä iliwä apai Yesu ǎmanga ha.

18 Fuä hä Yesu kinyã belewe: «Ga Mbäli kindä wili ti he na gini hẽ? Mi alengbesa ha kuti gini hẽ? 19 Si nawila tʉnga gu ngwa nga mutadi*13:19 mutadi Tunga hẽ nga ha nadʉ lukutu he wa tunga mboyo. kʉmba sã adi he kimi he logo gako äti. Si akʉlʉ, kisono, kida ni ngwa, azile ali yò kiyee kidua bämbula ti abehe.»

20 Yesu kinyã belewe: «Mi alengbesa ga Mbäli Kindä kuti gini hẽ? 21 Si nawila gu pai ninâmanga ti gu legbo dee nidi toma tǒni kikodi he na bakele ngungä vunde, kiputa ha tɨpa si fukä dundukä.»

22 Yesu ǎsʉsa tie logo agbata na logo akpolo kiniyugu pai fu abolo, nindʉ ngba gako ndʉge ku Yelusalema yò. 23 Bolo sã kisana ko kinyã: «Gbiã, nyã mo Mbäli abatasa kina bete abolo gbua?» Yesu kikalaga ha fu yo kinyã: 24 «Óni mängi ʉme kalimä ngba umba ngbädimä. Bämbikä, mi nagʉmba ha fu loni ya dʉngu abolo aasada kalimä, ono i alengba nga kalimä te.

25 Hõ baɨla bämbu kalu ni ku ali kikisi ngbädimä, ägu loni nikanye zägi yò kitona ngoka ngbädimä ninyã: ‹Baɨla, mʉ ulu ngbädimä fu lani!› Kʉ akalaga ha fu loni kinyã: ‹Mi ainä ngä hõ oni ayee ni te.› 26 Wele, oni atona kanyã: ‹Ani ali liahẽ na kimbili hẽ wa sã na mo, mʉ ǎyugä pai ngba agene logo gǎni agbata.› 27 Kʉ akalaga ha fu loni ninyã: ‹Mi ainä ngä hõ oni ayee ni te. Óni guali pati le kusayò, oni dundukä ninamanga gbegbelẽ apai.› 28 Oni atona kpala kinili ngba lindiloni hõ oni käbi Abalahama ni, Isaka, Yakobo wasã na anäbi dundukä logo ga Mbäli Kindä, i naɨma ba loni ku zägi yò. 29 Abolo ayee guali Uloyò na Dioyò, guali Ngbĩyò na Padiyò tɨpa kali pumbä logo ga Mbäli Kindä. 30 Wele, ägu kula abolo dʉ awele ku sayò adá ku mbatayò, ägu yo dʉ ku mbatayò adá ku sayò.»

31 Ti kina gu legbo le, gu kula Afalusi kiyee koyò du Yesu ni kinyã fu ko: «Mʉ guali elẽ kindʉ ku logo kula lago, bämbikä bäkindä nga Elode naida kaimä lo.» 32 Yesu kikalaga ha fu yo kinyã: «Óni ndʉ kanyã fu gu bolo zilee le ya mi nadanda agilisä kinihusi abolo kaza aleme na gba, ti biata ulu mi anyasa gimi sʉnge. 33 Ono si nalengba mi zʉngʉdi gǐ ndʉge ku mbatayò aleme, gba na kulagba da ku Yelusalema yò. Bämbikä si alengba nga i imi näbi bäni te ono kina Yelusalema yò.»

34 Fuä hä Yesu kinyã: «Yelusalema! Yelusalema! Mo ninaimä anäbi, kinizumudi ägu abolo Mbäli akedi yo fuä lo na mbɨa! Bala waĩ mi aidi kadungulã äwilo ku pati le wa nagbutu nadungulã awilu ku tii pupolu. Ono mʉ ǎida nga ha te! 35 Wele tie, i nikambu gǒni gbata fu loni. Mi nápe he fu loni ya, tona aleme kandʉ oni äbi ngä le belewe te da ku hõ oni kanyã ni: ‹Ilisä dʉ fu gu ko nayee ti limä Baɨla.✝13:35 Abia Tambwahẽ 118:26.›»