Lucas 19

Pa limä Yesu logo ilisä ku Yelusalema yo

28 Fuä pe Yesu gi pai le, kʉ kingbe mbatayò fu gako abawiliki kandʉ ku Yelusalema yò. 29 Hõ kʉ ǎmbeda ni ku logo ägu akpolo nangia Betefaza wasã na Betania, mbembedi na ägu agangala i ayamba ha gangala Aolive*19:29 Olive adʉ ni gu ngwa Ayuda anali zũzũ he ali, kinipilĩ nzeme he â tɨpa tiga tala na ni., kʉ kikedi abawiliki uwe i pele mbatayò. 30 Kʉ kinyã fu yo: «Óni ndʉ ku logo gu kpolo dʉ mbatayò le. Hõ oni kada ni yò, oni äbi palanga ane vo yo lu avo, bóló ata sungä ngä li lu mbata ya. Óni zäki lu kiyee na ũ konò. 31 Ka bolo sana loni ninyã: ‹Tɨpa gini hẽ oni azaka lu tini?› Oni akalaga ha ya: ‹Baɨla nakpi nyämu lu.›»

32 Agu abawiliki uwe le kindʉ, i kigbiã apai â wa gu Yesu agʉmba ha fu yo. 33 Hõ i ǎzaka gu palanga ane le ni, aɨlalu kisana yo kinyã: «Tɨpa gini hẽ oni azaka gu palanga ane le tini?» 34 I kikalaga ha kinyã: «Baɨla du nakpi nyämu lu.» 35 I kindʉ na ũ koyò dʉ Yesu ni. I kima gäyo alokoo aulu lu, kisungusi Yesu aulu lu. 36 Wa Yesu ǎndʉ ku mbatayò, abolo kinimã gäyo alokoo sende bängili gene tɨpa kailisä ko. 37 Kʉ aima mbeda kuti gu gene nǎzolã ti ngbädu gangala Aolive. Limbasa abawiliki dundukä adʉ́ na ngbalago. I kitona ta ngbäyo nyänyäkĩ niilisi limä Mbäli tɨpa ägu ailiwä iliwä apai dundukä i äbi he. 38 I kininyã:

«Mákʉ dʉ fu gu bäkindä nayee ti limä Baɨla!

Zeleda dʉ ngbängbätulũ yò

taälimä kidʉ ku ngbängbätulũ ali yò gbẽ!»✝19:38 Abia Tambwahẽ 118:26.

39 Gu kula Afalusi nadʉ dagba limbasa abolo kinyã fu Yesu: «Gbiã, mʉ zã gamʉ abawiliki i ongo!» 40 Yesu kikalaga ha fu yo kinyã: «Mi nápe he fu loni ya ka i kisi ngbäyo ti gäyo, ambia ata ngbaha!»