Lucas 24

Pa zɨnga Yesu be kpio

1 Gu ulu nayee ti fuä sabatu, adee kindʉ ku lii mulä yò kina bolo ngba wiso na ägu amalasi i ambäkädi he. 2 I kigbiã mbɨa ni wiligiwiligi he kusa yò ngba mulä. 3 I kiyǎlimi ku mulä yò, ka i äbi ngä kángbá Yesu Baɨla ya. 4 Wa belãyo anyäsi be gi nga ha le, í ngele, akumba uwe gäyo alokoo adʉ kpäu kikʉlu fu yo. 5 Wa gunde äzi ägi adee le, i kidʉa bängiliyo ku sende. Ono ägu akumba uwe le kinyã fu yo: «Tɨpa gine hẽ oni nagbata gu ko tini dʉ ti ʉnga dagba kpikpi abolo? 6 Kʉ elẽ te, ono kʉ ima zinga be kpio. Oni tingidi gu pai kʉ ape he fu loni ti gu legbo kʉ adʉ́ nga kindi Galilaya yò. 7 Kʉ ǎnyã: ‹Si naida i zogo Wili bolo ku be azanga idapase, si naida abolo banga ko ku lii wägiwägingwa ngwa, kʉ́ zingi be kpio ti biata (3) ulu.›»

8 Agi adee le kitingidi afula Yesu tie. 9 I kiyägä mulä yò kitangalã ägi apai le dundukä fu amokedi bawe na sã (11) na fu gu kula abawiliki dundukä. 10 Agu adee le nangɨa Malia mbe Magadala, Yoana gbiã kuti Malia nangɨa navungu Yakobo. Gu kula adee nadʉ́ wasã na yo kipe gi pangbanga le â fu amokedi. 11 Ono bängili amokedi, si kidʉ ni fula pupä. I ǎida nga fula ägi adee le te. 12 Petelo kitumba tiko kiolo ku mulä yò. Kʉ kiyǎnugädi, kʉ kibi kina ägu alokoo i wädi Yesu na ni. Kʉ kisa tiko kagá ti gako ngbako nazele be gu pai namängi.

Pa kula Yesu ngba gene Emausi

13 I ngele, ti kina gu ulu le, abawiliki uwe (2) ǎndʉ ku logo kpolo sã limä hä angɨa Emausi. Ba tulä Emausi ti Yelusalema adʉ wa kilometele bawe na sã (11). 14 I ǎfʉla dagba yo lii ägu apai dundukä násʉsi. 15 Wa i ǎfʉla kinisäkinä hä dagba yo, Yesu ni tiko kiyee gbiã yo kinindʉ gene wasã na yo. 16 I ǎbi ko, ono bängiliyo ǎlengba nga kainä ko te. 17 Kʉ kinyã fu yo: «Gini apai du oni asäkinä hä nindʉ ngba gene?» I kilʉndu na lungä ku ngbäduyo yò. 18 Gu ko sã dagba ägi abawiliki uwe le limäko angɨa Kiliopa kikalaga ha fu Yesu kinyã: «Kina lo ni sana lo nalaka vulu Yelusalema kizanga inä gu pai susi logo ägi aulu le?» 19 Yesu kisana yo ninyã: «Nga gini gu?» I kikalaga ha kinyã fu ko: «Gu pai näbi pa Yesu bolo Nazaleta nangɨa gu näbi nadʉ na tändu logo manga apai na logo fula bala bängili Mbäli na bala bängili abolo dundukä. 20 Gǎni agbiã abazomutumä na gǎni agbiã azogo ko ku be Aloma tɨpa i käti ngbangako sa kpio na tɨpa i imi ko. I abángá ko ku lii wägiwägingwa ngwa. 21 Ani ti gǎni, ani ǎkidä ya kʉ alengbé kabatasa Isalaele. Ono, ku lii he dundukä, biata (3) ulu dʉ le wa ägu apai le amängi. 22 Pai sã tigu nga gu kula adee dagba ägu yo nidʉ wasã na ani atú lilani yò. I andʉ ngba wiso ku mulä yò 23 zanga bi kángbáko. I ayee kanyã amalaika agʉmbá ha fu yo ya kʉ gu dʉ ti ʉnga. 24 Kula akualani andʉ́ ku mulä yò kigbiã apai wa kina gu adee ape he. Ono bolo ko, i ǎbi ngä ko te.» 25 Yesu kinyã tie fu yo: «Azanga bilĩ, ngbäduloni dondolo na ida ägu apai dundukä anäbi agʉmba ha! 26 Nyã mo si ǎlengba nga Masiya li gu lungä le mbata fu limä ko ku logo gako taälimä te?» 27 Wele, Yesu kizäki sangba ägu apai näbi ko logo Ziazia Kẽkẽ Apai dundukä enga ti ga Mose buku da kuti ägu abuku nga ga anäbi dundukä.

28 Hõ i ambedi ni na gu kpolo i ǎndʉ ku logo ho, kʉ kimängi tiko wa kʉ nandʉ andʉ tutulũ susi. 29 Ono i kidika ko nyänyäki ninyã: «Mʉ nye na áni bämbikä nyämu ima mbeda, ulu ima ti â.» Kʉ kilimĩ tie tɨpa dʉ na yo. 30 Fuä sungä ko na yo bá li liahẽ yò, kʉ kidi mapa, kihõ ga Mbäli makʉ ku lii he, kikuä logo ho, kifʉ he fu yo. 31 Wele bängiliyo kizäki, i kiini ko. Ono kʉ kilindä bängiliyo. 32 I kinyã dagba yo: «Nyã mo ngbädulani yò nǎgo nga nikĩ wa we te ti gu legbo kʉ nǎfʉla na ani gene kinizäki sangba Ziazia Kẽkẽ Apai fu lani?»

33 I kitumba tiyo nibasã kisa tiyo ku Yelusalema yò. I kigbiã amokedi bawe na sã (11) i nadungulã tiyo na ägu abolo nadʉ wasã na yo. 34 I dundukä kinyã fu ägu abawiliki uwe le: «Baɨla ima zinga be kpio ni lengo. Kʉ ima yugä tiko fu Simo Petelo.» 35 Agi abawiliki uwe le ti gäyo kitangalã gu pai násʉsi na yo bängili gene na waĩ i aini Yesu ti gu legbo kʉ ǎkuä mapa.

Pa kula Yesu fu amokedi bawe na sã

36 Agu abawiliki uwe le kitadʉ kina kuti gʉmba agi apai le, nibasã Yesu ni tiko kida dagba yo. Kʉ kinyã fu yo: «Zeleda dʉ na oni wasã!» 37 Bakele gunde kizi yo, ngbädu yo kinikuä akuä, i kinibelẽ tigä yo ya ibi toló. 38 Ono Yesu kinyã fu yo: «Tɨpa gini hẽ oni agʉnde tini? Tɨpa gini hẽ dʉ oni tini na dʉngu abelã ku ngbäduloni yò? 39 Oni wisigi akpa bele na akpete ndʉle, kina le du! Oni zädi ngä kpotole ni beloni kibi he, ka toló dʉ nga na kpotose wasã na meme te wa gu oni äbi le na ni.» 40 Kʉ kitagʉmba ha fu yo kiniyugu akpabeko yò na akpete ndʉko fu yo. 41 I adʉ na bakele ngbalago, ono ka i alengba nga kaɨda ha ya, ngbäyo kinizele azela. Wele, kʉ kisana yo kinyã: «Bete hẽ be loni elẽ ka bolo li he?» 42 I kifʉ mbada zozo tiä fu ko. 43 Kʉ di he, kili he ku bängiliyo. 44 Fuä hä kʉ kinyã fu yo: «Gele nga gu pai mi ǎgʉmba ha fu loni hõ mi adʉ ni wasã na oni: ägu apai dundukä dʉ ni kẽkẽ he lii pale logo ga Mose andikä, logo ga anäbi abuku na logo Abia Tambwahẽ, sí lengbesi tihe alengbesa dundukä.» 45 Wele, kʉ kizäki bilĩ yo tɨpa i lʉgu tiyo na sangba Ziazia Kẽkẽ Apai. 46 Kʉ kinyã fu yò: «Si ni kẽkẽ he ya i ambʉsa Masiya ambʉsa gbẽ, ti fuä alame biata (3), kʉ azinga be kpio. 47 Ziazia Kẽkẽ Apai nanyã â ya: i atʉngusa pa alia ngbäduse wasã na pa vu abolo ti gäyo ingapai fu angbatʉnga dundukä ti limäle, tona Yelusalema yò. 48 Oni nga adezilee agi apai le. 49 Mi tigimi, mi nikakeda gu ko Bʉba akidä pa ko✝24:49 Yoane 14:16-17; Luka 12:12; Amokedi 1:4-5; Yoele 3:1-2.. Ono oni tigǒni, oni sungu kina gbata elẽ da ku hõ oni kahĩ ni na gu tändu Mbäli kakeda ha.»

Pa bita Yesu ku ngbängbätulũ yò

50 Fuä hä, Yesu kikulu kusa vulu gbata wasã na abawiliki kindʉ mbembedi ku Betania yò. Kʉ kitumba beko ku ali yò, kifʉ makʉ fu yo. 51 Hõ kʉ ǎfʉ makʉ ni fu yo, kʉ kikpala tiyo kinibiti ku ngbängbätulũ yò. 52 Yo tigäyo, i kikuku tɨpa kailisä ko. Fuä hä i kikalaga tiyo ku Yelusalema yò na bakele ngbalago ngbäduyo yò. 53 Dedede, i anidʉ bakele bämbu Mbäli yò, kinigäsi tambwahẽ fu Mbäli.