1 Yahwe ɛ sa Natan Dafidi wakʋn. Gɛ gɛtɛ e gyu wakʋn fɔ, ɛ dɔ̀ wɔ alan, <<Beteni bɛnyɔɔ bɛkɩ bɛ sara ditele dɩkɩ daanɩ, ɛkɩ ɛ̀ ba kɔba, gɛ ɛnyɔɔfɛ fɔ è di eyenpu. 2 Kɔba-te fɔ ɛ̀ ba bɛyɛran ma bɛkwɔ kpekpesi. 3 Mɔ eyenpu fɔ bɩrɛ ɛn ma gɩnyankɩ fɩya ma dɩyɛranbi-nanɩ gɛtɛ e siye fɔ, gɛ ɛ nya dii koro, gɛ dɩ dan ma ɔmɩrɩ ɛwɔ ma wo bebi baakʋn. Ɛwɔ ma dɩyɛranbi fɔ n te di wanyandilɛ, gɛ kuruwa-kɩlɩn anɩ gɛ bɛɛ nyʋn butu, gɛ ɛɛ dʋrɔ gɛ walɔ yaanɩ gba. Ɛyɛran fɔ ɛ̀ bɔ e we wɔ anlɛ wobi-nanɩbi. 4 Duwi dɩkɩ kɔba-te fɔ e wura esela, mɔ en len gɛtɛ èè gye wɔkwɔ, abɛɛ wɔyɛran fɔ ɛkɩ e ye wɔ bɛnan kpekpesi fɔ baanɩ ɛ̀ɛ̀ ka ɛ mɛ anyandilɛ tɛ wosela fɔ. Gɛ ɛ ma gye eyenpu fɔ wɔ yɛran-kɩlɩn gɛtɛ ɛ̀ ba fɔ, gɛ ɛ ka ɛ mɛ anyandilɛ ɛ tɛ esela gɛtɛ ɛ ba wakʋn fɔ. 5 Dʋkɔ fɔ Dafidi ɛ ka owurufa gepepe kɔba-te fɔ wo koro, gɛ ɛ dɔ̀ Natan alan, <<Na nya Yahwe gɛtɛ ɛ̀ sa lɛ na tɛ wɔ̀ alɛ, ete gɛtɛ ɛ mɛ gɛlɛ gaade nyayɩ fɔ, ɛ kʋtʋma diku. 6 Wù di gɛtɛ ɛ̀ɛ̀ ka bɛyɛran bɛnaa e le gutoro e sere ɛkɩlɩn fɔ gɩsɩrɩ, yema en we eyenpulɛ fɔ gutunkoro, gɛtɛ ɛ mɛ gɛlɛ gaade lɛ.>> 7 Dʋkɔ fɔ Natan ɛ dɔ̀ Dafidi alan, <<Awɔ n di ete fɔ. Yahwe, Isareli bete boo Wurubwarɛ ɛɛ dɔ̀ alan, <Na sʋrʋ wɔ̀ bʋnɔ alɛ mɛ Isareli bete boogyu, gɛ na tiri wɔ̀ na ye Sawulo walɔ yaanɩ. 8 Na ka aafonte dɩkpaara na tɛ wɔ̀. Gɛ na ka aafonte wɔsɔ ɛbɛ na sa aalɔ yaanɩ. Na ka Isareli ma Yuda bugyu na tɛ wɔ. Gɛ gengyi nyayɩ powu ɩn sɔ wɔ̀ fɔ, nafɔ nan fɩya wɔ̀ kpekpesi. 9 Anʋn yii koro gɛ a kere Wurubwarɛ ade a ya, gɛ a mɛ ade-kpen wɔ bʋnʋn baanɩ anlɛ? A wolo Hiti-te Uriya, gɛ a ka wɔsɔ a to gɩna. Amon bete gɛ a yɛ be wolo wɔ bɩtà baanɩ. 10 Nyawʋ wuu koro, akpa yaanɩ yii diku ɩn nan were aa dɩkpaara ɩ nya, yema an bù mɩ, gɛ a ka Hiti-te Uriya wɔsɔ a to gɩna.> 11 Yahwe ɛɛ dɔ̀ alan, <Nan yɛ ade-kpen yàà ye awɔ gbagba aa dɩkpaara ɩ ba aa koro. Nan to aasɔ ɛbɛ n tɛ eteni-fon, gɛ ɛɛ̀ dʋrɔ ma ɛbɛ ofila-kenken aa bʋnʋn baanɩ. 12 Awɔ a mɛ wʋ dibilin daanɩ, mɔ nmɩ bɩrɛ, nan mɛ wʋ Isareli bete powu bɔɔ bʋnʋn ofila-kenken.> >>

13 Ɛwʋ gɛ Dafidi ɛ dɔ̀ Natan alan, <<Na mɛ ade-kpen Yahwe bʋnʋn.>>

Gɛ Natan ɛ dɔ̀ Dafidi alan, <<Yahwe e tiri aade-kpen e ye aa koro. An nan ni ku. 14 Mɔ, gɛtɛ an ka gebù tɛ Yahwe, gɛ a mɛ gɛlɛ gaade nyayɩ okoro, ebi gɛtɛ e wo ɛ tɛ wɔ̀ fɔ eè ku.>>

15 Gɛtɛ Natan e biri ɛ da wɔ dɩkpaara fɔ. Yahwe ɛ yɛ ebi gɛtɛ Uriya wɔsɔ e wo ɛ tɛ Dafidi fɔ e gyu geyeba.

16 Ɛwʋ gɛ Dafidi ɛ fɔ Wurubwarɛ gɛtɛ ebi fɔ èè wura nkpa. Gɛ Dafidi ɛ ban onyun, gɛ e gyu wo dikwo gɛ ɛ waran ɛ dʋrɔ gɛtʋnkwaa odente fɔ powu. 17 Gɛ wɔ dɩkpaara dɩɩ bɛndɩrɛ be be koturu wɔ ɛ̀ɛ̀ tɔ ye gɛtʋnkwaa, fɔ èè di anyandilɛ, mɔ e terema en di gɩnyankɩ ma ɛbɛ.

18 Duwi-kwarankɩfɛ fɔ ebi fɔ e ku. Gɛ gɩsaa gi ton Dafidi bɛsaranyan fɔ, okoro bɛn talɩ dɔ̀ wɔ alɛ, ebi fɔ e ku. Mɔ bɛ tabʋrʋ booko-booko alan, <<Ɔkʋna gɛtɛ ebi fɔ è si nkpa fɔ, tɩ tabʋrʋ ma Dafidi mɔ ɛn nʋn taakʋn. Lan gɛ taà talɩ tɩ dɔ̀ wɔ alɛ, ebi fɔ e ku? An nyɩnla fɔ, ɛɛ̀ mɛ koro ade-kpen.>>

19 Mɔ gɛtɛ Dafidi e we gɛtɛ wɔ bɛsaranyan fɔ bɛɛ tabʋrʋ booko-booko fɔ, ɛ nyɩnla gɛtɛ wobi fɔ e ku. Gɛ e lila wɔ bɛsaranyan fɔ alan, <<Ebi fɔ e ku?>> Gɛ be yera wɔ alan, <<Ɩɩn, e ku.>>

20 Gɛ Dafidi ɛ tɔ e ye gɛtʋnkwaa, gɛ e kù, gɛ ɛ sʋrʋ bʋnɔ, gɛ e foma wanyan gɛtɛ ɛ̀ sa fɔ, gɛ ɛ san Yahwe dɩsʋma-kwo, gɛ ɛ ma sʋma wɔ. Gɛ nkele ɛ san ɛwɔ gbagba wɔ dɩkpaara. Gɛ ɛ yɛ bɛ tɛ wɔ anyandilɛ, gɛ e di.

21 Ɛwʋ gɛ wɔ bɛsasaranyan fɔ be lila wɔ alan, <<Anʋn gɛ a mɛ lɛ? A ban onyun, gɛ a wula a tɛ ebi fɔ ɔya gɛtɛ ɛ̀ ba nkpa fɔ, mɔ nkele gɛtɛ e ku fɔ, a tɔ, gɛ a di anyandilɛ?>> 22 Gɛ e tiri wuunyun alan, <<Na ban onyun, gɛ na wula. Ɔkʋna gɛtɛ ebi fɔ ɛ̀ sa fɔ, na sa amɩnlɛ alɛ, <Ɛnyan nyɩ̀? Nkɩ fɔ, Yahwe eè wula mɩ gutunkoro, fɔ ɛ̀ɛ̀ yɛ ebi fɔ ɛ̀ɛ̀ sara nkpa.> 23 Mɔ nkele bɩrɛ e ku. Anʋn yii koro gɛ nan nɩ ban onyun? Ǹ talɩ n birima wɔ n ba nkpa anɩ? Duwi dɩkɩ nmɩ nan san wakʋn, mɔ ɛwɔ ɛn nan biri ɛ ba maakʋn.>> 24 Gɛ Dafidi ɛ dɔ̀ ɛ sa wɔsɔ, Batiseba. Wʋʋ gama fɔ ɛ dʋrɔ ma ɛwɔ, gɛ e wo ebi-tenibi, gɛ ɛ sa wɔ diyere alɛ Solomon. Gɛ Yahwe e len wade, 25 Gɛtɛ Yahwe e len wade okoro, ɛ ka ɔtʋn ɛ dama Yahwe wɔtabʋrʋlɛ Natan wo koro, gɛ ɛ sa wɔ diyere alɛ Yedidiya.*

26 Ɔkʋna wʋtɔkɔ fɔ, Yowabi ɛ kpà ma Amon bete, gɛ e to boo digyu-tele-dɩrɛ Raba fɔ. 27 Gɛ Yowabi ɛ sa Dafidi ɔtʋn alan, <<Na kpà ma Raba bete, gɛ na to ditele fɔ dii butu bʋʋ gɛkpàkʋn. 28 Nkele kʋla bɩtà bʋʋ bɛtàlɛ-kurumakyɛɛ fɔ, fɔ yàà sʋ ditele, fɔ sa fɔ yàà to dɩ. Nka gɛlɛ fɔ, nan to ditele-dɩrɛ fɔ, fɔ miin diyere dàà gyaga dii koro.>> 29 Gɛlɛ wuu okoro Dafidi ɛ kʋla bɩtà bʋʋ bɛtàlɛ fɔ powu e tuma, gɛ ɛ san ɛ ma kpà ma Raba bete, gɛ e to ditele fɔ. 30 Dafidi e tiri Raba wogyu dikoto e ye wo duyu dii koro, gɛ ɛ ka dɩ e tin. Dikoto fɔ dɩɩdʋrʋ waà mɛ anlɛ sɩka-sɩya bekilo dikpilin ma fwo bɛnaa (34), gɛ bɛ ka ataa-kpara bɛ sa ma ɛdɩ. Gɛ ɛ e kpila baanyan ma kɔba kpekpesi e ye ditele fɔ daanɩ. 31 Ɛwʋ gɛ ɛ ka bɛnɩ gɛtɛ bɛ̀ sa Raba ditele daanɩ fɔ mɔ ɛ mɛ bɛdɩ, gɛ ɛ nyɩ bɛ, bɛ ka sɔya, ma bɛkpakya, ma bɩlɛlɛ, ma akyɔɔ bɛ mɛ gʋtʋn, gɛ ɛ yɛ bɛ fɔrɩ atɩn be belen birikisi. Gɛlɛ ke gɛ ɛ mɛ Amon atele-kurumakyɛɛ fɔ powu. Gɛ Dafidi ma wɔ bɛnɩ fɔ powu be biri bɛ ba Yerusalem.