1 Bosate ɔtsiri ikerera nɛ loiyi,

ɣɛɛ ikerera sɛɛ sɛ ipia wũ isoɣɔ.

2 Si katoikɔlɛso ɔba ne, kunuarɛ ka losisai;

ɣɛɛ karɔ̃ibɔso sɛ ibagu iwola.

3 Maturi sɛɛ ɔnukuareiɖe sɛ ɔkɔkɔ ma,

ɣɛɛ mila sɛ miwɔra mma nna ɔnukuare.

4 Karana ɖe siefe ku itɔ̃meɣɛyi,

ɣɛɛ sibɔlɔlɔ sɛ siɖi ɔturi i kukpi ame.

5 Ɔturi wɔ nna iɣɛrɛ sibɔlɔlɔ nsɛ sitã ɔ̃ ɔri ɔse siĩ,

ɣɛɛ ɔtilese mɔmɔ aranyanyariã ibara nsɛ atã ɔrɔ̃.

6 Ɣaa sɛ ɔɖi ma nse bɔlɔlɔ alasɔ malɛ,

ɣɛɛ mma nna ɔnukuare kubie nyanyariã nsɛ kumɔɛ̃ ma.

7 Si ɔtilese ɔkpi ne, ɔ̃ ɔriinyɔ ɔɔtuĩ;

nwa pelepele ɔnyɔ ɔri i ɔ̃ ɔle iti sɛ akpese siefe.

8 Bosate sɛ ɔɖi ɔturi bɔlɔlɔa i imɔrɛ̃ ame,

fiɛ isɛ iba i ɔturi nyanyariã iso bowũ.

9 Nwɔ loisɛ ɔnigã Ɣaa sɛ ɔsu ɔ̃ kanya atɔ̃me ɔnina ɔ̃ ɔnyii,

ɣɛɛ ɔturi bɔlɔlɔa sɛ ɔsu inɔkpa ɔbɔrɛ i ne ame.

10 Si ɔturi bɔlɔlɔa ɔna isaruɛ ne, ɔmagɛ̃siare maturi sɛ mana isoɣɔ;

si ɔturi nyanyariã ɔwɔ ne, isoɣɔ kulu masɛ mala.

11 Iki i ɔturi sɛɛ kusɛkusɛ ame i masɛ makɔlɛ ɔmagɛ̃siare kato,

ɣɛɛ iki i ɔturi nyanyariã kanya ame ne, masɛ mawɔra ɔmagɛ̃siare.

12 Ɔturi wɔ loiɣe iwola nsɛ ɔbara ɔ̃ ɔnyii aɣiãra,

ɣɛɛ ɔturi wɔ mba karɔ̃inɔ sɛ ɔpia ɔ̃ ɔnyagɛmi i irɛkpo.

13 Ituriraɣɛse nsɛ ɔɣɛ awɛrɛra,

ɣɛɛ ɔturi wɔ masɛ masiaiti iso sɛ ɔkɔla itɔ̃me.

14 Ngbegɔ kɔdze wolai na ne, kaɖe nsɛ kaba karɔ̃,

ɣɛɛ adzuni matãdze gbodzoo sɛ matã iɖeiso.

15 Ɔturi wɔ nsɛ ɔya i ɔturi mama kuso kama to ɔ̃awe inyɛ gbaã,

ɣɛɛ ɔturi wɔ losɛ̃ kamaiya sɛ ɔna kaɣɔ.

16 Kayiribielea ɔrɔ̃go sɛ ɔna kuwarɛ,

ɣɛɛ ɔtile marɛrɛ̃ sɛ mana karana kere.

17 Kayiribielea ɔturi sɛ ɔbara isɛɛ ɔtã so,

ɣɛɛ ɔtilese sɛ ɔbɔ imɔrɛ̃ i ɔ̃ mɔmɔ iso.

18 Ɔturi nyanyariã sɛ ɔna kuso gɔ losɔsɔla wũ,

ɣɛɛ nwɔ lobara ara bɔlɔlɔa sɛ ɔna kuso gbaã.

19 Gbaã ne, ɔturi wɔ nsɛ ɔbara ara bɔlɔlɔa aasɛ ngbã,

ɣɛɛ ɔturi wɔ nsɛ ɔbie aranyanyariã ibara to ɔ̃akpi.

20 Bosate sɛ ɔtsiri maturi ma mba kasɔla adzuni,

ɣɛɛ ɔsɛ ɔna isoɣɔ i mma siri nna iɣɛrɛ.

21 Fɔ nnɛgbe ɖe sɔ: Maibasɛ̃ kutsueikpadzɛ̃ ɔtilese,

ɣɛɛ maturi bɔlɔlɔa ne, maibakpadzɛ̃ ma kutsue.

22 Ɔrɔ̃go ku kulɛ wɔ nna iwola se lɛ

sikãrɛtɛa kagɔrɔĩ ga mpia i kparako ɔpu iso.

23 Ɔturi bɔlɔlɔa kubie ɖe ira sɛɛ,

ɣɛɛ ɔturi nyanyariã ɔriinyɔ ɖe Ɣaa sikpã.

24 Ɔturi ɔrere sɛ ɔtã ara faa ɣɛɛ ɔsɛ ɔna ara kɔraa ɔbua;

ɔturi mama iisɛ ɔɖi kɔrɔ̃ ɔtã ara ɣɛɛ siwɛrɛba nsɛ siba wũ iso.

25 Ɔturi wɔ nsɛ ɔbara kayiribielea to ɔ̃ana isaruɛ,

ɔturi wɔ nsɛ ɔtã ɔmama ndu ne, ɔme iibakore ɔ̃ mɔmɔ.

26 Ɔturi wɔ nsɛ ɔkɔla geɖebu ɔraɖui fiɛ ɔ̃irɔdɛ̃ ne, masɛ magbarĩ wũ,

ɣɛɛ ɔturi wɔ nsɛ ɔrɔdɛ̃ gɔ inya ne, masɛ mafere wũ kusɛkusɛ.

27 Ɔturi wɔ nsɛ ɔnyɔnyɔ isɛɛ ɔri ne ɔsɛ ɔbo anɔ,

ɣɛɛ nwɔ nsɛ ɔbie ilalaa ne, ilalaa nsɛ iba i wũ iso.

28 Ɔturi wɔ nsɛ ɔsiaiti i ɔ̃ karana iso sɛ ɔrɔ̃,

ɣɛɛ ɔturi bɔlɔlɔa sɛ ɔse lɛ iyata yuɛ awe.

29 Ɔturi wɔ nsɛ ɔɖaa ɔ̃ iyomaturi ne, ɔwiri loaɖe ɔ̃ kaɖekɔ̃,

fiɛ kadzunisɛĩ aaɖe ɔɖabo ɔtã mawolai.

30 Ɔturi bɔlɔlɔa idziribi ɖe kudziri gɔ nsɛ kutã ngbã,

fiɛ ɔturi wɔ nsɛ ɔɖi maturi sikala ne ɔɣe iwola.

31 Si masɛ matã maturi bɔlɔlɔa nnɛ lokote ma i karɔ̃ iso ne,

maibatã ɔturi wɔ loiɣe Ɣaa gu kpibaradze nnɛ lokote maɖodza ɣɛɛ?