Ozafofu ko Oyesu Ikweyi ki Inarigwu
1 Eno oye Oyesu ya tinarigwu ebye, ishini otinarigwu kweyi ni, oye ipu ka awogboso ka da anu mo, <<Adole, faha inarigwu tota byoni Oyohana fa awogboso ni.>>
2 Oka da awa mo, <<Ishini ala ba tinarigwu, ala kamo,
<<Ada, iye wo na yo sere, obula wo nawa. 3 Da aha ozarore ke eno ki ikyeni. 4 Yo ozalabi ka aha gbaha, byoni aha gba awase ni yaha ozalabi ni. Ka bya aha gipu ko omama lo.>>
5 Oyesu ka dawa mo, <<Ana kamo ashe ipu kala gbo oya, kweyi oge ebe nu otutehe ko otu kweyi kamo, <Oya, kpa ami ikyoga eta, 6 oya hin oye bwi iyawu wa sa ebe hin anani, Ami ke gbo ozarore ko danu lo.>
7 <<Ebeni ase ni yipu ko oda ni kamo, <Ka yumo ogidigidi lo. Ami kpa ayi hin ba gbola, ayofunu ka aha gwu wa. Nyya gege ya yiso ya da awo ojije lo.> 8 Nyya kadala, owoni oya gege ya nyiso ya danu ikyoga koni owo oyanu ni lo, oya nyiso wa danu koni ogwi iweyi shonu ni, kweyi wa danu oza ni oya yimu ni.
9 <<Nyya kadala mamani: Doka, aba da ala, tikpo, ala ba pye, gwabo ofunu, aba gwa da ala. 10 Koni kpiri kase ni ba aba danu: ase ni tikpo oya pye, ase ni gwabo ofunu, aba gwofunu danu.
11 <<Ada wonya ipu kala ni, owoni oyinu do oka ke ebinyi kweyi ona danu egwa? 12 Kwe owoni odoka ka ayi, kweyi ona danu ena? 13 Owoni ala ase bibi ba gye ko da ayi kala oza neshi, oya lemoji kpa Ada kala ni yi iso ni ya da ase ni do oka ko omaku ko Owuso ni!>>
Oyesu kpo Obelizebu
(oMatiyu 12.22-30; oMak 3.20-27)