1 Oyesu ya awogboso igwepa ogwu kweyi dawo oshu kono omaku bibi enya shikpiye ka asuse kweyi da awine kose kpere ogege kikpiye.

2 Iye kawi ayikoko ko Oyesu igwepa yoma: kikyikyo wo Osimo ni oyogwu mo Obitrus ni kpo oyinanu Andru; Oyakubu kpo oyinanu Oyohana ayi ko Ozebedi;

3 Ofilibus kpo Obatolomi; Otoma kpo Omatiyu inozegba, Oyakubu oyi ka Alfayu kpo Otadiyu; 4 Osimo Okananaya kpo Oyahuda Iskariyoti, ni yora ni.

5 Oyesu tayikoko nu igwepa oleho kweyi shiyawa oza ni abaya kpo olamuni abaya lo ni. Okamo <<Ala ka gebe kawase ni wo Oyahuda lo kwe ogya kase ko Osamariya. 6 Ala ke gebe kase ki Izrayila ni wo otukpo ko Owuso ni gebi ni. 7 Ishini ala gebe ni, ala tono dawa kamo, <Obula kiso yo pee.> 8 Ala dase ni loshu lo ni ogege kikpiye, ala yawase ni gekwu na nyiso ikwu, ala dawase ni gbose kiyiwa ni ogege kikpiye kweyi, ala na awomaku bibi shikpiye kasuse. Ndala oshu mani yeye la, ni olemani ala tase abo yeye. 9 Ala ka byi ikwiri kozinariya kwe azurupa kwe otagula ikpiye kala lo; 10 ala ka byo oshu, kwe oshiye kwe okpabawu, kwe okwute lo; ikweyi koni aba sino yoko ore koko nu.

11 Ishini ala gogya nyakwu kwe oleke, ala labo kase ni ya zogboga ni shini ala sa ole nu gbishini ala shebeni bita. 12 Ishini ala gipwole, ala kada ase kole ni mo, <Omene ko Owuso nayo kpala.> 13 Owoni ase kole ni zala, omene kala nayo kpawa; owoni azala lo, omene kala na kwikye webe kala. 14 Owoni ashishe zala lo kwe pwono totu kala lo, ala gwo omula kapatikpo kala shebeni ishini ala ba shole ni kwe ogya ni bita. 15 Nyya ka dala okwokwoshi, Owuso ya miyinyinyi ko Osodom kpo Ogomora eno ko kepwo shase kole kwo ogya ni.

16 Ami ya tala oleho gese byo otukpo ipu ki iwapashi ni. Ni olema oni, ala ziyi bye egwa shini alaka gbibya lo byo otitiribi ni. 17 <<Ala gbera kpase bibi; aba byala agoda ko kepwo kweyi aba yala aboshi ipu kekpa. 18 Ikweyi koni ala ba gbosun ni, aba byala ya gebe koteyi agye kpa awose. Omani ke yawo owe ni ala tono kela hin dawa kpa awase ni wa Ase ko Oyahuda lo ni. 19 Ishini ake kwala ga, ala ka gbotu ikweyi koza ni ala baka kwe owe ni ala ba ko ni lo. Ipu kishi oni Owuso ya dala oza kokoka, 20 alagye mishi oni ala pini ba kela la lo, ke wo omaku ka Ada kala ya kela okwunu kala la.

21 <<Ipu kishi oni oyene ya byo oyinanu ga dawa koyi ngmo, ada ya byo oyi nu ga dawa koyi ngmo, ayi ba wewa koko kada wa kpi inawa kweyi ba byuwa ga dawa koyi ngmo. 22 Kpiri kase ba yimu ko miyi kala lo ikweyi koni ala ba gbosun ni, ase ni zotu hagye Owuso ya ngma nu. 23 Ishini adala owe ogya oye, ala nyiso gogya oye. Nyya ka dala okwokwoshi, ala ba gege agogya ki Izrayila kpiri lo ome Oyi ka Asuse yawa la.

24 Ase ni afoza ni yasha ase ni fo ni lo, kwe oshe yasha adole nu lo. 25 Oyashoshi ase ni afoza na lema byase ni fo ni, oshe na lema bya adole nu. Owoni aya adole ogwu mo Obelizebu, edo kiye wonya ni aba ya ayole nu ogwu kpanu lo!

26 <<Ala ka yoshi kasuse lo. Ishi yawa ba ni ojoji ni ayi teba ni aba yi tese, oza ni ayi teba kpiri aba yase agye. 27 Oza ni nyya ka dala ipu kebe dibu ni ala ko isheno, oza ni nka dala kyo ni, ala ko nwaa dase na pwo. 28 Ala ka yoshi kawa ase ni ba yikpiye ngmo ni lo, ke bagege ko ngmo omaku lo, ala ke yoshi ko Owuso ni gboshu koyo omaku kpi ikpiye shipu kola ko gbogbo-gbogbo. 29 Ase bagege ayi igbano epa ra kpo otagula oye lo? Koni ale titi ni, oyoye wa ya gbo okpagye lo. Ke sa Ada kala yimu. 30 Mamani Ada kala gyo nwashika ki inyeyi kala. 31 Mani oni ala ka yoshi lo; ala shoshi sha awigbano ebe ko Owuso.

32 <<Kpiri kase ni manu wino gbosun ebe kasuse ese mani, ami ya kamo anu waka hin ebe ka Ada hin ni yiso ni. 33 Kpiri kase ni kamo anu waka hin lo obutu kasuse ese mani ke, ami ya kamo anu waka hin lo obutu ka Ada hin ni yiso ni.

34 <<Ala kama ipu kotu kala mo, nwwa ko byotu mene wese mani lalo. Nke bye efukpokpo wala. 35 Nwa koyoyi nongo woyakonu ka ada nu, Oyinonya ya woyakonu ki inanu, kweyi onya koyi ya woyakonu kino obunu. 36 Ase ki ipwole wo bawo oyakonu wo la.

37 <<Kpiri kase ni yimu ka adanu kwe inanu shun, ogye ko gbosun lo, kpiri ka ase ni ya yimu koyi nu nongo kwe nonya shun, ogye ko gbosun lo. 38 Kpiri kase ni kyogwu ko zoshi nu kpo owe ni yawa tanu ikweyi hin lo, ogye ko gbosun lo. 39 Kpiri kase ni yimu kolayi nu shun, oya pye lo, ase ni kyogwu ayo ngmo ikweyi hin oya pyo olayi kogbogbo-gbogbo.

40 <<Kpiri kase ni zala, ozun pini yoma, ase ni zun oza Ada hin ni tumoleho ni. 41 Kpiri kase ni zinobane koni owine kobane kela ko Owuso ni, Owuso ya danu abola byoni odinobane ni, kweyi kpiri kase ni zase ni yayo ozaneshi koni awaseneshi ni, Owuso ya danu abola byoni adase neshi ni. 42 Owoni ashe da ase ni ala mo wojije lo abwa kinyawo shosha koni oya gbosun ni, nyya ka dala okwokwoshi, oya pya abola nu.>>