1 Oyesu ki kelase oye da awa mo, 2 <<Obula ki iso lema byelase ikweyi ko ose oye ni yi imya ko onyape do oyi nu ni. 3 Ota awo oshe nu oleho mo ana ga ya awase ni apawa ni ogwu na wa. Ishini aga ni, atela ko wa!

4 Ebeni oki tawo oshe nu oye hoha oleho mo, <<Ala ga kada ase ni npawa ni mo, <Nshoko kena kpi ikpowu. Ojoji kpiri yawa. Ala webe ki imya ko onyape mini!>

5 Awase ni apawa ni ke tela ko wa kweyi gawa gebye hoha. Ashe geho nu, ashe gebe ko otoyu nu. 6 Ashishi ni kwa ayole nu kweyi dawa owe kotata, kweyi yuwa ngmo. 7 Otu ko ose ni bya kotata, kweyi otawa adakare nu oleho ga yawo ngmase mani yi ngmo kpiri kweyi ki yo ogya wa yi yola.

8 Ebeni oka dawo oshe nu mo, <Ojoji ko onyape gbayi wa, awase ni npawa ni ke sho ogbayi mani lo. 9 Ala gowe shepa shini ala kada ase ni ala ma kpiri mo ana webe ko onyape.> 10 Awo oshe ni bose gowe shepa ga ya ananoho ni ama ni ogwu wa, kase neshi, kase labi kpiri, kweyi oyikpa mwu kpa asuse.

11 Ishini ose ke wipu ko ma awo ogboga ni, omo ongo oye ni sho obagidi ko gbayi lo ni. 12 Kweyi odo oka mo, <Oya, oyamoji webe ni kpo obagidi ko gbayi lo?> Ongo mani ke gege ko ojije lo.

13 Bwebe ni ose ka dawo yiyi kwo oko ko onyape mo, <Ala yi ikpo kpa abo gbo shini ala yo ta gipu kebe dibu, ebeni aba kyegba kweyi ba shabo ahanu.>>>

14 <<Kweyi Oyesu kamo, aya ase nwashika ogwu, gbayayi pini aze la.>>

15 Awofarisi gbayi kweyi gbe ela koni aba yo Oyesu ya kwu. 16 Kweyi ata awogbosuwa kpase ko Ohiridus oleho gebe nu kweyi kamo, <<Inofoza, aha gye mo owino ko okwokwoshi la, oki ya fa ase ela ko Owuso ipu ko okwokwoshi, oya za anaho gyogye, 17 kadaha byo onabani: Oya shoshi shini ahan ze egba do Okesa ose ko Oroma la kwe ahan ka ze lo?>>

18 Oyesu ke gyo oza bibi ni aba gbo ipu ko otuwa ni kweyi kamo, <<Ojiya ni ala ba yimu ko yun kwu awoyoziyi? 19 Ala byi ikwiri na ase ba zegba kpa anu ni bi wa.>> Kweyi abyi ikwiri oni wa danu. 20 Oyesu duwo oka mo, <<Oyi ka anoho kpi iye ka anoho yi ikwiri mani?>>

21 Akamo, <<Oyi ko Okesa.>> Oyesu ka da awa mo, <<Oza ni wa ko Okesa ala yi do Okesa, ala do Owuso oza ni wa ko Owuso ni.>>

22 Ni apwo mani ni, igbashi yuwa kwu. Ashobita kweyi gawa.

23 Enoni Awosadukiya ni mo onyiso ka amiri yaba lo ni we ebe ko Oyesu wa kamo, 24 <<Inofoza, Omusa kamo owoni ongo gbo onya kweyi omoyi kpa anu lo gbi ishini ogekwu, oyinanu na doka ko onya oni shini na mo oyi danu. 25 Ishi oye agba ayine ahapa ni bagye kpa aha ni. Oyi kikyikyo ipu wa ogbo onya, omoyi lo gbishini ogekwu, osho onya ni bita. Oyinanu doka nu. 26 Ogbodagye mani kpo oyi ko me epa, kpa ko me eta gbishini ase ahapa ni kpiri gekwu. 27 Ogwejeji nu, onya ni gekwu. 28 Nabani onyiso ka amiri, oya wo onya ka anoho ipu wa ikweyi koni kpiri wa ase ahapa doka nu ni?>>

29 Oyesu kyogwu mo, <<Ala gebi owe. Ala gyo okpa ko Owuso lo. Ala ki gyo oshu ko Owuso lo. 30 Ishi ko nyiso amiri, ashishe ya gbo onya kwe aba byo go oda ko oba lo. Ishi oni aba lema bya ayoleho ipu ki iso. 31 Ikweyi kase ni gekwu nyiso amiri ni ke, ala ma ebyibye ipu ko okpa lo? Ni Owuso kamo, 32 <Ami wo Owuso ki Ibirayi, Owuso ki Ishaku kpo Owuso ko Oyakubu.> Anu wo Owuso kase ni gbo olayi ni la, wo Owuso kase ni gekwu ni la lo.>>

33 Ishini ewa ka asuse pwo oza-fofu nu ni, igbashi yuwa kwu.

34 Ishini Awofarisi pwo mo, ogwa awo Sadukiya agye ni, agbayi dudu ko ki do oka kela. 35 Ashe ipu wa wi inofono, kweyi ya mo Oyesu ma kpo oka doda.

36 Okamo, <<Inofoza, onya wo nyakwu ipu ko ono ni Omusa daha ni?>> 37 Oyesu kyogwu mo, <<<Yimu ka Adole Owuso wo kpo otu wo oye, ipu ko oza yoya wo kpo oshu wo kpiri.> 38 Oni wa kikyikyo, oki wo onyakwu ipu ko ono. 39 Kome epa ki lema, <Yimu kase byoni oya yimu kiyo ni.> 40 Kpiri ko ono ko Omusa kpo oza-fofu ka awi inobane bi ikweyi ko ono epa mani la.>>

41 Ishini Awofarisi shogba toni, Oyesu duwo oka mo, 42 <<Ala ba ra moji ipu ko otu kala ikweyi ko Okristi? Oyi ka anoho ni owe?>>

Akyogwu mo, <<Owo Oyi ko Odawuda.>> 43 Oyesu ka dawa mo, <<Ojiya ni Omaku ko Owuso yo Odawuda yayo ogwu mo, <Adole?> Koni Odawuda kamo,

44 <<<Adole kado Adole hin mo: Yagye abore hin gbi ishini nyya yawo obonya wo kpiri ba beye ki ikpo wo.> 45 Odawuda yo Okristi ogwu mo, <Adole> bwo owe wonya ni Okristi yawo oyi nu?>> 46 Ashishe gege ko kyogwu kela ke lo. Bwe enoni go ohobu ashishe gege ko do oka kela ke lo.