1 Ebeni, Omaku neshi ko Owuso byo Oyesu gipu ko ododa shini Ibiri na moma. 2 Oyesu kwokwunu keno awene, kotu keno, kweyi emye ngmo kotata. 3 Ebeni, Ibiri watanu moma kamo; <<Owoni owoyi ko Owuso, kadi ikyikpo mani na pya wikyoga.>> 4 Oyesu ke nyagbo mo, <<Ayitota ipu kokpa ko Owuso mo: <Ozarore kin pini ya dase olayi la lo, ke wela ni yawa bwo okwunu ko Owuso ni la.>>>

5 Ebeni, Ibiri zo Oyesu gogya sere ko Ojerusele, kweyi byo gogwejeji kiso ko Ole ko Owuso. 6 Oki kadanu mo, <<Owoni awowo Oyiko Owuso la, shibi gokpagye. Byoni ela ko Owuso kani,

<Oyakada ayoleho nu;

nawa byo

shimi oka yikpo gwakyo lo.>>>

7 Oyesu nyagbo mo, <<Ela ko Owuso ki kamo, kama Adole Owuso wo ma lo.>>

8 Ebeni Ibiri ki byo Oyesu gogwejeji kikweyi kefu, kweyi shiyanu kpiri ko Obula ni bese mani ni kpa awoza kigyashi ni banu ni. 9 Okadanu mo, <<Nyya dawo kpiri koza neshi ni nshiyawo ni, owoni okwagye geyagye dami.>>

10 Oyesu nyagbo mo, <<Ibiri, gashun!>> Ela ko Owuso ki kamo, <<Oya geyagye da Adole Owuso wo; Anu kin pini oya gbeshe danu la.>>

11 Ebeni Ibiri ganu, kweyi ayoleho ko Owuso wato Oyesu abo.

12 Ishini Oyesu pwomo ayo Oyohana toruduru ni, osho okpagye ko Oyahudiya bita gokpagye ko Ogalili. 13 Ishini ofagye ko Ogalili ni, oyagye ogya ko Onazareti lo, oke gayagye ogya ko Okapanahu ni yo pee kpishu ko Ogalili ni, Okpagye ko Ozebulu kpo okpagye ko Onaptali. 14 Omani gbodagye shini ela ko Owuso ni inobane Ishaya kani na wokwokwoshi:

15 <<Ala awase ko okpagye ko Ozebulu, ala awase ko okpagye ko Onaptali, agbabo kishu, ebelenu bwishu ko Ojoda,

ipu ko okpagye ko Ogalili, ebeni awase ni wase ko Oyahuda lo nwashika bipu kala,

16 awase ni bebe dibu ni, olayi bwebe ko Owuso wa dawa.>>

Awase ni ke bokpagye ni gbo obowu ki ikwu ni, ola bwebe ko Owuso ki yu dawa. 17 Bwebe ni, Oyesu kwotu kotono kela ko Owuso mo, <<Ala shagbotu sho ozalabi kala shini ala totuso Owuso, ela koni obula kiso yo pee ni.>>

18 Eno oye Oyesu ya yawu agbabo kishu ko Ogalili. Ni oyipu kiyawu ni Oma awayene epa, Osimo ni aba yogwu mo Obitrus ni, kpo Andru. Aba sheya ko kwebe kinyi, koni awawo kwebe kinyi ni. 19 Oyesu yuwo ogwu kamo, <<Ala wa, shini ala wawawo foko hin, shini na shiyala owe ko bya ase wa dami; byoni ala ba kwebe kinyi ni.>> 20 Ebebeni ashe eya wa bita kweyi gboso Oyesu.

21 Osha gohobu kee, oma awayene epa mamani, Oyakubu oyi ko Ozebedi kpo oyinanu Oyohana. Abipu kowu kpada wa Ozabadi, ba kyeya wa ko kwebe kinyi tu. Kweyi Oyesu yuwogwu. 22 Ebebeni asho owuwa kpada wa bita, kweyi gboso Oyesu.

23 Oyesu gyehe tokpagye ko Ogalili kpiri, yafoza ekpa * ya tono ebebe nya ikweyi koshu neshi kobula ko Owuso. Awase ni gbose gogo-gogo ni, kpa awase ni ba gbere ni, odawo gege kpiri. 24 Ela koza ni oya ni, gebebenya okpagye ko Osiriya, kweyi abyawase ni gbose gogo-gogo ni webe nu bwokpagye ko Osiriya koni oya ngmawa ni. Kpiri ka awase ni ikpiye ya duwose kotata ni, kpa awase ni gbo omaku bibi ni, kpa awase ni gbose ki ikpikpi ni, kpa awase ni gbose ko winyi ni, Oyesu dawo ogege ki ikpiye wa kpiri. 25 Ewa nwashika gboso gebebenya ni oga ni ase bwo okpagye ko Ogalili, kpe ebeni ayo mo ogya igwo ni, ogya nyakwu ko Ojerusele, kpo okpagye ko Oyahudiya kpiri, kpa awebeni yo ogbeyi kishu ko Ojoda ni.