1 Ototukpoki, kpiri ka awoteyi ka awosapa kpa awanyakwase ga gbayi kweyi gbela ko yo Oyesu ngmo. 2 Ayo gbo ogwa, kweyi abyo ga do ogbolamaga Obilatus.

3 Ishini Oyahuda ni byo ga ra ni mana, aye epwo she mo aba yo Oyesu ngmo ni, obyotu kweyi okwikye we ebe ka awoteyi ka awosapa kpa awanyakwase ka Ase ko Oyahuda. 4 Owa kamo, <<Nyyo ozalabi koni nyya ase ni yo ozalabi lo ni yi kwu dala ko yo ngmo ni.>>

Akamo, <<Akakaha wo onya ke? Oni we ela wo la.>>

5 Ebeni Oyahuda yi ikwiri yi ta go ole ko Owuso. Bwebeni obose gese ga yogwa tiyinu piso kweyi ogekwu.

6 Awoteyi ka awosapa yi kwiri oni yi bize kweyi kamo, <<Oya shoshi ko yi ikwiri mani yi ta akpokyo ole ko Owuso lo, koni ikwiri mani wi ikwiri ko oyi la.>> 7 Aga gbela ko oza ni aba ya kpi ikwiri oni mo ana ro okpagye koni aba nyo ogboga anu ni. 8 Oza ni yani, aba ye ebeni ogwu kwikyikye ni mo, okpagye ko oyi ni oma. 9 Ogbodagye mani byoni inobane Irimiya kani mo, <<Ebeni aza azurupa okpaku aweta ni ase ka Ase ko Izrayila kyogwu mo ana sore ikweyi nu ni oma, 10 kweyi ake re ebe ko nyo ogboga, byoni Adole ka dami ni.>>

11 Ishini Oyesu hagye obutu ko Obilatus ogbolamaga ko Oroma ni. Ogbolamaga do okamo, <<Awo pini wo ose ka awoyahuda la?>>

Oyesu kamo, <<Ole mani byoni oka ni.>> 12 Ishini awoteyi ka awosapa kpa awanyakwase ko ogya ko okame to Oyesu ni, oke ko ojije lo, 13 Ebeni Obilatus ka do Oyesu mo, <<Oya pwo oza ni aba ka ikweyi wo ni lo? 14 Oyesu ke kojije lo. Ebeni igbashi yo ogbolamaga kwu.

15 Ishi ki Imya ko Sheyi, owodu shini ogbolamaga na yashe ni ewa ka asuse ba yimu ni ngma shoruduru. 16 Ipu ki ishi oni, agbo oyi koruduru oye ni ananoho gyo aba yoogwu mo Obaraba. 17 Ishini ewa ka asuse gbayi ni, Obilatus duwo okamo, <<Anoho ni ala ba yimu shini na shobita da ala, Obaraba kwe Oyesu ni aba yo mo Okristi ni?>> 18 Ogye neneshi mo ipu ka anya yoya pini ayo Oyesu kwu wa danu la.

19 Ni Obilatus yagye ebe ko kepwo ni, onya nu toleho webe nu mo, <<Ngma abo wo shepwo kongo mani koni owa aseneshi la, nmowe ko okwokwoshi ipu ka ana otu hin bya kotata ikyeni ikweyi nu.>>

20 Ebeni awoteyi ka awosapa kpa awanyakwase ke kpuwo okwunu mo, ana sho Obaraba bita, ana yo Oyesu ngmo.

21 Ogbolamaga duwo oka mo, <<Anoho ipu kawase epa mani ni ala ba yimu shini na shobita?>>

Akamo, <<Obaraba!>>

22 Ebeni Obilatus duwo okamo, <Naya moji kpo Oyesu ni aba yo ogwu mo Okristi ni?>>

Kpiri wa kyogwu mo, <<Ana yo poshi!>>

23 Obilatus duwo okamo, <<Ojiya, Obibi koji ni oya?>> Lewa kase ngmegba nwa ba kamo, <<Ana yo poshi!>>

24 Ni Obilatus mamo oya gege ko yo ojije kelo ni, lewa ka asuse kwotu ko shawa, oshi inyo kweyi na abo obutu wa kweyi kamo. <<Abo hin ye ese, oyi nu yikweyi kala!>>

25 Kpiri ke ewa kamo, <<Oyi nu na yikweyi ka aha kpa ayi ka aha!>>

26 Ebeni Obilatus sho Obaraba bita da awa. Oyesu ke, oma awadakare na ya aboshi, kweyi ana byo ga poshi sepa.

27 Ebeni ashishini ka adakare ko byo Oyesu gipu ki ikpakyo kole ko ogbolamaga kweyi ya awadakare shishini wa shogba to. 28 Ayo oshiye ngma kweyi ayo obagidi ko ose yi shi ikpiye. 29 Ebeni agweka kigye, kweyi ayi likweyi. Ayo okposhi ko ose yi la abore, kweyi akwagye obutu nu ba ye ebe ba kamo, <<Abaga edu, Ose ko Ase ko Oyahuda!>> 30 Kweyi aki tehe sho, ayo okposhi ko ose bize kweyi ba gwi ikweyi. 31 Ishini aye ebe kweyi ni, ayo obagidi ko ose ngma sho oko kweyi ayo oshiye nu yi shi ikpiye. Kweyi apyanu tohobu ge ebe ko yo poshi.Agweka ki Igye lo Oyesu Ikweyi

32 Ishini abyo ba ge ebe ko yo poshi sepa ni, agbayi kpo ongo oye bwo Osayirin, iyenu wo Osimo, abyo ko otiri mo ona zo oshi ko Oyesu. 33 Ni afebeni aba yogu mo Ogolgota, ni ase nu wo okpokwu ki ikweyi. 34 Ebeni ado Oyesu inyi kpo oje lono mo ona gwa, ishini oma mani ni, otanu ko ogwa. 35 Ishini ayo poshi sepa ni, ayo oshiye nu yiko diyiwa bwe ebe ke ebawowo. 36 Abagye, kweyi ba gbeho nu. 37 Iso ki ikweyi nu ato oza ni akamo oya ni ayo poshi ni mo: Omani wo Oyesu, Ose kawase ko Oyahuda. 38 Aya awowi epa yi poshi kpanu, oye abore nu, oye aboshe nu. 39 Awo shigbo ba ji ikweyi kweyi aba ye ebe ba sesa mo, 40 awo ni kamo, <<Oya yo Ole ko Owuso ya kye kweyi ya kyanu ya ma ipu kene eta ni, ngmi iyo! Sa bwo oshi wo okpagye, owoni owo Oyi ko Owuso!>>

41 Mamani awoteyi ka awosapa, kpa awofono kpa awanyakwase ba ye ebe. 42 Aba kamo, <<Ongma ase shishini, oke gege ko ngmi iyinu lo. Anu pini wo Ose ki Izrayila la! Ona sa bwo oshi wo okpagye, kweyi ahan yo otuso. 43 Ototuso Owuso. Owuso nawa ngma anu, owoni oya yimu nu! Koni okamo, <Nwwo Oyi ko Owuso la ni.>>> 44 Mamani awowi ni ayuwa poshi kpanu dudu ni ki seesa.

45 Bwi isheno go ogye eta, kpiri ke ebe dibu okpagye ni. 46 Abo ko ogye eta, Oyesu kela kpo oko nwa ya kamo, <<Eloi, Eloi, lama sabatani?>> ikweyi nu wo, <<Owuso hin, Owuso hin, ojiyo pyitikpi tun?>>

47 Ishini ashishini kase ni hagye ebeni pwo oza ni oya kani, akamo, <<Ongo mani ya yi Iliya ogwu la.>>

48 Ebebeni ashe ipu wa nyinya ga za akasa. Oyi linyi, kweyi yi lo okposhi, odo Oyesu mo ona gwa. 49 Ashishini wa kamo, <<Nabani ahan shobita shini ahan ma kwe Iliya yawa ngma anu.>>

50 Kweyi ishini Oyesu kyegba kpo oko nwa ni, ozo Owushoshu nu.

51 Ishi oni ayikyi ni yipu ko Ole ko Owuso ni ko we epa bwi iso wo okpagye. Okpagye ja kweyi ikyikpo kya. 52 Amiri gwa kweyi awase neshi ni gekwu ni nyiso bwa amiri wa. 53 Abose bwa amiri, ishini Oyesu nyiso amiri ni, agi ipu ko ogya neshi, kweyi ase nwashika muwa.

54 Ishini oteyi ka adakare kpa awase ni ba gbeho ko Oyesu mo okpagye ja kpo oza ni gbodagye ni, oshi yuwa kwu, kweyi akamo, <<Ko okwokwoshi, anu mani wo Oyi ko Owuso la!>>

55 Anya nwashika be ebeni, aha gye ebe lenu. Agboso Oyesu bwo Ogalili kweyi ba ta abo. 56 Ipu wa wo Omeremu bwo Omagdalin, kpo Omeremu ene ko Oyakubu kpo Isu kpe ene ka ayi ko Ozebedi.

57 Ni eno ya sha ni, olodu oye bwo Arimatiya wa, iye nu wo Isu, ni wo oye ipu ka awo gboso Oyesu ni, 58 Oge ebe ko Obilatus, ga doka ko okwu ko Oyesu, Obilatus zo okwunu mo ana yo okwu ko Oyesu danu. 59 Isu yo okwu ko Oyesu sa wo okpagye, kweyi gwa agya kpo opa nehe, 60 kweyi oyo tagye ipu ka amiri nu ni obwu pepe ipu ki ikyikpo ni, oji ikyikpo nyakwu wayi ko okwunu ka amiri yigwu kweyi ganu. 61 Omeremu bwo Omagadaliya kpo Omeremu oye ni, bagye pi iyi ta amiri.

62 Gbe ebenya ni we Eno ko Minyo ni, awoteyi ka awosapa kpa ashishini ka Awofarisi ge ebe ko Obilatus. 63 Aga kamo, <<Adole! Aha ra, ishini ino gya ase egya mani tayayo yi iyi ni okamo, <Itikpi ke ene eta nyya nyiso. 64 Zo oko shini ana ga gbeho ka amiri nu ke ene eta. Lalo, awogboso baga yo okwu nu ya wi kweyi aba ka da ase mo onyiso amiri. Lalo, egya ki itikpi mani wa labi ya sha akikyikyo.>>

65 Obilatus kamo, <<Ala ga kpa adakare, ana ga gbeho ka amiri nu neneshi.>>

66 Ebeni akpa adakare ga gbeho ka amiri nu neneshi. Kweyi gwenena ikweyi ki ikyikpo ni.