1 Eneneni Oyesu bose ipu kole, kweyi oyagye ega ki ishu.

2 Ebeni ewa kasuse gbayi obutu nu kweyi ogipu kowu ga yagye, kweyi kpiri kewa mani hagye ega kishu. 3 Kweyi okelase ikweyi koza nwashika dawa, kamo, <<Osheho gebe ko myizire eho nu; 4 Ishini oya myizire ni, ashishini kizire shonu okoka kowe, ebeni ano wayi kpore. 5 Ashishini shonu ebeni gbo okpo ni, ebeni gbagye nwashika lo ni obwu papa, koni agye nwashika lo ni. 6 Ishini eno bose ni osizire, koni ogbawa pya agye neshi lo ni, angmongmo. 7 Ashishini kizire shonu ipu kigye, kweyi igye gye yuwa bya. 8 Ashishini shonu ipu ka agye neshi, gye kweyi mizire, ashishini ma asa ni gbi ikpo ogbogbo oye, ashishini wa awehiri, kpa aweta ko oza ni otu ni. 9 Ase ni gba akpaha ko pwela na pwo.>>

10 Ebeni awogboso doka mo, <<Ojiya ni oya kela kpase ipu kelase?>>

11 Okyogwu mo, <<Oza gyogye ko obula ki iso ni teba ni ayi gwa dala, apa yi gwa dawa lo. 12 Ase ni gbo gyogye kela ko obula ki iso, Owuso ya dano ogyogye nwashika, ase ni ke gbo ogyogye ko obula ki iso lo, koza ni oma mo ogye ni Owuso yayo agye lo. 13 Oza ni yani nyya kela dawa ipu kelase ni yoma:

<<koni ayiyi kwo oza, ama lo;

koni aya akpaha tagye aba, pwo kwe ake bagye lo.

14 Ikweyi wa obane ki Ishaya wa gyogye.

<<Ala ba zakpaha ala ke ba gye oza ni ala ba pwo ni lo,

ala ba yi iyi kwo oza kweyi ala ke ba gyo oza ni ala ba ma ni lo.

15 Olemani ikweyi koni ayo otu wa senu ni,

atawa ko pwela kpa akpaha wa

kweyi ayiyi wa gwu shini ana ka ma lo,

owoni obi lemani la lo abi yama kpi iyi wa

abi ya apwo kpa akpaha wa,

shini ana gye ipu ko otu wa,

shini ana pya shini ami na da awo gege ki ikpiye.

16 Otunehe waka la koni iyi kala ba ma, akpaha kala ki ba pwo ni. 17 Nyya ka dala okwokwoshi, awobane kpase neshi nwashika ba yimu ko ma awo oza ni ala ba ma mani, kweyi ama lo, shini ana pwo oza ni ala pwo mani, kweyi apwo lo.

18 <<Ala za akpaha sha ala pwo oza ni elase ki ino mi izire mani we ni: 19 Ishini ase ya pwela ko obula ko Owuso kweyi gyoza ni owe ni lo, ase bibi yawa yela ko Owuso ni yipu ko otu nu ni yi ngma. Omani pini we elase ikweyi ki izire ni ami kweyi gbo ikweyi ko owe kweyi ano wayi kpo re. 20 Ase ni ya pwe ela ko Owuso kweyi ze kpo otunehe papa olema byelase ikweyi ki izire ni ami kweyi gbo ikweyi ko okpo ni gba agye nwashika lo ni. 21 Ikweyi koni ela ko Owuso pye ebe ko yagye ipu ko otu nu tata lo ni, oya kyogwu kpanu opa ya ogbeji lo, mani oni ishini otu byobya kpo owe tanu ikweyi koni oze ela ko Owuso, ebe ni oya gbo papa. 22 Elase ikweyi ki izire ni shonu otutehe ki igye lema bya ase ni ya pwe ela ko Owuso ni kweyi imu ko oza kese mani ba we ela ko Owuso obi ko gye ipu nu oki ya wobi ko yo oko kpanu. 23 Izire ni shonu ikweyi ka agye neshi ni, lema bya awase ni pwe ela ko Owuso ko tata kweyi gyo neneshi kweyi ki yo oko kpanu. Mani oni ashishini ma asa ki izire ikpo ogbogbo oye, ashishini awihiri, kpa aweta ko oza ni otu ni.>>

24 Oyesu kada ase elase oye mo: <<Obula ki iso lema bya ase ni ti izire neshi ipu ke eho nu. 25 Ishini ase kpiri ba gbola ni, oyakonu wa ti ikpo ka akyashi ipu ki izire nu kweyi ganu. 26 Ishini izire gye kweyi gbi ikpo ni, ebe ni akyashi gye lalo.

27 <<Ebeni ayole ga ta adole wa, kweyi doka mo, <Adole, izire neshi pi otu eho la lo? Ojiya ome ni ikyashi bwu ipu nu nwashika?>

28 <<Okyogwu mo, <Omonyekwotu pini yo oza ni oma.> Oyole nu do okamo, <Oya yimu shini ahan ga yawi ikyashi shu shonu?

29 Okyogwu dawa mo, <Aayi, owoni ala ga ko sha akyashi, alaba yi izire shu kpa akyashi dudu. 30 Ala shuwa bita na gye dudu gbishi ko kyi izire. Ishi oni nyya ka da awokyi izire: Ikikyo ala yi ikyashi gwu tukpa ebye kponu kweyi yo ola kwo; kweyi ala kpi izire shi ipu ko owuya hin.>>>

31 Oki kelase oye dawa mo: <<Obula ki iso lema byi ikpo ko omusta, ni ongo oye tu eho nu ni. 32 Ikpo nu wo nyonye ipu ki ikpo ki izire shishini, owoni ogye oya gyokwu gi iso ya shi iyo ko obobo ni bi ipu ke eho ni, kweyi pya we efu ni ano bawa mole ayabo nu.>> 33 Kwikyikyeni Oyesu ki kelase oye dawa mo, <<Obula ki iso lema byo oyisi gbayayi ni onya kwabo kpo omu nwashika, gbishini omu nu.>>

34 Oyesu kela mani kpiri kpa asuse ipu elase; okwokwoshi ogbo ojije no fu wa kweyi gbe elase ipunu lo ni. 35 Oyesu yama ni shini na wa gyogye kpo oza ni inobane Ishaya ka mo:

<<Nwwa kela kpa asuse ipu kelase,

nyya gwa awi ikweyi kawo oza ni teba bwo kwagye kese mani.>>

36 Ebeni, Oyesu shuwa bita kweyi ganu go ole. Awogboso webe nu kweyi kamo, <<Gwi ikweyi kelase ki kyashi ni yeho ni daha.>>

37 Okyogwu da awa mo, <<Ase ni ti ikpo ki izire neshi ni woyi kasuse la. 38 Eho le bye ese mani la, ikpo ki izire neshi le bya ayi ko Obula. Ikyashi le bya ayi kase bibi la, 39 omonyekwotu ni ti ikiyashi ipu keho ni le byi ibiri; ishi ki izire kyokye le byo okweyi kese mani, awo kyizire wa ayoleho ko Owuso pi yoma.

40 <<Byoni aya akyashi shu kpo tukpa yi yola, mamani pi wa kpase bibi okweyi kese la. 41 Ami Oyi ka Asuse ya ta ayoleho eho ipu kese kweyi oza ni yi ayikoko ko Oyesu ko owuso in ya ase ayo ozalabi aba kpu wa gese mamani ase kpiri ni yo ozalabi, ki ya ase shishini yozalabi aba yuwa ngma shi ayikoko ko Oyesu ko owuso 42 kweyi ayo leho hin yuwa ta shola ko gbogbo-gbogbo, ebe ni aba kyegba kpo ha ahanu. 43 Ebeni awa aseneshi bayu bye eno ipu ke ayikoko ko Oyesu ka Ada wa. Ase ni gbakpaha ko pwo, na pwo!

44 <<Obula kiso lema byo odu ni ayi teba ipu keho ka ashe; ishini ase pye, okyanu teba, kpo otunehe oya yoza kpiri ni ogbo ni yikpo ra, kweyi oya aneho oni yira.

45 <<Mamani, ayikoko ko Oyesu ki iso lema bya awo yo otoyu ni ba labo ki ikikpo yoyu ko ra. 46 Ishini opyo olamu ni shoshi ki gbo ikwiri ni, ebeni oga ya awo oza ni ogbo kpiri ni yikpo ra, kweyi oga ro oni.

47 <<Kwikyikyeni, ayikoko ko Oyesu gi iso lema byo eya ko kwe ebinyi, ni ayi shu ipu ki inyo ki ishu ni, kweyi kwe ebinyi wo onyonya we ese: 48 Ishini eya mwu ni awotinyi pyo we ega wa bagye, kweyi akpa awo neneshi sho ogwugwu, awo ni labi ni ayi shonu. 49 Mani la mo owuso aya kpo wu ase okweyi kese mani la. Ayoleho bawa ya ase bibi yi ko sha aseneshi 50 kweyi aba ya ase bibi shola, ebeni aba kyegba kpo ha ahanu.

51 <<Oyesu duwo oka mo, <<Ala gya awoza mani kpiri?>> Akyogwu mo, <<Ee.>> 52 Oka dawa mo, <<Ase ni fono ikweyi ki ayikoko ko Oyesu ki gi iso lema bya Adole ni kpo odu nu pepe kpo onekye bwo owuya nu wese.>>

53 Ishini Oyesu kelase kweyi ni, oshe ebeni bita ge ebye. 54 Ni owogya nu ni, okwotu ko foza ekpa, kweyi igbashi yuwa kwu, kweyi adiyiwa oka mo, <<Ebe nya ni ongo mani pyo oza gyogye kpa awo oza ki igbashi ni oya ya mani?>> 55 Anu mani pini ada nu wi inogbopu lalo? Inanu pini wo Omeremu la lo? Ayi nanu pini wo Oyakubu kpo Isu kpo oSimo kpo Oyahuda lalo? 56 Ayina nu nonya, bagye kpa aha lalo? Ebenya me ni ongo mani pyoza mani kpiri?>> 57 kweyi otu wa bya kpa anu.

Oyesu ke ka da awa mo, <<Inobane, aba zo neshi ebye, ole nu kpo ogya nu ke aba zo neshi lo.>>

58 Ikweyi koni oyo oza ki igbashi nwashika ebe ni lo, kweyi atela ko akyogwu kpa anu mo owo Omezaya.