1 Oyesu gipu ko owu kinyo, kweyi sheyi kishu gogya nu. 2 Awashe byo ongo oye ni gbose kikpiye winyi ni webe nu, gwutagye ikweyi kote. Ishini Oyesu mo otuse wa ni, oka dine kikpiye winyi mo, <<Ka gbotu lo, oyi hin; ayozalabi wo yina.>>

3 Ikweyi kela ni Oyesu kani, ashini ka awofono ka diyiwa mo, <<Ongo mani yoza bibi oya ziyinu byo Owuso!>> 4 Oyesu gyoza ni yotu wa ni kweyi okamo, <<Ojiya ni ala ba yela kozabibi ipu kala mani? 5 Onya shashi she, ko kamo, <Ayozalabi wo yina kwe ko kamo, nyiso sho yawu>? 6 Nyya yoza ni ala yagye mo Oyi ka Asuse gboshu ese mani ko yozalabi kase yina.>> Ebeni oka dine kikpiye winyi mo, <<Nyiso, zote wo shino ogole.>>

7 Kweyi ongo ni nyiso ganu gole. 8 Ishini ewa kase mamani ni, igbashi kpo oshi yuwa kwu, kweyi asho Owuso iye, anu ni dase oshu koyoza ni.

9 Ishini Oyesu shebe ni bita ya gani, omo ongo oye, iyenu wo Omatiyu yagye ebe kozegba. Oka danu mo <<Gbosun,>> kweyi Omatiyu nyiso gboso.

10 Ishini Oyesu yaroza konose ole ko Omatiyu ni, awozegba lewa kpa awinozalabi shishini kpa awogboso bagye baroza kpanu. 11 Ishini Awofarisi ma mani ni ada awogboso oka mo, <<Ojiya ni inofaloza yaroza kpa awozegba kpa awinozalabi shishini?>>

12 Ishini Oyesu pwuwani, okamo, <<Awase ni loshu ni ba gebe koloboshi lo, awase ni loshu lo ni pini ba gebe koloboshi la. 13 Ala ga foza ni, okpa ko Owuso kani: <Nyya yimu shase na gbiyinyinyi kiyi wa, wo peshi kin lalo.> Nwebe ko yawa aseneshi ogwu lalo, ke wase ni ba yozalabi ni la.>>

14 Ebeni awogboso Oyohana wa doka kela mo, <<Ojiya ni aha kpa Awofarisi ba kwokwunu, awogboso ke ba kwokwunu lo?>>

15 Oyesu kyogwu dawa mo, <<Kwe ala mawoya koba konyape ba byotu ishini oba konyape yo kpawa ebe kimya konyape ni? Ishi ya waba ni aba yoba konyape ya bize shuwa ni. Ishi oni aba kwokwunu.

16 <<Ashishe ya gege ya yabo kayikyi pepe yagokwo nekye lo, koni ayikyi pepe yayo nekye yayi sha labi. 17 Ashishe ke ya yinyi kinabi pepe yasheyi kokpa nekye lo. Owoni ayamani, eyi kokpa ya kya kweyi inyi kinabi ya shonu, olema lalo, aba yinyi kinabi pepe ya sheyi kokpa pepe la, shini kpiri wa naka yishi lo.>>

18 Ishini Oyesu yipu kela mani ya kani, oteyi kase ko Oyahuda oye wa kwagye obutu nu kweyi kamo, <<Oyi hin nonya gekwu anana mani oma. Obiwa yabo so shini ona gbolayi.>>

19 Oyesu kpa awogboso nyiso kweyi ga kpanu. 20 Ebeni onya ni ya shonu kpo oyi ishayi igwepa ni kanu itikpi kweyi gabo akpaha koshiye nu. 21 Oka diyinu mo, <<Owoni nggabo akpaha koshiye nu kin, nyya pyogege ki kpiye hin.>>

22 Oyesu pya kweyi kamo. <<Oyi nonya kagbo otu lo! Otuse wo ngma wo.>> Ebeni opyogege kikpiye nu.

23 Ishini Oyesu gipwole koteyi kase ko Oyahuda kweyi oma awotajigwo kpewa kasuse nwashika ba kyegba, 24 Oka dawa mo, <<Ala bose gese, oyinonya mani gekwu lo, oke ya gbola la.>> Ebeni ayeye 25 Ishini onewa kasuse gese ni, ogipu koda kweyi, obyo oyinonya mani abo, kweyi onyiso iso. 26 Oshu mani gebe nye ipu ko okpagye ni.

27 Ishini Oyesu shebeni bita yaga ni, ango epa niwo ofiyi ni gboso ba shogwu yo mo, <<Oyi ko Odawuda! Miyinyinyi kaha.>>

28 Ishini ogipwole ni, ango epa ni wofiyi webe ko Oyesu, kweyi oduwoka, <<Ala gbotuse mo nyya gege ya yala mebe?>> Akyogwu kamo, <<Ayotuse mani adole.>>

29 Ebeni onyuwa abo iyi kweyi kamo, <Byoni ala yo otuse ni, nyya diyi kala ogege!>> 30 kweyi iyi wa gwa. Oyesu pyuwa akpaha ko tata kweyi kamo, <<Ala kaya ashishe na gye kamo ami diyi kala ogege lo.>> 31 Abose gese ke ga ko oshu oni ebe kpiri okpagye ni.

32 Ishini ofiyi epa ni shebe ni bita ba gese ni, awashe byo ongo ni gbo omaku bibi ni ya gege ko kela lo ni wa to Oyesu. 33 Ishini ono omaku bibi enya gese ni, ongo niya kela lo ni kela. Igbashi yuwa ku kweyi akamo, <<Ojije lemani gbodagye Izrayila ni amamani wa lo.>>

34 Ebeni ashini ko Awofarisi kamo, <<Ogege ko ngmo omaku bibi koni Oyo ose ko omaku bibi danu oshu ni.>>

35 Oyesu yawu gawogya nyakwu kpo oleke, kweyi ya foza ekpa, oya koshu neshi kobula ko Owuso kweyi ya dawine kose kpere kpiri ogege kikpiye wa. 36 Ishini omewa kasuse ni, omiyinyinyi wa, koni aba byotu ni kweyi agbase kotuwabo lo, byo otukpo ni gbine kogbeho wa lo ni. 37 Ebeni oka da awogboso kamo <<Izire ze eho, awo kyokye ke, le gbayayi. 38 Ala ba Adole keho, shini natawo yoko oleho na geho ga kyizire.>>