1 Ebeni, ashishini ka Awofarisi kpa awofono we ebe ko Oyesu bwo Ojerusele kweyi do oka mo, 2 <<Ojiya ni awogboso yo ono ka anyakwase yi yishi? Aba na abo ime ba roza lo?>> 3 Oyesu kyogwu mo, <<Ojiya ni ala yo ono ko Owuso yi ishi ela ko odu kala? 4 Koni Owuso kamo, <Geyagye da ada wo kpe ene wo,> Kweyi <Kpiri kase ni sa ada nu kwe inanu esa ana yo ngmo.> 5 Ala ke foza mo owoni ase gbo oza ko da ada nu kwe inanu kweyi kamo, <Nyya tala abo lo, oza ni ngbo nshokoyi ko do Owuso la.> 6 Bwe ebe koni ala mo oshu ko geyagye de ene kpa ada wa lo. Ni olemani, bwe ebe ko odu kala ala yo ono ko Owuso yi yishi pi yoma. 7 Ala awoyoziyi! Ela ni Ishaya bane ikweyi kala ni gyogye la,

8 <<<Awase mani ba geyagye do Owuso kpo okwunu wa kin la,

otu wa ke ye ebe le nu kpa anu.

9 Aba geyagye da ami yeye la,

oza ni aba fu ni wo ono ka asuse la, wa ko Owuso la lo.>>>

10 Oyesu ye ewa kase gwu wo obutu nu kweyi kamo, <<Ala sha, sha ala pwo! 11 Oza ni bwo okwunu kase gipu nu pini, ya yo ya gbinyi la lo; so oza ni ke bwo okwunu ya wese ni pini ya yo ya gbinyi la.>>

12 Bwebe ni, awogboso wa doka mo, <<Ogye mo Awofarisi otu wa bya, ko oza ni oka ni?>>

13 Okyogwu mo, <<Kpiri kefu ni Ada hin ni yi iso nyi la lo aba yo shu tonu ko ogbogba. 14 Ala shuwa bita. Awofiyi la, awo pyo ofiyi abo, kpiri wa ba gbo go ogo.>> 15 Ebeni Obitrus ka do Oyesu mo, <<Gwi ikweyi kelase mani daha.>> 16 Oyesu kadawa mo, <<Kwikyikye ni ala gye lo?>> 17 <<Ala gye mo, oza ni bwo okwunu gipu ka asuse ya bose bwe epu nu lo? 18 Oza ni bose bwo okwunu bwo otu la, awo oza ni pini ba ya ase ya gbinyi la. 19 Bwo otu kase pini awo oza bibi ba bose la, byo ngmase, ebaboba, owi, obasela, obiga-biwa. 20 Awo oza mani pini ya ase ya gbinyi la: ke wo roza na abo lo pini ya ya ase ya gbi inyi la lo.>>

21 Oyesu she ebeni bita go okpagye ko Otaya kpo Osidon. 22 Ebeni, onya ka agye ko Okana bye egba we ebe nu kamo, <<Adole, Oyi ko Odawuda, miyinyinyi hin! Oyi hin nonya ya mowe kpo omaku bibi ba.>> 23 Oyesu ko ojije lo. Ebeni awogboso we ebe nu kweyi bo mo, <<Pwe egba nu, shini na ga, oya gbosaha kpe egba.>> 24 Ebeni Oyesu ka do onya ni mo, <<Nwwa ela ka wo otukpo ki ipwoma ki Izrayila ni gebi ni kin la.>> 25 Onya ni wa kwagye obutu nu kweyi kamo, <<Adole, Oyesu tumabo.>> 26 Oyesu kyogwu mo <<Ashoshi ko yo oza rore neneshi ka ayi yi di iwo lo.>>

27 Olemani ko okwokwoshi, <<Adole: iwo ba ro oza ka adole wa ni shonu okpagye ni.>>

28 Ebeni Oyesu kyogwu mo, <<Onya, otuse wo loshu! Na lema byoni oba ni!>> Ishi oni oyinu pyo ogege.

29 Oyesu she ebeni bita kweyi di ishu ko Ogalili oye kweyi toshi gi iso ke efu ga yagye. 30 Lewa kase webe nu, abya awine ki ikpiye winyi kpo ofiyi kpa awopyepu agye kpa awine ki igbenu kyokye kpase shishini, kweyi akpuwa wo obutu nu, odawo ogege ki ikpiye. 31 Igbashi yuwa ku ni ama awine ki igbenu kyokye ba kela, awopyepu agye ba yawu, awine ki ikpiye winyi pyo ogege, ofiyi ba me ebe. Ebeni asho Owuso ki Izrayila iye.

32 Oyesu ya awogboso ogwu kweyi ka da awa mo, <<Nyya miyinyinyi kawase ni bagye kpa ami eno eta kweyi gbo oza rore lo ni, nyya yimu ko shuwa bita naga kpe emye lo ela koni aya ga shekwu owe ni.>>

33 Awogboso kyogwu mo, <<Ebenya ipu ki imweshi mani, ni aha ba pyo ikyoga ko gya awe ewa mani?>>

34 Oyesu duwo oka mo, <<Ikyoga ema ni ala gbo?>> Akyogwu mo, <<Ahapa, kpe ebinyi gbayayi.>> 35 Oyesu ka de ewa mo ana bagye okpagye. 36 Ebeni ozo ikyoga ahapa ni kpe ebinyi, kweyi okeshi do Owuso, oyi fo kweyi da awogboso, ime awa da ase. 37 Kpiri wa ha yipu. Bwe ebeni awogboso kpo oza ni aha shishini ni mwo ogwugwu ahapa. 38 Ewa kase ni ha ni wo okpaku ene, ijiji ka ango, anya kpa ayi leke akuwa ipunu lo. 39 Ni Oyesu ye ewa gawa ni, ogipu ko owu kweyi ga agye ko Omagadan.