1 Ishini Oyesu kela kweyi kpiri ni, oka da awogboso mo, 2 <<Ala gye mo, Imya ko Sheyi she eno epa go ohobu mina, kweyi aba yo Oyi ka Asuse ya kwu da awa kweyi aba yo poshi.>>

3 Ebeni oteyi ka awosapa kpa awanyakwase ga gbela ole ko Okayafas oteyi ka awosapa, 4 aga gbe ela ko yo Oyesu kwu kweyi yo ngmo. 5 Akamo, <<Oke wi ishi ki Imya ko Shigbo lo, ela koni ewa ka asuse naka shawa lo.>>

6 Ishini Oyesu tayayo yo ogya ko Obetani, ipwo ole ko Osimo, ni gbo ose ki iyiwa ni. 7 Onya oye wi ipwo ole kpe eyi ka ano kpeye ko shi ikpiye ni gbo ogye ni kweyi wa sho Oyesu ikweyi ishini oya roza ni.

8 Ishini awogboso Oyesu mo oza mani, akyanya kweyi akamo, <<Ibya koji mani? 9 Ano kpeye mani agye lo yi ra, ogye nu ya nwashika kweyi abi yo ogye do oleha.>>

10 Ni Oyesu ke gyo oza ni yo otuwa ni okamo, <<Ojiya ni ala ba jo onya mani abo? Oza ni oyun ni shoshi. 11 Kpiri ki ishi ala bagye kpa awoleha, ami ke ya yo kpa ala ishi kpiri lo. 12 Ishini oya shu ma ano mani ikpiye, oya kya ami yatu gbeyi ke eno ni aba yun nyi ni la. 13 Nyya ka dala okwokwoshi, kpiri ke ebe ni okoshu neshi mani ipu kese mani, aba ko oza ni onya mani ya ni shini na wo oza ki igwu ikweyi nu.>>

14 Ebeni oye ipu ka awogboso igwepa ni aba yogwu mo Oyahuda Iskariyoti ni, ge ebe ka awoteyi ka awosapa, 15 oga duwo oka mo, <<Oji ni ala ba da ami owoni nyyo Oyesu kwu da ala?>> Ebeni ada nu azurupa okpaku aweta. 16 Bwi ishi oni, Oyahuda ya tikpo ko owe ni oya yo Oyesu ya kwu da awa ni.

17 Eno kikyikyo ko ro oza ki Imya ki ikyoga ni gbo Oyisi lo ni, awogboso Oyesu we ebe nu wa do oka mo, <<Ebenya ni oya yimu shini ahan ga kyanutu ko roza ki Imya ko Sheyi do?>> 18 Okamo, <<Ala gipu ko ogya, ebe ko ongo oye, ala ga ka danu mo, <Adole kamo, ishi nu yo pee, anu kpa awogboso ba yimu kowa roza ki Imya ko Sheyi ole wo.>>> 19 Awogboso Oyesu yo oza ni oka da awani, aga yo oza rore ki Imya ko Sheyi.

20 Ishini eno shani, Oyesu yagye kpa awogboso igwepa ba roza. 21 Ni aba ro oza ni Oyesu kamo, <<Nyya ka dala okwokwoshi, ashe ipu kala ya yun ra.>>

22 Ebeni otuwa bya ko otata, akwotu ko diyiwa oka mo, <<Kwa ami la, Adole?>>

23 Oyesu kyogwu mo, <<Ashe oye, ni ya labo owatu kpa ami ni pini ya yun ya ra la. 24 Oyi ka Asuse ya ga byoni ayitota ipu ko okpa ni. Igbe na ta ase ni yo ra ni. Oya shoshi shini abi ka mo lo.>>

25 Bwe ebeni Oyahuda ni yo ra da awa ni do oka mo, <<Inofoza, ami la?>> Oyesu ka danu mo, <<Awo la.>>

26 Ishini aba roza ni, Oyesu zi Ikyoga kweyi keshi ko Owuso kweyi oyikyigbo kweyi da awogboso kamo, <<Ala ze shini ala ha, omani pini wi ikpiye hin la.>>

27 Oki za abwa ki inyi, okeshi do Owuso, oyi da awa kweyi kamo, <<Ala ze sha ala gwa kpiri kala bwi ipu nu. 28 Omani wo oyi hin la, oyi ko okoyi pepe, ko yozalabi gba asuse kpiri. 29 Nyya ka dala, nyya gwinyi ki inabi ke lo, si ishi oye ni nki yawa gwo opepe kpa ala dudu ipu ko obula ka Ada hin.>>

30 Ishini Oyesu kpa awogboso wigye ni, abose gi ikweyi ke Efu ko Ozetu.

31 Kweyi Oyesu ka da awa mo, <<Otu ki ikyeni ala ba kya kala shun bita. Byoni ata ipu ko okpa ko Owuso kamo,

<<<Ami Owuso ya ngmi inogbeho ko obize, kweyi otukpo ba kya.> 32 Owoni nyiso amiri, nyya kwobonu ya da ala ya go Ogalili.>>

33 Obitrus kyogwu mo, <<Owoni kpiri kase ba kya shobita, nyya shobita lo.>>

34 Oyesu ka danu mo, <<Nyya ka da awokwokwoshi Obitrus, ipu ko otu mani, ome obogwu na tono, oya tawashu hin igbe eta mo ogyun ebibye lo.>>

35 Obitrus hagye oko nu mo, <<Ko owako gekwu, nyya ga kpa awo, nyya shobita lo!>> Kpiri ka awogboso ka mamani.

36 Ebeni Oyesu kpa awogboso ge ebye ni aba yogwu mo Ogetsemani, kweyi oka da awa mo, <<Ala bagye ebeni, nyya ga anoni ga tinarigwu.>> 37 Ozo Obitrus kpa ayi ko Ozebedi epa, kweyi okwotu ko byo otu ko tota. 38 Oka da awa mo, <<Otu hin ya bya byona gekwu ni. Ala hagye ebeni shini ala gbeho kpa ami dudu.>>

39 Oshaga kee kweyi ogbo yi iyi ka agye kweyi ya bo Owuso mo, <<Ada hin! Owoni okyogwu, ya abwa mani yi bize shun. Oza ko otu wo ke na gbodagye, wa akaka hin lalo.>>

40 Bwe ebeni okwikye we ebe ka awogboso, kweyi owa tawa ba gbola, kweyi oka do Obitrus mo, <<Ala bagege ya gbeho kpa ami kwa aki ishi oye lo? 41 Ala gbeho kpi inarigwu, shini ala ka gbo ipu ko omama lo. Ko kwokwoshi omaku ya yimu, ikpiye ke sha!>>

42 Oyesu ki kwikye kome epa ge ebe ko tinarigwu mo, <<Ada hin! Owoni okyogwu, ya abwa mani yi bize shun lo, yo oza ni yipu ko otu wo na gbodagye.>>

43 Ishini oki kwikye we ebe wa ni, oki wa tawa ba gbola, koni ola nwuwiyi ni. 44 Oshu wa bita kwikye ko omweta ge ebe ko tinarigwu, ya kyo oza ni oka ni ya ka.

45 Ebeni okwikye we ebe ka awogboso kweyi kamo, <<Ala tayayo ba gbola, ki ba minyo? Ala ma, ishi ke gye wa. Aba yo Oyi ka Asuse ya ra da awino ozalabi ikyeni.>> 46 Ala nyiso. Shan ga. Ma, ase ni ya yun ya ra da awa ni yoma!>>

47 Oyesu yipu kela ya ka, Oyahuda ni wo oye ipu ka awogboso igwepa ni wa kpe ewa ka asuse kpe ewakpa kpo okposhi abo wa. Awoteyi ka awosapa kpa awanyakwase pini tuwo oleho la. 48 Ase ni ya yo Oyesu ra da awa ni kwobonu ka da awa oza ni oyaya ni, okamo, <<Ase ni ami kwo botu, anu pini yoma, ala yo kwu!>> * 49 Owowa nu, okwu tiriri ge ebe ko Oyesu, kweyi kamo <<Nngmagye, Inofoza!>> Kweyi okwo botu.

50 Ebeni Oyesu ka danu mo, <<Oya hin yo oza ni byo wani.

Ebeni asha go ohobu ga yo kwu. 51 Ebebeni oye ipu kawase ni bagye kpo Oyesu pe ewakpa kweyi yo oshe ko oteyi ko osapa akpaha oye she.

52 Oyesu ka danu mo, <<Kye ewakpa wo la ape nu. Kpiri kase ni yayo oza kpe ewakpa, oya gekwu kpe ewakpa. 53 Ala gye mo nyya gege ko ba Ada hin, na da ami ikpo ka awadakare ka ayoleho nu ni sho okpakwu igwepa lo? 54 Owoni nyya mani ke, ela ni okpa ko Owuso kani yamoji ya gya ikweyi ko oza ni ya gbodagye anani?>>

55 Ishi oni Oyesu ka de ewa ka asuse mo, <<Nyyo oji ni ala wa kpe ewakpa kpo okposhi ko wa yun kwu byo nwwo owi? Nyyo kpa ala kpiri ki ishi ya foza Ole ko Owuso, kweyi ala gege ko yun kwu lo. 56 <<Kpiri ka awoza mani ke gbodagye shini oza ni inobane ta ipu ko okpa ni na gyogye.>>

Ebeni kpiri ka awogboso shobita kweyi nyinya wa.

57 Awase ni yo Oyesu kwu ni byo ge ebe ko Okayafas oteyi ka awosapa, ebeni awofono kpa awanyakwase ba gbayi ni. 58 Obitrus ke gbosuwa itikpi ebe lenu ga akpada kole ko oteyi ko osapa. Oga yagye kpa awogbeho shini ona mo oza ni ya gbodagye ni.

59 Ebeni oteyi ka awosapa kpa awonongbo ba labo ko olobene ko okame ikweyi ko Oyesu shini ana yo ngmo. 60 Awolobene ko okame nwashika bose, ake pyela zoze lo.

Itikpi ase epa bose, 61 kweyi kamo, <<Ongo mani kamo, <Nyya gege ko yo ole ko Owuso mani yi kye kweyi ya kyanu ya ma ipu ke eno eta.>>>

62 Ebebeni oteyi ka awosapa takpa nyiso kweyi ka do Oyesu mo, <<Oya kyogwu kela mani lo? Olobene ko okame ni awase mani ba ka ikweyi wo ni?>> 63 Oyesu ke ko ojije lo.

Oteyi ka awosapa ka danu mo, <<Nyya kwikpo ko Owuso ni gbo olayi ni ebe wo: Ka daha owoni awo pini wo Okristi, Oyi ko Owuso la.>>

64 Oyesu ka danu mo, <<Byoni oka ni. Nke ya ka dala: bwi ishi mani go ohobu, ala ba mo Oyi ka Asuse ya yagye abore ki Ine ko Oshu kweyi ya awa ipu ko okpowuso ki iso.>>

65 Ebeni oteyi ka awosapa yo oshiye nu yi sha, kweyi kamo, <<Okela ka arigbetu! Olobene koji ni aha ba tikpo bwe ebenu ke? Ala pwo, okela ka arigbetu. 66 Ala ma moji?>>

Akyogwu mo, <<Oshu ko gekwu.>>

67 Ebeni atehe shiiyi kweyi aki gwo. Ashishini kase laabo akpaha 68 kweyi kamo, <<Bane daha Okristi. Anoho gwo?>>

69 Ni Obitrus yagye ikpakyo ni, oshe nonya oye wa ta anu kweyi kamo, <<Awo yo kpo Oyesu ko Ogalili mamani.>>

70 Obitrus ke tawashu obutuwa kpiri mo, <<Ngyo oza ni oya ka ni lo.>>

71 Onyiso gofunu ke ekpa, oyinonya oye ki mo kweyi ka da awase ni bagye ebeni mo, <<Ongo mani yo kpo Oyesu Onazareti mamani.>>

72 Oki tawashu kpe enegwogwa mo: Ngyo ongo mani lo!>>

73 Ishi kee awase ni hagye ebeni ni gebe ke Obitrus kweyi ka danu mo, <<Ko okwokwoshi owashe oye ipu wa la koni ela koka wo shiya aha ni.>>

74 Bwe ebeni okwotu ko tawashu kpe enegwogwa ya kamo, <<Anu gyo ongo mani lo!>>

Ebebeni obogwu tono. 75 Bwe ebeni Obitrus rela ni Oyesu ka danu ni mo, <<Ome obogwu na tono, oya tawashu hin igbeta.>> Kweyi obose ge ese ga kyegba kotata.