1 Ipu ki ishi oni, awogboso we ebe ko Oyesu kweyi do oka mo, <<Anoho wo onyakwu obula ki iso?>> 2 Oyesu yo oyi leke oye ogu wa hagye otutehe wa, 3 kweyi kamo, <<Nyya ka dala okwokwoshi, owoni ala lema byo ayi lekeke ni lo, ala ba go obula ki iso lo. 4 Kpiri kase ni zi iyinu wo ojije lo byo oyi leke mani, anu pini wo onyakwu obula ki iso la.>>

5 kweyi kpiri kase ni zo oyi leke mani ipu ki iyen ami pini oze oma.

6 <<Ni olemani, kpiri kase ni ke ya ayi leke mani yo ozalabi, ashoshi she shini ana ye ego nyakwu gbo bo oko kweyi yo ta gi ishu. 7 Arigbetu de ese mani ela ko zani ya ase ba yo ozalabi ni! Awo otiri shini oza ni ya ase ba yo ozalabi ni na wa, arigbetu da ase ni gba abo ipu ko oza ni. 8 <<Owoni abo wo, kwe ikpo wo ya yo ya yo ozalabi, yi go tonu. Ashoshi she shini opyo olayi ko gbogbo-gbogbo kpa abo oye gogo kwe oshikikini sho oni aba yo ta go ola kpa abo kwe ikpo epa ni. 9 Kweyi owoni iyi wo ya byo go ozalabi, yi ngma tonu. Ashoshi she shini opyo olayi ko gbogbo-gbogbo sho oni aba yo ata go ole ko ola ni gbo myomyi lo ni.>>

10 Ala gbera, ala ka mo oye ipu ka ayi leke mani gyiyi lo. Nyya ka dala mo ipu ki iso, ayoleho wa ba yo kpa Ada hin ishi nye. 11 Ikweyi koni Oyi ka Asuse wa ko ngma ase ni gebi ni.*

12 Ala ma moji? <<Owoni ashe gbo otukpo ogbogbo oye, kweyi oye ipu wa gebi, oya gege ko sha awahane ayahane bita ikpokyi kweyi ga labo ko oye ni gebi ni lo? 13 Owoni opye, nyya ka dala okwokwoshi, oya shotunehe ikweyi ko oye ni opye ni ya sha awahane ayahane oni la. 14 Mamani, Ada kala ni yi iso ni ya yimu shini oyo oye ipu ka ayi leke mani na gebi lo.>>

15 Owoni oyene wo yo ozalabi, ga ka danu obibi nu, awo kpa anu ase epa. Owoni opwaha wo, oyo oyinawo pye pi yoma. 16 Owoni opwo lo ke, ya ase oye kwe epa ogwu, shini ala ge ebe nu, bwebe ka awo olobene epa kwe eta, ala ba yela kpiri ya gwo. 17 Owoni oyene wo tanu ko pwela wa, ga kadase ni kyogwu kpo oshu neshi ni, owoni otanu ko pwela wa, ana zo byase ni ya peka kwe bya awozegba. 18 <<Nyya ka dala okwokwoshi, kpiri ko oza ni ala gbo ese mani ayi gbo iso pi yoma, kweyi oza ni ala yiyi ese mani kpiri, ayiyi iso. 19 <<Nki ya ka dala okwokwoshi, owoni ase epa kwe eta ipu kala kyogwu kweyi doka koje ese, Ada hin ni yi iso ni ya da ala. 20 Ebeni ase epa kwe eta gbayi ipu ki iyen, ami yo kpa awa.>>

21 Bwebe ni Obitrus wa do Oyesu oka mo, <<Adole, igbema ni nyya yo ozalabi ni oyene hin yun ni gbo? Igba ahapa?>> 22 Oyesu kadanu mo, <<Owigba ahapa kin lalo, ke wigba awahapa ole ahapa.

23 <<Ikweyi koni, obula ki iso ya lema byo ose oye ni ya yimu ko ka arisawu ko odu nu ni ya abo ka ayole nu ni. 24 Ishini okwotu ko ka arisawu ni, abyo ongo oye ni oya kanu ikwiri nwashika ni wa. 25 Ikweyi koni oya gege ko sore lo ni, adole nu zo oko mo ana yo kpo onya nu kpa ayi nu kpo oza ni ogbo kpiri ni yi ra shini ana sore ki ikwiri ni okpa ni.

26 Oyole ni ke weyi kwagye kweyi bo kamo, <Gbotu mene kpami, nyya sore ko ogye ni kpiri.> 27 Ebebeni adole ko oyole mani miyinyinyi nu, yore nu gbo kweyi mo ona ga nu.

28 <<Ishini oyole ni gese ni, omo oya ko oko nu oye ni kpanu ikwiri gbayayi ebe nu ni, osho oshiye to oko mo, <Ona sore ko oza ni anu kpanu ni kpiri.> 29 <<Ebebeni oya ko oko nu kwagye obutu nu kweyi bo mo, <Gbotu mene kpami, nyya sore ki ikwiri wo.> 30 <<Ebeni oyole mani ke tanu, oyo kwu ga yo to oruduru, gbi ishini ni osore ko ore ni kpiri. 31 Ishini awoya ko oko nu shishini pwo oza ni gbodagye ni, otu wa bya kpanu. Bwebe ni aga ka do ose oza ni gbodagye ni kpiri.

32 <<Ebebeni adole yo oyole oni ogwu kweyi ka danu mo, <Owo oyole ni gbo otu labi ni.> <Nsho ore wo bita ikweyi koni odumoka ni. 33 Oshu ko miyinyinyi koya ko oko wo byo ni ami miyinyinyi wo ni lo?> 34 Ose kyanya ko otata kpanu kweyi kadawa mo ana yo ta go oruduru gbishini osore ki ikwiri ni nkpa nu ni kpiri. 35 <<Ada hin ni yi iso ni ya yigba ananoho ni sho ozalabi ko oyi na nu bita kpo otu oye iso.>>