1 <<Ala kakwase epwo lo, shini Owuso naka kwala epwo lo. 2 Byoni ala ba kwase epwo ni, mamani pini Owuso ya kwala epwo la, owe ni ala bwu ome ala kwase epwo ni, owe ni pini Owuso ya bwu ya kwala epwo la.

3 <<Ojiya ni oya mikpo kikyashi iyi ko yene wo, kweyi osho ogbulo ni yipu kiyi wo ni bita? 4 Oya kado oyene wo moji, wa na yikpo kikyashi ni yipu kiyi wo ni ngma; ome awo ke gbo ogbulo yiyi wo? 5 Awo olanwe, ikikyo yogbulo ni yipu kiyi wo ni yi ngma ome shini omebe neneshi ko yikpo kikyashi ni yiyi ko oyene wo ngma.

6 <<Ala ka yoza ni wo sere ni yidiwo lo, koni oya pya ya fala ahanu; kwoza kimu kala kayi shobutu karuma lo. Owoni ala ya mani aba dikpo.

7 <<Ala do Owuso oka koza ni ala ba yimu oya dala, labo koza ni ala bayimu ebe ko Owuso ala bapye; ala gwofunu ko Owuso oya gwa dala. 8 Kpiri kase ni do Owuso oka koza oya danu; ase ni labo koza ebe ko Owuso oya ma; ase ni gwofunu ko Owuso, Owuso ya gwa danu.

9 <<Anoho kala, ni oyinu do oka kikyoga kweyi adanu ikyikpo? 10 Kwowoni odoka ke ebinyi, adanu ya danu egwa? 11 Owoni ala ase bibi bagye ko dayi kala oza neshi ni abadoka ni, Ada kala ni yiso ni gbotu neshi shala ni ya dala oza ni ala badoka ni! 12 Ni olemani, oza ni ala ba yimu shini ase na ya dala, ala ya dawa mamani; omani pini wozafofu kono ko Omusa kpa awinobane la.>>

13 <<Ala gobula ko Owuso bwo owe kofunu pyopyi. Koni owe kofunu gwogwa kpo owe gwogwa ya byase gikwu ko gbogbo-gbogbo, ase lewa ba bwanu la. 14 Byoni olemani, owe pyopyi pini ya byaha golayi kweyi ase gbayayi pini ba bwu la.

15 <<Ala gbera kpa awobane ko kame. Aba webe kala byo otukpo ni gbotu neneshi, ipu kotu wa alema byi iwo kikyashi niba yala ofoni. 16 Bwebe koza yo yawa ala ba gyuwa. Ala ba pyo ogwogwa kofig bwefu kigye lo, kwo odu ya gwigye lo. 17 Mamani oni, edo kefu loshu ya gwa nyakwu, kweyi efu ni ya gbere yagwa tititi. 18 Efu loshu yagwa tititi lo, mamani efu niya gbere yagwa nyakwu lo. 19 Kpiri kefu ni gwa neshi lo, aba yigo kweyi ta gola. 20 Ni olemani oni, ala bagya awinobane bwebe koko wa.

21 <<Kpiri kase ni ba yumogwu mo, <Adole, Adole,> Pini ya gobula ko Owuso la lo, ke ase ni yoza ni Ada hin ni yiso yimu mo ana ya ni. 22 Ase lewa ba ka dami eno ko kepwo mo, <Adole, Adole, aha tono kela ko Owuso ipu kiye wo, kweyi aki no omaku bibi enya shikpiye kase ipu kiye wo, aki yoza kigbashi nwashika ipu kiye wo.> 23 Ebeni nyya ka dala mo, <Ngyala lo. Ala ga shebeni, awo yozabibi!>

24 <<Ni olemani oni, kpiri kase ni pwela hin mani kweyi yoko kpanu, olema byo oziyi ni mole nu ikweyi kikyikpo ni. 25 Owuso wa, inyo nwokpa, owuta ole ni ke kye lo, ela koni ashikpo nu ikweyi kikyikpo ni. 26 Ase ni ke pwela hin mani kweyi tela ko yoko kpanu, olema byase yeye ni mole ikweyi kisisagye ni. 27 Owuso wa okpa nwu, kweyi owu tole ni gbo.>>

28 Ishini Oyesu kela kweyi ni, ase lewa ni bebeni igbashi yuwa kwu koza ni ofu ni, 29 Ikweyi koni ofuwoza byase ni gboshu ikweyi koza kpiri, olema bya awofono ni la lo.