1 Ishi oni, Oyohana inoyo Obatisma kwotu ko tono kela ko Owuso ipu kododa okpagye ko Oyahudiya. 2 Oya kamo, <<Ala shagbotu shozalabi kala shini ala yotuso Owuso, ikweyi koni owowa kobula kiso yo pee.>> 3 Oyohana wase ni inobane ko Owuso Ishaya ya kela ikweyi nu, ishini okamo,

<<Ashe ya tono kpoko nwaa, ipu kododa mo,

<Kyowetu gbeyi ka Adole!

Kyowe tiriri danu.>>>

4 Oshiye ko Oyohana woya ko onyakwimi, Oyo okpa gbogbeyi nu, Ozarore nu wi ikpaga kpinyi keho. 5 Ase webe nu bwogya ko Ojerusele, okpagye kpiri ni shishini ko Oyahudiya, kikpo kpagye ko Ojoda. 6 Ashagbotu kozalabi wa, kweyi oyuwo obatisma ishu ko Ojoda.

7 Ishini Oyohana mawo Ofarisi kpawo Osaduki nwashika ba webenu koyuwo obatisma ni, okadawa mo, <<Ala awigboji! Anoho pyala akpaha mo, alaba bose bweshe gbogbo ni Owuso yabiwa ikweyi kase ni? 8 Ala yawoza ni ya sayi ase mo, ala shagbotu shozalabi kala bita wa, kweyi totuso Owuso. 9 Ala kaka diyikala mo angmala, koni Ibirayi wokyikyi kokyikyi kaha! Nyya ka dala mo Owuso yagege ko pya awikyikpo mani yawayi di Ibirayi. 10 Owuso yaga gbeyi kogogba kefu tonu, efu kpiri nigwa neshi lo, ala yogo tonu ime yo ta gola.

11 <<Awase ni shagbotu wa kweyi totuso Owuso ni, ami ya yala obatisma kpi inyo. Anu ni yawa itikpi hin ni shun puputu, anu oni nyya gege ko wa pee kpanu lo, koni oshun ni, kweyi okpabawu nu nyya gege kokpo lo. Oyawa yala obatisma kpo Omaku ko Owuso kpola. 12 Ogbo oda kotowu kizire sho omutu nu bita. Oya kpi izire nu sho owuya, omutu nu ke oyayi yola ni gbo myomyi loni.>>

13 Ishi oni, Oyesu bwo Ogalili gebe ko Oyohana ishu ko Ojoda koni anayo obatisma ni. 14 Oyohana ya yimu koyo Oyesu Obatisma lo, oya kamo, <<Ami Oyohana, keya yimu shini oyumo obatisma la kweyi awo webe hin?>>

15 Oyesu nyagbo mo, <<Nalemani anani, oya shoshi koni ahan yojoji kpiri ipu kimu ko Owuso.>> Ebeni Oyohana kyogwu koyo Oyesu obatisma.

16 Ishini oyo Oyesu obatisma ni, obose ipu kinyo, okpowuso gwa kweyi omo Omaku ko Owuso sa bwiso byo otitiribi ni wa kwagye ikpiye nu. 17 Kweyi oko kela bwiso ya kamo, <<Omani woyi hin moshi ni nyya yimu ni, otu hin ya sha kpanu.>>